Sosobatan dumasarna kana kanyaah. Langkung seueur Sadérék diajar ngeunaan Yéhuwa, Sadérék langkung mikaasih Mantenna. Sarta saterasna Sadérék bakal langkung palay ngawulaan Mantenna. Ieu bakal ngagerakkeun Sadérék sangkan janten murid Yésus Kristus. (Mateus 28:19) Ku cara ngagabung jeung kulawarga Saksi-Saksi Yéhuwa nu bagja, Sadérék tiasa ngajalin sosobatan sareng Allah pikeun salalawasna. Naon nu kedah dilampahkeun ku Sadérék?

Sadérék kedah némbongkeun asih Sadérék ka Allah ku cara tumut kana hukum-hukum-Na. ”Tandana nyaah ka Allah teh nurut kana parentah Mantenna. Ari parentah-parentah-Na taya anu matak teu pikadugaeun urang.”​—1 Yohanes 5:3.

Lampahkeun naon anu parantos diwulangkeun ka Sadérék. Yésus nyaritakeun hiji kisah nu ngagambarkeun ieu hal. Hiji priya nu wijaksana ngawangun imahna dina luhur batu. Hiji priya nu bodo ngawangun imahna dina luhur keusik. Sawaktu aya hujan gedé jeung caah, imah nu diwangunna dina luhur batu mah tetep ajeg henteu rugrug, namung imah nu diwangun dina luhur keusik mah runtuh tur kacida ruksakna. Yésus nyarioskeun yén jalma-jalma nu ngaregepkeun piwulangna sarta ngalampahkeunana saperti priya nu wijaksana nu ngawangun imahna dina luhureun batu. Tapi, jalma-jalma nu ngadéngékeun piwulangna sarta henteu ngalampahkeunana saperti priya nu bodo nu ngawangun imahna dina luhureun keusik. Sadérék palay janten priya anu mana?​—Mateus 7:24-27.

 Pangabdian. Ieu maksadna Sadérék kedah ngadoa ka Yéhuwa sarta carioskeun yén Sadérék palay ngalampahkeun kahoyong-Na pikeun salalanggengna. Ngalampahkeun kahoyong Allah némbongkeun yén Sadérék téh muridna Yésus Kristus.​—Mateus 11:29.

Baptisan. ”Mangga ayeuna urang baptis, . . . Geura sasambat ka pajenengan Gusti, nyuhunkeun dihapunten sagala dosa.”​—Rasul 22:16.

Ngupayakeun diri ngawula ka Allah sagemblengna. ”Ngalampahkeun parentah . . . kudu enya-enya, lir gawe keur Gusti lain keur jelema.”​—Kolosa 3:23.