Roma 11:1-36
11 Ayeuna kuring rék nanya: Allah téh nolak umat-Na, kitu? Nya henteu atuh! Apanan kuring gé urang Israél, turunan* Ibrahim, ti kaom Bényamin.
2 Allah teu nolak umat-Na nu mimiti dipilih ku Anjeunna. Aranjeun teu apal kitu aya ayat nu nyaritakeun yén Élia ngadu ka Allah ngeunaan Israél? Ceuk manéhna,
3 ”Yéhuwa, maranéhna geus maéhan nabi-nabi Gusti. Maranéhna gé geus ngaruntuhkeun mézbah-mézbah Gusti. Tinggal abdi sorangan nu hirup kénéh. Ayeuna, maranéhna gé rék maéhan abdi.”
4 Tapi Allah ngajawabna kumaha? ”Kuring boga kénéh 7.000 urang anu henteu sujud ka Baal.”
5 Kitu ogé kiwari, aya kénéh anu nyésa, nu dipilih ku Allah lantaran welas asih-Na nu taya bandingna.*
6 Jadi, maranéhna dipilih téh ku lantaran welas asih Allah nu taya bandingna,* lain ku lantaran laku lampahna. Lamun maranéhna dipilih téh ku lantaran laku lampahna, éta mah lain welas asih nu taya bandingna.*
7 Jadi kumaha? Urang Israél teu meunangkeun naon nu dipikahayang ku maranéhna, nu meunangkeunana kalah ka jalma-jalma nu dipilih éta. Nu séjénna mah teuas haté,
8 sakumaha nu geus ditulis, ”Ku Allah, maranéhna disina saré tibra, panonna sina teu bisa nénjo, jeung ceulina sina teu bisa ngadéngé, nepi ka ayeuna.”
9 Daud ogé nyebutkeun kieu, ”Pésta-péstana* sing ngalantarankeun maranéhna kajiret, kajaring, titajong, jeung dihukum.
10 Panonna sina poék nepi ka teu bisa ningali, jeung tonggongna sing barengkung lantaran nanggung beban nu beurat.”
11 Jadi kuring rék nanya: Maranéhna labuh jeung titajong téh nepi ka teu bisa hudang deui, kitu? Henteu, lain kitu! Tapi ku lantaran maranéhna ngalanggar hukum, jalma-jalma ti bangsa séjén bisa disalametkeun, matakna maranéhna jadi sirik.
12 Lamun palanggaran maranéhna mawa berkah keur dunya, jeung jumlahna nu ngurangan mawa berkah keur jalma-jalma ti bangsa séjén, komo deui lamun jumlah maranéhna lengkep, berkahna tangtu leuwih loba deui!
13 Ayeuna kuring ngomong ka aranjeun, jalma-jalma ti bangsa séjén. Salaku rasul keur bangsa-bangsa séjén, kuring ngahargaan pisan* palayanan kuring.
14 Sugan kuring bisa mapanas bangsa sorangan sina sirik, ngarah aya nu bisa disalametkeun.
15 Allah nolak maranéhna, tapi éta ngalantarankeun dunya dirukunkeun jeung Allah. Tah, komo lamun maranéhna ditarima deui ku Allah, éta ibarat maranéhna geus maot terus dihirupkeun deui.
16 Lamun bagian adonan nu dianggap sabagé hasil mimiti téh suci, kabéh adonanana gé suci, jeung lamun akar ti hiji tangkal téh suci, dahan-dahanna ogé suci.
17 Tapi aya sababaraha dahan nu diteukteuk tina tangkal zaitun, terus aranjeun dicangkokkeun di antara dahan-dahan nu aya, sanajan aranjeun téh asalna tina tangkal zaitun liar. Ayeuna aranjeun meunang dahareun tina tangkal zaitun éta.
18 Aranjeun ulah ngarasa leuwih unggul ti* dahan-dahan nu diteukteuk éta. Lamun ngarasa leuwih unggul,* sing inget yén aranjeun teu méré dahar ka akar, tapi akar nu méré dahar ka aranjeun.
