Ceuk Nabi Isa, urang Kristen téh kudu dibaptis. (Baca Matius 28:19, 20.) Tapi, baptisan téh naon? Terus, naon nu kudu diupayakeun ku saurang jalma supaya bisa dibaptis?

1. Baptisan téh naon?

Kecap ”ngabaptis” téh asalna tina basa Yunani nu hartina ”neuleumkeun” kana cai. Waktu Nabi Isa dibaptis, manéhna diteuleumkeun di Walungan Yordan, terus ”kaluar tina cai”. (Markus 1:9, 10) Kitu ogé, waktu urang Kristen nu sajati dibaptis, sakabéh awakna téh diteuleumkeun kana cai.

2. Baptisan téh nunjukkeun naon?

Ku cara dibaptis, saurang jalma nunjukkeun yén manéhna geus ngabaktikeun diri ka Allah Yéhuwa. Kumaha carana ngabaktikeun diri? Saacan dibaptis, saurang jalma perlu ngadoa ka Yéhuwa sacara pribadi pikeun ngungkabkeun yén manéhna hayang ngalayanan Anjeunna salilana. Manéhna jangji pikeun ibadah ka Yéhuwa hungkul sarta ngutamakeun kahayang Allah dina kahirupanana. Manéhna moal ”nuturkeun kahayangna sorangan”, tapi bakal ”terus nuturkeun” tuladan jeung pangajaran Nabi Isa. (Matius 16:24) Ku cara ngabaktikeun diri sarta dibaptis, saurang jalma bisa nyobat jeung Allah Yéhuwa sarta dulur-dulur saiman.

3. Naon nu kudu diupayakeun ku saurang jalma supaya bisa dibaptis?

Supaya bisa dibaptis, anjeun kudu diajar ngeunaan Yéhuwa jeung boga iman ka Anjeunna. (Baca Ibrani 11:6.) Lamun pamahaman anjeun beuki loba jeung iman anjeun beuki kuat, anjeun pasti beuki nyaah ka Yéhuwa. Anjeun gé pasti hayang nyaritakeun ngeunaan Yéhuwa ka batur sarta nuturkeun patokan hirup ti Anjeunna. (2 Timotius 4:2; 1 Yahya 5:3) Lamun cara hirup saurang jalma geus ’dianggap layak ku Yéhuwa jeung bisa bener-bener nyenangkeun Anjeunna’, engké lila-lila manéhna bakal kajurung pikeun ngabaktikeun diri ka Allah jeung dibaptis.​—Kolose 1:9, 10. a

 HAYU NGULIK

4. Nu bisa dipiconto tina baptisan Nabi Isa

Baca Matius 3:13-17 pikeun ningali katerangan leuwih rinci ngeunaan baptisan Nabi Isa, terus bahas:

• Na Nabi Isa dibaptis pas manéhna orok kénéh?

• Kumaha cara manéhna dibaptis? Na ngan diképrét-képrét hungkul ku cai?

Sanggeus dibaptis, Nabi Isa ngajalankeun tugas nu istiméwa ti Allah. Baca Lukas 3:21-23 jeung Yahya 6:38, terus bahas:

• Sanggeus dibaptis, naon nu diutamakeun ku Nabi Isa?

5. Anjeun gé bisa dibaptis

Aya sababaraha jalma nu ngarasa moal sanggup pikeun ngabaktikeun diri jeung dibaptis. Tapi, lamun anjeun terus diajar ngeunaan Yéhuwa sarta beuki kenal ka Anjeunna, anjeun bakal beuki yakin pikeun ngabaktikeun diri jeung dibaptis. Setél VIDÉO pikeun ningali pangalaman ti sababaraha jalma.

Baca Yahya 17:3 jeung Yakobus 1:5, terus bahas:

• Naon nu perlu dilakukeun ku saurang jalma supaya siap pikeun dibaptis?

1. Urang ngabaktikeun diri ka Yéhuwa ku cara ngungkabkeun yén urang hayang ngalayanan Anjeunna salilana

2. Waktu dibaptis, urang téh nunjukkeun ka batur yén urang geus ngabaktikeun diri ka Yéhuwa

 6. Waktu urang dibaptis, urang téh jadi kulawargana Yéhuwa

Waktu dibaptis, urang téh jadi anggota ti kulawargana Yéhuwa nu aya di sakuliah dunya. Kabéh Saksi Yéhuwa nu dibaptis téh boga kapercayaan nu sarua. Maranéhna gé nuturkeun patokan hirup nu sarua, teu sual ti mana asal maranéhna atawa kumaha kahirupan maranéhna saacan diajar Alkitab. Baca Jabur 25:14 jeung 1 Pétrus 2:17, terus bahas:

• Sanggeus dibaptis, kumaha hubungan saurang jalma jeung Yéhuwa? Kumaha hubungan manéhna jeung jalma-jalma nu ibadah ka Anjeunna?

 INTI BAB

Ceuk Nabi Isa, urang Kristen téh kudu dibaptis. Supaya bisa dibaptis, saurang jalma kudu boga iman nu kuat ka Yéhuwa, nuturkeun patokan hirup ti Anjeunna, jeung ngabaktikeun diri ka Anjeunna.

Nu geus dibahas

• Baptisan téh naon, jeung ku naon éta penting?

• Baptisan téh nunjukkeun naon?

• Supaya bisa ngabaktikeun diri jeung dibaptis, naon nu kudu diupayakeun ku saurang jalma?