Janten sobat Allah téh mangrupikeun hal panghadéna dina kahirupan Sadérék. Allah bakal ngawulang Sadérék carana hirup bagja tur ayem tengtrem; Mantenna bakal ngabébaskeun Sadérék ti seueur ageman anu kaliru sarta laku lampah nu picilakaeun. Mantenna ngadangukeun doa-doa Sadérék. Mantenna bakal ngabantu Sadérék sangkan ngaraos reugreug sarta percaya diri. (Jabur 71:5; 73:28) Allah bakal ngaraksa ogé ngarojong Sadérék waktu aya kasusah. (Jabur 18:19) Sarta, Allah seja maparin kurnia hirup langgeng pikeun Sadérék.​—Rum 6:23.

Sawaktu Sadérék ngaraket ka Allah, Sadérék ogé nuju ngaraket ka sobat-sobat Allah. Aranjeunna ogé bakal janten sobat Sadérék. Malahan, aranjeunna bakal janten sapertos anggota kulawarga Sadérék. Aranjeunna kersa ngajar Sadérék ngeunaan Allah sarta bakal ngabantu ogé masihan pangrojong moril pikeun Sadérék.

Urang henteu sadarajat sareng Allah. Waktu Sadérék ngupayakeun ngajalin sosobatan sareng Allah, aya hiji hal penting nu Sadérék kedah paham. Sosobatan sareng Allah téh lain sosobatan di antara manusa nu sadarajat. Mantenna langkung sepuh, langkung luhung hikmat-Na, sarta langkung kiat tibatan urang. Mantenna téh Pangawasa urang nu daulat. Ku margi kitu, upami urang hoyong janten sobat-Na, urang kedah ngaregepkeun Mantenna sarta ngalampahkeun pamundut-Na. Ieu salawasna pikeun mangpaat urang.​—Yesaya 48:18.