19 Meureun ceuk aranjeun, ”Dahan-dahan diteukteuk téh supaya urang bisa dicangkokkeun.”
20 Éta bener! Maranéhna diteukteuk téh pédah teu baroga iman, ari aranjeun tetep aya di dinya téh pédah boga iman. Tapi ulah aradigung, sabalikna sing ati-ati,
21 sabab lamun Allah teu lebar neukteuk dahan anu asli, komo deui ka aranjeun.
22 Perhatikeun sipat Allah nu bageur jeung tegas. Anjeunna tegas ka dahan-dahan anu murag. Tapi ari ka aranjeun mah Allah téh bageur, asal aranjeun terus ngalakukeun hal-hal nu dipikaresep ku Anjeunna. Lamun henteu, aranjeun gé bakal diteukteuk.
23 Tapi lamun maranéhna jadi boga iman, maranéhna bakal dicangkokkeun deui, da Allah mah sanggup ngalakukeunana.
24 Aranjeun, nu diteukteuk tina tangkal zaitun liar, bisa dicangkokkeun ka tangkal zaitun piaraan sanajan éta téh teu umum. Tangtu leuwih gampang lamun tangkal zaitun asli dicangkokkeun deui kana tangkalna!
25 Dulur-dulur, supaya aranjeun teu ngarasa diri bijaksana, kuring hayang aranjeun nyaho rasiah suci ieu: Sabagian urang Israél bakal teuas haté, nepi ka jalma-jalma nu dikumpulkeun ti bangsa séjén jumlahna lengkep.
26 Ku cara kitu, sakabéh Israél bakal disalametkeun, sakumaha aya ayat nu nyebutkeun, ”Ti Zion bakal kaluar Jurusalamet anu bakal ngalantarankeun turunan Yakub ninggalkeun laku lampahna nu jahat.
27 Waktu Kuring nyingkirkeun dosa-dosa maranéhna, Kuring bakal nyieun perjangjian jeung maranéhna.”
28 Mémang, ku sabab nolak warta hadé, maranéhna jadi musuh Allah. Nu meunang mangpaat téh aranjeun. Tapi demi jangji Allah ka karuhun maranéhna, maranéhna dipilih jeung dipikanyaah.
29 Sabab Allah mah moal kaduhung geus méré kurnia éta jeung geus milih jalma-jalma éta.
30 Aranjeun nu baheulana teu taat ka Allah, ayeuna geus dipikawelas lantaran maranéhna teu taat.
31 Jadi, aranjeun dipikawelas téh lantaran maranéhna teu taat. Ku kituna, maranéhna gé ayeuna bisa dipikawelas.
32 Kabéh jalma teu taat jeung ku Allah dikerem dina kaayaan siga kitu, supaya Anjeunna bisa mikawelas kabéhanana.
33 Kacida lobana berkah ti Allah, jeung kacida jerona kabijaksanaan* sarta pangaweruh-Na. Moal aya nu bisa bener-bener ngarti kana putusan-putusana-Na, jeung moal aya nu bisa bener-bener nyaho kana jalan-jalan-Na!
34 Sabab ”saha anu bisa ngarti kana pikiran Yéhuwa, atawa saha anu bisa mapatahan Anjeunna?”
35 Atawa, ”saha nu geus méré ka Allah, nepi ka Allah kudu méré deui ka manéhna?”
36 Sabab sagalana téh ti Anjeunna, ku Anjeunna, sarta keur Anjeunna. Anjeunna layak dimulyakeun salalanggengna. Amin.
Catetan Tambihan
^ As. ”binih”.
^ Tingali Daptar Istilah.
^ Tingali Daptar Istilah.
^ Tingali Daptar Istilah.
^ As. ”Méjana”.
^ As. ”ngamulyakeun”.
^ Atawa ”ngagulkeun diri ka”.
^ Atawa ”ngagulkeun diri”.
^ Atawa ”hikmat”.
