Saksi-Saksi Yéhuwa téh nyaah ka dulur-dulur saimanna. (1 Pétrus 2:17) Loba di antara urang ngarasakeun naon anu dirasakeun ku Tannis, saurang sadérék istri ti Kenya. Ceuk manéhna, ”Abdi hayang nyaho kumaha kaayaan dulur-dulur saiman di sakuliah dunya.” Nah, kumaha Tannis jeung jutaan Saksi séjénna meunangkeun informasi ngeunaan dulur-dulur saiman? Ti taun 2013, aya bagian Kumpulan Berita dina situs Internét urang, jw.org.

 Dina bagian Kumpulan Berita, aya laporan-laporan nu bisa dipercaya ngeunaan Saksi-Saksi Yéhuwa, misalna ngeunaan dipedalkeunana Alkitab, bantuan keur dulur saiman anu keuna ku musibat alam, proyék pangwangunan, jeung kajadian-kajadian penting séjénna. Terus, aya ogé berita ngeunaan dulur-dulur saiman urang anu dipanjara ku lantaran ngabéla iman. Salian ti éta, urang gé bisa maca pangalaman-pangalaman anu nguatkeun iman, saperti kagiatan husus pikeun ngawawar sarta acara Pangéling-ngéling. Tapi, saha anu nyieun artikel-artikel ieu, jeung kumaha cara maranéhna digawé?

 Bagian Kumpulan Berita téh diurus ku Kantor Humas Pusat. Departemén ieu aya di kantor pusat jeung diawaskeun ku Panitia Koordinator ti Badan Pingpinan. Aya leuwih ti 100 sadérék anu digawé di Kantor Humas Pusat, kalolobaanana mah sukarélawan jarak jauh. Aya anu tugasna nulis artikel, ngarisét, ngagambar, atawa jadi panarjamah. Aya ogé anu tugasna téh ngontak para pajabat pamaréntah, para ahli dina widang pendidikan, jeung kantor-kantor berita. Kantor Humas Pusat téh dibantuan ku leuwih ti 80 Bagian Humas anu aya di kantor-kantor cabang di sakuliah dunya.

 Kantor Humas Pusat digawé bareng jeung Bagian Humas pikeun nyieun berita. Sanggeus topik beritana ditangtukeun, sadérék-sadérék bakal ngarisét jeung ngumpulkeun informasi nu bisa dipercaya ngeunaan hal éta, misalna ku cara ngawawancara para ahli. Sanggeus kabéh informasi kakumpulkeun, artikelna bakal ditulis, diédit, dipariksa deui, dibéré gambar, jeung dikirim ka Panitia Koordinator. Engké maranéhna nu bakal mutuskeun, artikelna bisa dipedalkeun atawa henteu.

 Kumaha parasaan dulur-dulur saiman ngeunaan bagian Kumpulan Berita? Cheryl, saurang sadérék istri di Filipina, ngomong, ”Unggal isuk, abdi resep pisan maca berita ngeunaan organisasi Yéhuwa jeung dulur-dulur saiman.”

 Loba anu méré koméntar ngeunaan bédana berita dina jw.org jeung berita-berita séjén di luar. Misalna, Tatiana ti Kazakstan ngomong kieu, ”Abdi ngahargaan pisan berita-berita dina jw.org. Beritana téh bisa dipercaya jeung teu mihak.” Terus, saurang sadérék istri di Meksiko anu ngaranna Alma ngomong, ”Berita-berita di luar mah seringna berita goréng. Ari dina Kumpulan Berita mah loba berita anu nguatkeun.”

 Berita-berita anu aya dina bagian Kumpulan Berita téh teu ngan saukur bisa dipercaya, tapi ogé bisa nguatkeun iman urang. Bernard ti Kenya ngomong, ”Ku ayana bagian Kumpulan Berita, abdi jadi leuwih bisa nganggap dulur-dulur saiman di sakuliah dunya sabagé kulawarga sorangan, teu sual ti mana nagri asal maranéhna. Abdi gé jadi bisa nyebutkeun ngaran maranéhna dina doa jeung ngadoakeun masalah-masalah anu keur disanghareupan ku maranéhna.” Saurang sadérék istri ti Kenya anu ngaranna Bybron ngomong, ”Abdi bungah mun maca berita ngeunaan dipedalkeunana Alkitab dina basa-basa séjén! Berita-berita siga kitu téh ngingetan abdi yén Yéhuwa teu ngabéda-bédakeun jalma.”

 Berita ngeunaan dulur-dulur saiman urang anu dikaniaya gé bisa mawa pangaruh nu positif keur urang. Ceuk Jackline ti Kenya, ”Mikirkeun kawani ti dulur-dulur saiman téh nguatkeun iman abdi. Abdi osok hayang nyaho naon anu ngabantu maranéhna tetep teger. Abdi diajar yén hal-hal nu dianggap saderhana saperti ngadoa, maca Alkitab, jeung nyanyi téh bisa nguatkeun maranéhna.”

 Saurang sadérék istri ti Kosta Rika nu ngaranna Beatriz ngahargaan pisan berita ngeunaan dulur-dulur saiman anu keuna musibat alam. Ceuk manéhna, ”Abdi jadi bisa ningali yén organisasi Yéhuwa téh meni gancang dina minuhan kabutuhan dulur-dulur saiman urang. Maranéhna nyadiakeun kabutuhan keur dulur-dulur saiman ku cara anu pinuh ku kanyaah. Abdi jadi yakin, ieu téh mémang bener-bener organisasi Yéhuwa.”

 Urang sadaya pasti nganuhunkeun pisan lantaran urang jadi bisa nyaho kaayaan dulur-dulur saiman urang di sakuliah dunya. Berita-berita siga kieu téh bisa aya lantaran loba sadérék nyumbang pikeun pagawéan sakuliah dunya liwat donate.pr418.com. Hatur nuhun pisan kana kamurahan haté Sadérék!