Pandita 4:1-16
4 Heug deui kuring nempo di kolong langit, jalma-jalma téh nindes batur. Kuring nempo jalma-jalma nu ditindes careurik, meni euweuh pisan nu ngabélaan. Maranéhna ditindes ku jalma-jalma nu nyarekel kawasa, jadi euweuh nu nulungan maranéhna.
2 Ku kituna, ceuk kuring mah mending kénéh jalma nu geus maraot tibatan jalma nu harirup kénéh.
3 Tapi dibandingkeun jeung jalma-jalma éta mah mending kénéh jalma nu can lahir, nu can pernah nempo kajahatan di dunya.
4 Kuring gé geus nempo sakumaha gedé upaya* jalma-jalma jeung katarampilan nu ditémbongkeun ku maranéhna pédah hayang paunggul-unggul. Éta gé mubadir kawas ngudag-ngudag angin.
5 Jelema bodo mah leungeunna sidakep embung digawé nepi ka manéhna maot kalaparan.*
6 Alus kénéh reureuh sakeudeung* tibatan dur-duran digawé,* da éta téh kawas ngudag-ngudag angin.
7 Aya deui perkara nu mubadir di dunya, nu dipikiran ku kuring:
8 Aya jelema nu hirupna nyorangan, teu boga babaturan. Budak teu boga, dulur gé teu boga, tapi manéhna terus wéh dur-duran digawé. Panonna teu puas-puas ku kakayaan. Meureun manéhna teu pernah mikir kieu, ’Jang saha atuh aing durduran digawé téh, nepi ka poho senang-senang?’ Éta gé mubadir. Éta pagawéan nu nyusahkeun haté.
9 Duaan leuwih hadé tibatan sorangan, sabab maranéhna bisa digawé bareng sarta hasilna leuwih alus.*
10 Mun nu saurang labuh, baturna bisa nulungan. Coba mun sorangan mah, lamun labuh téh saha nu rék nulungan?
11 Geus kitu, lamun duaan mah bisa silih haneutan. Ari sorangan mah rék bisa haneut kumaha?
12 Terus, mun sorangan mah gampang diéléhkeun, ari duaan mah bisa kuat ngalawan musuh. Tapi tali tilu rara hésé dipegatkeunana.
13 Leuheung kénéh budak ngora nu miskin tapi bijaksana tibatan raja nu geus kolot tapi bodo jeung geus teu daék ngadéngékeun naséhat.
14 Manéhna* kaluar ti panjara, seug jadi raja, sanajan manéhna miskin ti barang lahir di éta karajaan.
15 Kuring mikiran kabéh jalma nu hirup di dunya, jeung mikiran budak ngora gaganti raja.
16 Sanajan nu ngadukung manéhna téh teu kaitung lobana, jalma-jalma nu aya sanggeusna mah moal resepeun ka manéhna. Éta gé mubadir, kawas ngudag-ngudag angin.
Catetan Tambihan
^ Atawa ”sakumaha susah payahna”.
^ As. ”jeung ngadahar dagingna sorangan”.
^ As. ”sakeupeul reureuh”.
^ As. ”dua keupeul digawé”.
^ Atawa ”sarta ngarasakeun hasil nu alus”.
^ Bisa jadi ngamaksudkeun budak ngora nu bijaksana téa.
