Yosua 20:1-9
-
Kota-kota panyalindungan (1-9)
20 Tuluy Yéhuwa ngomong ka Yosua,
2 ”Béjaan urang Israél, ’Sok geura tangtukeun kota-kota panyalindungan nu pernah diomongkeun ku Kuring ka maranéh ku perantaraan Musa.
3 Éta téh supaya jalma nu teu ngahaja* maéhan bisa kabur ka dinya. Kota-kota éta bakal jadi panyalindungan ti jalma nu boga hak ngabales.
4 Manéhna kudu kabur ka salah sahiji kota-kota éta jeung nangtung di lawang gerbang kota, tuluy nyaritakeun masalahna ka para kokolot kota éta. Para kokolot kudu narima jeung méré tempat panyicingan keur manéhna di kota éta.
5 Lamun manéhna disusul ku jalma nu boga hak ngabales, manéhna ulah diserahkeun, lantaran manéhna maéhan téh teu dihaja,* lain ku lantaran ngéwa.
6 Manéhna kudu cicing di kota éta nepi ka diadilan di hareupeun jamaah, tuluy tetep cicing di dinya nepi ka maotna imam agung nu aya harita. Mun imam agung geus maot, kakara jalma nu maéhan éta meunang balik ka imahna di kota asalna.’”
7 Seug kota-kotana ditangtukeun:* Kédés di Galiléa di daérah pagunungan Naftali, Syikhém di daérah pagunungan Éfraim, jeung Kiriat-arba, nyaéta Hébron di daérah pagunungan Yéhuda.
8 Di daérah Walungan Yordan, di wétaneun Yérikho, kota-kota nu ditangtukeun téh Bézér nu aya di gurun keusik di dataran luhur daérah kaom Rubén, Ramot di Giléad di daérah kaom Gad, jeung Golan di Basyan di daérah kaom Manasyé.
9 Kota-kota éta ditangtukeun keur kabéh urang Israél sarta urang asing nu cicing bareng jeung maranéhna, supaya saha waé nu teu ngahaja maéhan bisa kabur ka dinya. Jadi saacan diadilan di hareupeun jamaah, manéhna moal dipaéhan ku jalma nu boga hak ngabales.
