1. Sanggeus diajar buku ieu, bisa waé Sadérék boga pamikiran naon?

DINA buku ieu, Sadérék geus diajar loba bebeneran tina Kitab Suci. Misalna, jangji Allah ngeunaan hirup langgeng, kaayaan nu maot, jeung harepan pihudangeunana nu maot. (Pandita 9:5; Lukas 23:43; Yohanes 5:28, 29; Wahyu 21:3, 4) Bisa jadi Sadérék geus datang ka pasamoan Saksi-Saksi Yéhuwa jeung yakin yén maranéhna ngajalankeun ibadah nu sajati. (Yohanes 13:35) Sadérék ogé bisa jadi geus ngawangun sosobatan jeung Yéhuwa, malahan mah geus mutuskeun hayang  ngabakti ka Mantenna. Bisa waé Sadérék boga pamikiran, ’Naon nu kudu kuring lakukeun ayeuna pikeun ngabakti ka Allah?’

2. Naon sababna lalaki Étiopia éta hayang dibaptis?

² Éta nu dipikirkeun ku lalaki Étiopia nu hirup di jaman Yésus. Sababaraha waktu sanggeus Yésus dihirupkeun deui, murid Yésus nu ngaranna Pilipus ngawawar ka lalaki éta. Pilipus ngabuktikeun yén Yésus téh Mésias. Lalaki Étiopia éta kageuing haténa terus ngomong, ’Kaleresan aya cai, kumaha upami sim kuring dibaptis?’​—Rasul 8:26-36.

3. (a) Naon nu diparéntahkeun ku Yésus ka murid-muridna? (b) Kumaha baptisan dilakukeun?

³ Kitab Suci ngajarkeun lamun Sadérék hayang nyembah Yéhuwa, Sadérék kudu dibaptis. Yésus maréntahkeun murid-muridna, ’Ku sabab eta datangan jalma-jalma saalam dunya jaradikeun murid Kami, baptis maranehna.’ (Mateus 28:19) Yésus méré conto ku cara dibaptis. Anjeunna diteuleumkeun kana cai, teu ngan saukur mastakana nu diképrétan ku cai. (Mateus 3:16) Ayeuna lamun urang Kristen dibaptis, manéhna ogé kudu diteuleumkeun kana cai.

4. Naon nu ditémbongkeun ku baptisan Sadérék?

⁴ Lamun Sadérék dibaptis, éta némbongkeun ka batur yén Sadérék hayang jadi sobat Allah jeung nyembah ka Mantenna. (Jabur 40:8, 9) Bisa waé Sadérék nanya ka diri sorangan, ’Kuring kudu kumaha supaya bisa dibaptis?’

5. (a) Naon nu kudu dilakukeun ku Sadérék saacanna dibaptis? (b) Naon sababna pasamoan Kristen téh penting?

⁵ Saacanna dibaptis, Sadérék kudu kenal ka Yéhuwa jeung Yésus. Éta geus dilakukeun waktu Sadérék diajar  Kitab Suci. (Baca Yohanes 17:3.) Tapi, éta téh teu cukup. Kitab Suci méré nyaho yén Sadérék kudu ”ngarti enya-enya” kana kahoyong Yéhuwa. (Kolosa 1:9) Pasamoan Saksi-Saksi Yéhuwa bakal ngabantu Sadérék ngaraket ka Yéhuwa. Éta alesanana ku naon Sadérék perlu rutin datang ka pasamoan.​—Ibrani 10:24, 25.

6. Saacanna dibaptis, Sadérék kudu diajar naon?

⁶ Tangtu Yéhuwa teu miharep Sadérék nyaho kabéh eusi Kitab Suci saacanna dibaptis. Yéhuwa gé teu miharep lalaki Étiopia éta nyaho sagalana saacan manéhna dibaptis. (Rasul 8:30, 31) Urang ogé engkéna bakal terus diajar ngeunaan Allah pikeun salawasna. (Pandita 3:11, NW) Tapi saacanna dibaptis, Sadérék kudu diajar sarta narima pangajaran-pangajaran dasar nu aya dina Kitab Suci.​—Ibrani 5:12.

