Yosua 16:1-10
16 Sanggeus diundi,* tanah keur turunan Yusuf téh nyaéta ti Walungan Yordan di Yérikho nepi ka sumber cai di wétaneun Yérikho, ti dinya ngaliwatan gurun keusik naék ka daérah pagunungan di Bétel.
2 Ti Bétel di deukeut Luz, watesna terus ka wates daérah urang Arkhi di Atarot,
3 geus kitu turun ka beulah kulon ka wates daérah urang Yaflét nepi ka wates Bét-horon Handap jeung Gézér, tuluy bras ka laut.
4 Jadi turunan Yusuf, nyaéta Manasyé jeung Éfraim, nempatan tanahna masing-masing.
5 Wates daérah kulawarga-kulawarga ti turunan Éfraim téh ieu: Di beulah wétan, wates tanah warisan maranéhna téh Atarot-adar nepi ka Bét-horon Luhur,
6 tuluy bras ka laut. Ti Mikhmétat nu aya di kalér, watesna méngkol ka wétan ka Taanat-syilo, terus ka Yanoa.
7 Ti Yanoa, watesna turun ka Atarot jeung Naara nepi ka Yérikho, terus ka Walungan Yordan.
8 Ti Tapua, watesna terus ka kulon ka Lebak* Kanah, jeung bras ka laut. Éta tanah warisan keur kulawarga-kulawarga ti kaom Éfraim.
9 Turunan Éfraim gé boga sababaraha kota jeung désa di tanah warisanana kaom Manasyé.
10 Tapi urang Kanaan nu matuh di Gézér teu diusir, jadi maranéhna terus matuh bareng jeung urang Éfraim nepi ka ayeuna jeung dititah gawé paksa.
