ALLAH mépélingan hamba-hamba-Na yén iman maranéhna bakal diuji. Firman-Na nyarios, ”Sing caringcing taki-taki, sabab Iblis musuh aranjeun keur guar-gaur kawas singa, kukulayaban neangan leglegeun.” (1 Petrus 5:8) Naon upaya Sétan pikeun ngancurkeun iman Sadérék?

Sétan bisa ngagunakeun saha waé, kaasup jalma nu dipikanyaah ku Sadérék, pikeun ngalarang Sadérék diajar Kitab Suci. Ngeunaan ieu hal, nabi Isa nganubuatkeun, ”Anu bakal jadi musuh pangbangetna teh nya anggota kulawargana keneh.” (Mateus 10:36) Bisa waé anggota kulawarga sarta babaturan nu boga itikad saé teu nyahoeun kana bebeneran-bebeneran nu aya dina Firman Allah. Atawa, maranéhna sieun jadi piomongeun batur. Tapi, Kitab Suci nyarios, ”Rempan ku pakarepan batur teh bahaya. Utamana mah kudu pasrah ka PANGERAN, tangtu salamet.” (Siloka 29:25) Upami Sadérék lirén diajar Kitab Suci demi nyenangkeun manusa, naha éta bakal nyenangkeun Allah? Tangtu moal! Sabalikna, upami urang némbongkeun iman nu sajati mah, Allah bakal nulungan urang. ”Sageuy urang kaasup anu undur jeung sasab. Urang mah kapan percaya, tangtu disalametkeun.”​—Ibrani 10:39.

Mangga diémut deui pangalaman Dumas, nu dicaritakeun sateuacanna. Mimitina mah, pamajikanana téh ngécé Dumas ku lantaran imanna. Tapi, ka dieunakeun pamajikanana milu diajar Firman Allah. Kitu ogé, upami Sadérék teras ngalampahkeun anu bener, Sadérék tiasa ngabantu réréncangan sarta jalmi nu dipikanyaah ku Sadérék pikeun ngalampahkeun hal nu sami. Loba conto ngabuktikeun yén anggota kulawarga nu tadina mikangéwa bisa percaya ”teu karana ucap pangajak, tapi lantaran kageuing ku laku lampah nu suci” sarta rasa ”hormat” nu ditémbongkeun ku jalma nu miboga iman nu sajati.​—1 Petrus 3:1, 2, Sunda Formal; Epesus 5:33.

Sétan ogé ngupayakeun sangkan jalma-jalma boga pamikiran yén maranéhna teu boga waktu pikeun diajar Kitab Suci. Manéhna resep lamun kabeungbeurat dina kahirupan saperti pasualan pribadi sarta kahariwangan kana duit nepi ka ’ngadéséh’ firman ti Allah, nu ngalantarankeun iman Sadérék ”teu nepi ka bijil hasilna”. (Markus 4:19) Tolak pamikiran saperti kitu! Kitab Suci nyarios, ”Dupi hirup langgeng teh nya eta: Terang ka Ama, Allah sajati anu mung hiji, sareng ka utusan Ama, [Isa Al-Masih].” (Yohanes 17:3) Ku sabab kitu, terus diajar  leuwih loba ngeunaan Allah sarta Isa, Sang Mésias, mutlak perlu pikeun nampa hirup langgeng di Pirdus!

Perhatikeun nabi Musa nu kungsi jadi anggota kulawarga karajaan Mesir. Manéhna bisa waé ngudag harta banda, kakawasaan, sarta jadi kasohor. Tapi, ”ti batan hirup dina kagenahan dosa anu umurna moal awet, Musa malah milih hirup sangsara babarengan jeung umat Allah”. Naon sababna? Manéhna ”lir anu geus ningali ka Allah nu sipat gaib”. (Ibrani 11:24, 25, 27) Éta hartina, Musa miboga iman anu kuat ka Allah. Manéhna leuwih ngutamakeun kapentingan Allah ti batan ngudag cita-cita nu mentingkeun diri. Hasilna, Allah ngaberkahan manéhna kalawan limpah. Upami Sadérék nyonto Musa, Allah ogé bakal ngaberkahan Sadérék.

Sétan bisa waé ngamangsa Sadérék ku rupa-rupa cara. Tapi, Sadérék ulah dugi ka janten korbanna. Firman Allah ngajurung urang, ”Iblis kudu dilawan, tangtu kabur ti aranjeun.” (Yakobus 4:7) Kumaha carana sangkan Sadérék tiasa ngalawan Sétan?

Terus diajar Kitab Suci. Baca Firman Allah unggal poé. Talungtik pangajaranana. Larapkeun naséhatna. Ku cara kitu, Sadérék bakal ’make pakarang perang ti Allah’, nu tiasa digunakeun ku Sadérék pikeun ngalawan panarajang ti Sétan.​—Epesus 6:13.

Campur gaul jeung jalma nu miboga iman nu sajati. Téangan jalma-jalma nu resep maca, nalungtik, sarta ngalarapkeun Kitab Suci. Maranéhna ”silih titenan, silih ajak nyieun kahadean jeung nembongkeun kanyaah, . . . silih gedekeun hate”. Maranéhna bakal ngabantu nguatkeun iman Sadérék.​—Ibrani 10:24, 25.

Ngaraket ka Yéhuwa. Ngadoa nyuhunkeun pitulung Allah, sarta percaya ka Mantenna. Sing émut yén Allah kersa nulungan Sadérék. ”Sagala kasusah unjukkeun ka Mantenna, sabab Mantenna anu ngurus aranjeun.” (1 Petrus 5:6, 7) ”Allah anu tigin kana jangji-Na, moal ngantep aranjeun meunang cocoba leuwih tina kakuatan. Satiap aranjeun meunang cocoba, ku Mantenna dipaparin kakuatan jeung jalan kaluarna.”​—1 Korinta 10:13.

Sétan ngalawan Allah, manéhna ngomong yén moal aya saurang-urang acan nu bakal terus kumawula ka Mantenna lamun kudu ngalaman kasangsaraan. Tapi, Sadérék kagungan kasempetan pikeun ngabuktikeun yén Sétan téh tukang bohong! ”Sing bijaksana anaking,” saur Allah, ”sangkan Bapa senang, jeung sangkan Bapa bisa ngajawab ka anu nyela ka Bapa.” (Siloka 27:11) Pengkuhkeun tékad Sadérék pikeun némbongkeun yén Sadérék kagungan iman nu sajati!