Yéhuwa moal bakal ngantep jalma jahat ngaruksak Pirdus. Mung sobat-sobat-Na nu bakal hirup di dinya. Naon anu bakal kaalaman ku jalma-jalma nu jarahat? Sangkan terang jawabanana, mangga perhatikeun kisah hirup nabi Enoh atanapi Nuh. Nabi Enoh hirup rébuan taun kaliwat. Manéhna lalaki soléh nu enya-enya ngalampahkeun kapalay Yéhuwa. Namung, jalma-jalma lianna di bumi ngalampahkeun hal-hal nu goréng. Jadi, Yéhuwa masihan terang ka Enoh yén Mantenna bakal ngadatangkeun caah gedé pikeun ngabasmi sadaya nu jarahat. Mantenna miwarang Enoh sangkan ngawangun hiji bahtera, nyaéta kapal ageung nu wangunna siga peti, supaya manéhna tur kulawargana bisa salamet waktu caah gedé datang.​—Kajadian 6:9-18.

Enoh jeung kulawargana ngawangun bahtera. Enoh ngabéjaan jalma-jalma yén bakal aya caah gedé, namung maranéhna teu ngagugu. Maranéhna tetep ngalakonan hal-hal nu goréng. Saréngséna éta bahtera, Enoh ngasupkeun sasatoan, terus manéhna sarta kulawargana ogé arasup. Geus kitu, Yéhuwa ngadatangkeun hujan ngagebrét dibarengan angin ngagelebug jeung dor dar gelap. Hujan turun  salila 40 poé 40 peuting. Sakuliah bumi kakeueum ku cai.​—Kajadian 7:7-12.

Jalma-jalma nu jarahat kaleungitan nyawa, tapi Enoh jeung kulawargana disalametkeun. Yéhuwa nyalametkeun maranéhna tina caah gedé, sarta maranéhna hirup di bumi nu geus beresih tina kajahatan. (Kajadian 7:22, 23) Alkitab nyebutkeun yén lamun geus waktuna, Yéhuwa sakali deui bakal ngabasmi jalma-jalma nu henteu daék ngalampahkeun anu bener. Jalma-jalma nu soléh moal dibasmi. Maranéhna bakal hirup langgeng di bumi Pirdus.​—2 Petrus 2:5, 6, 9.

Kiwari, loba jalma ngalakonan hal-hal nu goréng. Ieu dunya pinuh ku masalah. Yéhuwa teterusan ngutus Saksi-Saksi-Na pikeun ngabéjaan jalma-jalma, namung lolobana henteu daék ngadéngékeun pirman Yéhuwa. Maranéhna teu daék barobah. Maranéhna teu daék narima papakon Allah ngeunaan nu bener jeung nu salah. Naon anu bakal kaalaman ku jalma-jalma ieu? Naha maranéhna bakal barobah? Loba nu moal bakal barobah. Bakal datang waktuna, jalma-jalma nu jarahat dibasmi sarta moal pernah hirup deui.​—Jabur 92:8.

Bumi moal diancurkeun; tapi bakal dijieun jadi pirdus. Jalma-jalma nu jaradi sobat Yéhuwa bakal hirup langgeng di bumi Pirdus.​—Jabur 37:29.