7. Naon mangpaatna diajar Kitab Suci pikeun Sadérék?

⁷ Ceuk Kitab Suci, ”Taya saurang-urang acan jelema anu dipikaseneng ku Allah teu karana kapercayaanana.” (Ibrani 11:6) Jadi, Sadérék kudu boga iman heula saacanna dibaptis. Kitab Suci nyaritakeun ngeunaan jalma-jalma di kota Korinta kuno nu ngadéngé pangajaran ti murid-murid Yésus. Hasilna maranéhna ”palercaya, terus kabeh dibaptis”. (Rasul 18:8) Kitu ogé, diajar Kitab Suci ngabantu Sadérék boga iman kana jangji-jangji Allah sarta kana korban Yésus nu bisa nyalametkeun urang tina dosa jeung maot.​—Yosua 23:14; Rasul 4:12; 2 Timoteus 3:16, 17.

8. Naon sababna Sadérék hayang nyaritakeun bebeneran Kitab Suci ka batur?

⁸ Beuki loba Sadérék diajar Kitab Suci jeung ngarasakeun mangpaatna, iman Sadérék bakal leuwih kuat.  Sadérék ogé bakal hayang nyaritakeunana ka batur. (Yermia 20:9; 2 Korinta 4:13) Rék ka saha nyaritakeunana?

9, 10. (a) Ka saha mimitina Sadérék bisa nyaritakeun bebeneran Kitab Suci? (b) Naon nu kudu dilakukeun lamun Sadérék hayang milu ngawawar jeung sidang?

⁹ Sadérék tangtu hayang nyaritakeunana ka kulawarga, babaturan, tatangga, atawa batur gawé. Éta téh alus, tapi carana kudu soméah jeung bijaksana. Dina waktuna, Sadérék bakal milu ngawawar jeung sidang. Béré nyaho Saksi nu ngajarkeun Kitab Suci ka Sadérék yén Sadérék geus siap sarta hayang milu ngawawar jeung sidang. Lamun manéhna ngarasa Sadérék geus siap jeung geus ngajalankeun prinsip-prinsip Kitab Suci dina kahirupan, bakal aya dua kokolot sidang nu babarengan ngabahas hal éta jeung Sadérék.

¹⁰ Naon waé nu bakal dibahas? Maranéhna hayang mastikeun naha Saderék ngarti jeung percaya kana pangajaran dasar Kitab Suci, naha Sadérék geus ngajalankeun prinsip-prinsip Kitab Suci, sarta naha Sadérék bener-bener hayang jadi Saksi Yéhuwa. Para kokolot téh merhatikeun unggal anggota sidang, kaasup ka Sadérék. Jadi, ulah sieun nyarita ka maranéhna. (Rasul 20:28; 1 Petrus 5:2, 3) Sanggeus ngabahas jeung Sadérék, kokolot bakal ngabéjaan lamun Sadérék bisa milu ngawawar jeung sidang.

11. Naon sababna nyieun parobahan saacanna milu ngawawar jeung sidang téh penting?

¹¹ Bisa waé kokolot sidang ngabéjaan lamun Sadérék masih perlu nyieun parobahan dina kahirupan. Ku naon urang perlu nyieun parobahan saacan milu ngawawar jeung sidang? Sabab waktu urang nyaritakeun  bebeneran ngeunaan Allah, urang keur ngawakilan Yéhuwa, jadi hirup urang kudu ngamulyakeun Mantenna.​—1 Korinta 6:9, 10; Galata 5:19-21.

12. Naon sababna sakabéh jalma kudu tarobat?

¹² Naon deui nu kudu dilakukeun ku Sadérék saacanna dibaptis? Ceuk rasul Pétrus, ”Tarobat, kudu marulang deui ka Allah sangkan ku Mantenna dihampura.” (Rasul 3:19) Naon hartina tobat? Éta hartina Sadérék ngarasa kaduhung kana kasalahan Sadérék. Contona, lamun Sadérék resep kana pornografi atawa salingkuh, Sadérék perlu tobat. Malahan mah sanajan Sadérék geus ngupayakeun jadi jalma bener gé, Sadérék masih kudu tobat lantaran urang kabéh boga dosa jeung butuh pangampura ti Allah.​—Rum 3:23; 5:12.

