•   ”Tiongkok ngalaporkeun yén usum halodo taun ieu téh nu pangpanasna, sarta ieu gé nu panggaringna katilu nu pernah dicatet.”​—The Guardian, 7 Séptémber 2022.

•   ”Dina lima taun ka hareup, sabagian ti wilayah Afrika bakal ngalaman halodo panjang nu parah pisan.”​—UN News, 26 Agustus 2022.

•   ”Bisa jadi leuwih ti satengah wilayah di Éropa bakal ngalaman usum halodo nu parah pisan, katingalina bakal jadi nu pangparahna salila 500 taun ieu.”​—BBC News, 23 Agustus 2022.

 Loba ahli nyebutkeun yén usum halodo bakal beuki parah. Aya harepan teu keur urang ka hareupna? Kumaha ceuk Alkitab?

 Ieu nu geus disebutkeun dina Alkitab ngeunaan jaman ayeuna:

•   ”Di mana-mana bakal aya kalaparan.”​—Lukas 21:11.

 Halodo panjang téh nyababkeun kakurangan dahareun, tuluy kakurangan dahareun nyababkeun jalma-jalma jadi sangsara jeung maot. Éta téh cocog jeung nu geus disebutkeun dina Alkitab.​—Wahyu 6:6, 8.

 Alkitab ngajelaskeun ku naon halodo téh bakal beuki parah. Alkitab nyebutkeun:

•   ”Manusa mah . . . teu kawasa nangtoskeun hirupna.”​—Yermia 10:23.

 Hartina manusa teu bisa nangtukeun hirupna, atawa sok salah nangtukeun léngkahna. Ku sabab kitu, manusa sok nyieun putusan nu salah nu nyababkeun halodo panjang jeung kakurangan cai.

•   Kalolobaan ilmuwan satuju yén pemanasan global téh disababkeun ku tindakan manusa. Ku kituna, halodo panjang jadi aya di mana-mana.

•   Jalma nu sarakah jeung tara mikir panjang osok nyieun aturan nu nyababkeun karuksakan leuweung jeung polusi. Maranéhna gé osok ngahambur-hamburkeun sumber daya alam. Tungtungna, éta bisa nyababkeun kakurangan cai.

 Najan kitu, aya harepan nu dicatet dina Alkitab.

 Dina Alkitab aya jangji yén Allah bakal ngaréngsékeun masalah kakurangan cai dina mangsa ka hareup. Kumaha carana?

1.  1. Allah bakal ”ngabinasakeun jalma-jalma nu keur ngaruksak bumi”. (Wahyu 11:18) Anjeunna bakal nyingkirkeun inti masalahna, nyaéta jalma-jalma sarakah jeung jahat nu ngaruksak lingkungan.​—2 Timotius 3:1, 2.

2.  2. ”Keusik anu semu hurung bakal jadi talaga.” (Yesaya 35:1, 6, 7) Allah bakal mupus sagala karuksakan nu disababkeun ku halodo panjang sarta ngarobah bumi jadi pirdaus nu limpah ku cai.

3.  3. ”Tanah teh ku Gusti diriksa, . . . disina subur makmur.” (Jabur 65:10) Allah bakal ngaberkahan bumi ku loba dahareun jeung cai bersih keur kabéh jalma.