13. Naon hartina ’mulang deui ka Allah’?

¹³ Naha cukup ngan saukur ngarasa kaduhung? Henteu. Ceuk Pétrus, Sadérék kudu ’mulang deui ka Allah’. Éta hartina Sadérék kudu nolak sakabéh kabiasaan nu salah, terus ngalakukeun nu bener. Ibaratna Sadérék keur indit ka hiji tempat anyar. Teu lila, Sadérék sadar yén Sadérék téh salah jalan. Naon nu bakal Sadérék lakukeun? Pasti Sadérék bakal eureun, balik deui, terus nempuh jalan nu bener. Kitu ogé, waktu Sadérék diajar Kitab Suci, Sadérék bisa waé manggihan sababaraha kabiasaan nu kudu dirobah. Pék ’mulang deui ka Allah’ ku cara nyieun parobahan sarta ngalakukeun nu bener.

14. Kumaha carana Sadérék ngabaktikeun diri ka Yéhuwa?

¹⁴ Tahap penting séjénna nu kudu Sadérék lakukeun saacanna dibaptis nyaéta ngabaktikeun diri  ka Yéhuwa. Dina doa, Sadérék ngabaktikeun diri ka Yéhuwa, jangji ngan nyembah ka Mantenna jeung ngutamakeun kahoyong-Na dina kahirupan.​—Pamindo 6:15.

15, 16. Naon nu ngagerakkeun hiji jalma ngabaktikeun diri ka Allah?

¹⁵ Jangji ngan nyembah ka Yéhuwa wungkul bisa disaruakeun jeung jangji hirup bareng jeung jalma nu dipikacinta saumur hirup. Bayangkeun aya mojang jeung jajaka nu keur bobogohan. Beuki kenal éta jajaka ka éta mojang, beuki gedé cintana, terus hayang nikah jeung éta mojang. Sanajan éta téh putusan nu sérius, éta jajaka daék narima tanggung jawab lantaran cinta ka kabogohna.

¹⁶ Kitu ogé, beuki loba Sadérék diajar ngeunaan Yéhuwa, beuki nyaah Sadérék ka Mantenna sarta hayang méré nu panghadéna. Éta bakal ngagerakkeun Sadérék pikeun ngadoa, jangji nyembah ka Mantenna. Kitab Suci ngajelaskeun yén saha waé nu hayang jadi murid Yésus kudu ”poho kana kapentingan dirina sorangan”. (Markus 8:34) Naon hartina? Éta hartina taat ka Yéhuwa téh jadi hal nu pangpentingna dina kahirupan Sadérék. Kahoyong Yéhuwa leuwih penting ti batan kahayang sarta cita-cita Sadérék.​—Baca 1 Petrus 4:2.

17. Naon sababna sababaraha jalma teu ngabaktikeun diri ka Yéhuwa?

¹⁷ Sababaraha jalma teu ngabaktikeun diri ka Yéhuwa lantaran sieun jalir jangji ka Yéhuwa. Maranéhna sieun nguciwakeun Yéhuwa. Aya ogé nu boga alesan yén lamun teu ngabaktikeun diri, maranéhna teu kudu tanggung jawab ka Yéhuwa.

18. Naon nu bakal ngabantu Sadérék ngéléhkeun rasa sieun nguciwakeun Yéhuwa?

 ¹⁸ Kanyaah Sadérék ka Yéhuwa bakal ngabantu Sadérék ngéléhkeun rasa sieun nguciwakeun Mantenna. Lantaran nyaah ka Yéhuwa, Sadérék bakal ngupayakeun tigin kana jangji Sadérék. (Pandita 5:4; Kolosa 1:10) Sadérék ogé moal ngarasa yén ngalaksanakeun kahoyong Yéhuwa téh hésé. Rasul Yohanes ngajelaskeun, ”Tandana nyaah ka Allah teh nurut kana parentah Mantenna. Ari parentah-parentah-Na taya anu matak teu pikadugaeun urang.”​—1 Yohanes 5:3.

19. Naon sababna Sadérék teu perlu sieun ngabaktikeun diri?

¹⁹ Sadérék teu kudu sampurna lamun hayang ngabaktikeun diri ka Yéhuwa. Mantenna teu pernah miharep urang ngalakukeun hal nu teu sanggup urang lakukeun. (Jabur 103:14) Sabalikna, Mantenna bakal ngabantu Sadérék ngalakukeun nu bener. (Yesaya 41:10) Sing percaya ka Yéhuwa ku sagemblengna haté, ”tangtu Mantenna nuduhkeun jalan nu lempeng”.​—Siloka 3:5, 6.

20. Sanggeus Sadérék ngabaktikeun diri, naon tahap saterusna?

²⁰ Naha Sadérék geus siap ngabaktikeun diri ka Yéhuwa? Sanggeus Sadérék ngabaktikeun diri, Sadérék siap ka tahap saterusna, nyaéta dibaptis.

21, 22. Kumaha carana ”ngaku di hareupeun umum” ngeunaan iman Sadérék?

²¹ Lamun Sadérék geus ngabaktikeun diri ka Yéhuwa sarta hayang dibaptis, Sadérék bisa méré nyaho koordinator badan kokolot sidang. Terus sababaraha kokolot bakal ngabahas pangajaran dasar tina Kitab Suci jeung Sadérék. Lamun maranéhna ngarasa Sadérék geus siap,  maranéhna bakal méré nyaho yén Sadérék bisa dibaptis dina kongrés Saksi-Saksi Yéhuwa nu bakal diayakeun. Dina kongrés éta bakal aya caramah nu ngajelaskeun hartina baptisan. Terus nu rék dibaptis bakal dibéré dua pananya. Ku cara ngajawab  dua pananya éta, Sadérék ”ngaku di hareupeun umum” ngeunaan iman Sadérék.​—Mateus 10:32.

²² Sanggeusna, Sadérék bakal dibaptis. Sadérék bakal diteuleumkeun kana cai. Baptisan nunjukkeun ka jalma réa yén Sadérék geus ngabaktikeun diri ka Yéhuwa sarta geus jadi Saksi-Saksi Yéhuwa.

23. Naon hartina dibaptis ’kalawan nami Rama, Putra, jeung roh suci’?

²³ Yésus ngajelaskeun yén murid-muridna bakal dibaptis ’kalawan nami Rama, Putra, jeung roh suci’. (Baca Mateus 28:19.) Naon hartina? Éta hartina Sadérék percaya kana wewenang Yéhuwa. Sadérék ogé percaya kana kadudukan Yésus dina ngawujudna tujuan Allah. Sadérék ogé percaya yén roh suci téh digunakeun ku Yéhuwa pikeun ngalaksanakeun kahoyong-Na.​—Jabur 83:19; Mateus 28:18; Galata 5:22, 23; 2 Petrus 1:21.

24, 25. (a) Naon nu dilambangkeun ku baptisan? (b) Naon nu bakal dibahas dina pasal ahir ieu buku?

²⁴ Baptisan téh ngalambangkeun hal nu penting pisan. Waktu Sadérék diteuleumkeun kana cai, éta hartina Sadérék geus ninggalkeun kahirupan Sadérék nu heubeul. Terus waktu Sadérék kaluar tina cai, éta hartina Sadérék bakal ngamimitian hirup nu anyar pikeun ngalaksanakeun kahoyong Allah. Ti saprak éta, Sadérék ngabakti ka Yéhuwa. Sadérék perlu inget yén kahirupan Sadérék téh lain dibaktikeun ka manusa, organisasi, atawa pagawéan, tapi dibaktikeun ka Yéhuwa.

²⁵ Ngabaktikeun diri ka Yéhuwa bakal ngabantu Sadérék ngawangun sosobatan jeung Mantenna. (Jabur 25:14) Tapi, lamun geus dibaptis lain hartina urang pasti bakal salamet. Rasul Paulus ngingetan urang, ”Sing terus rarajin jeung sieun ku Allah supaya kasalametan aranjeun jadi sampurna.” (Pilipi 2:12) Baptisan téh karék awalna. Tapi, kumaha Sadérék bisa tetep raket jeung Yéhuwa? Pasal ahir ieu buku bakal ngabahas jawabanana.