Di daérah anjeun, pernah teu aya cuaca ékstrim nu ngaruksak lingkungan? Misalna, topan atawa angin ribut bisa nyababkeun banjir. Hujan nu gedé bisa nyababkeun longsor. Salian ti éta, mun loba kilat, leuweung gé bisa kahuruan. Terus, usum halodo nu panjang sarta hawa panas atawa hawa tiis nu ékstrim gé bisa nyababkeun rupa-rupa musibat.

 Loba daérah beuki sering ngalaman cuaca ékstrim. Ku kituna, musibat alam gé jadi beuki sering kajadian. Terus, musibatna téh beuki parah. International Federation of Red Cross and Red Crescent Societies ngalaporkeun, ”Beuki ka dieu beuki sering banjir, angin ribut, jeung usum halodo nu panjang. Balukarna, beuki loba jalma nu jadi korban musibat alam. Jalma-jalma maot, terus aya ogé nu jadi teu bisa néangan napkah. Jutaan jalma kaleungitan imahna.”

 Jalma-jalma nu jadi korban musibat alam bisa ngarasa trauma lantaran kaleungitan harta bandana, imahna, jeung kulawarga atawa babaturanana.

 Kitab Suci bisa ngabantu anjeun tabah mun anjeun pernah jadi korban musibat alam. Dina Kitab Suci, aya kekecapan nu bisa ngalilipur jeung méré harepan. Terus, aya ogé naséhat-naséhat nu geus kabukti bisa ngabantu jalma-jalma nu pernah ngalaman musibat alam. (Roma 15:4) Kitab Suci ogé bisa ngajawab pananya penting ieu: Ku naon Allah ngantep musibat alam ieu? Ieu téh hukuman keur abdi kitu?

 Bener kitu musibat alam nu kaalaman ku urang téh hukuman ti Allah? Kitab Suci ngayakinkeun urang yén ”Allah mah moal beunang didoja ku nu jahat jeung tara méré cocoba ka saha waé”. (Yakobus 1:13) Jadi mun ayeuna urang ngalaman musibat alam, éta téh lain hukuman ti Allah.

 Mémang, dina jaman baheula Allah sababaraha kali ngagunakeun musibat alam pikeun ngahukum jalma-jalma nu jahat. Contona, dina jaman Nuh, Allah ngahukum jalma-jalma nu jahat ku Caah Gedé. Tapi, harita Anjeunna méré paringetan heula saacan ngadatangkeun Caah Gedé, ngajelaskeun ku naon Anjeunna bet ngadatangkeun Caah Gedé, sarta nyalametkeun Nuh jeung kulawargana tina Caah Gedé. (Kajadian 6:13; 2 Pétrus 2:5) Ari musibat alam dina jaman ayeuna mah béda pisan. Datangna téh teu kasangka-sangka, euweuh paringetan heula. Terus, nu jadi korbanna téh teu ngan jalma jahat hungkul. Jalma bageur gé bisa jadi korban.

 Pikeun ningali bukti-bukti yén musibat alam dina jaman ayeuna téh lain hukuman ti Allah, mangga tingali artikel ”Kumaha Pandangan Alkitab ngeunaan Musibat Alam?”

 Kitab Suci nunjukkeun Allah Yéhuwa a téh nyaah jeung perhatian ka urang. Perhatikeun sababaraha ayat nu bisa nengtremkeun haté.

•   Yesaya 63:9: ”[Allah] kersaeun nyalametkeun teh ku karana nyaah jeung welas ka maranehna.”

   Maksudna: Yéhuwa sedih pisan waktu ningali urang sangsara.

•   1 Pétrus 5:7: ”Anjeunna merhatikeun aranjeun.”

   Maksudna: Yéhuwa merhatikeun kaayaan urang.

 Lantaran nyaah jeung perhatian ka urang, Yéhuwa daék nulungan urang. Liwat Kitab Suci, Anjeunna nyadiakeun naséhat jeung kekecapan nu bisa ngalilipur urang. Terus, dina Kitab Suci gé aya harepan nu nyebutkeun engké mah moal aya deui musibat alam.​—2 Korintus 1:3, 4.

 Dina Kitab Suci disebutkeun Yéhuwa jangji bakal méré kahirupan nu éndah jeung harepan. (Yermia 29:11) Anjeunna hayang kabéh jalma hirup tengtrem di bumi pirdaus jeung teu kudu hariwang deui ku musibat alam.​—Kajadian 1:28; 2:15; Yesaya 32:18.

 Allah bakal ngawujudkeun jangji-Na éta liwat Pamaréntahan nu dipingpin ku Isa. (Matius 6:10) Isa téh pribadi nu bijaksana jeung boga kawasa pikeun nyingkirkeun musibat alam. Waktu di bumi, manéhna pernah nunjukkeun yén manéhna bisa ngatur cuaca. (Markus 4:37-41) Engké, Isa bakal maréntah ku cara nu bijaksana. Manéhna bakal ngajarkeun ka manusa carana ngurus bumi. (Yesaya 11:2) Ku kituna, engké mah moal aya deui cuaca ékstrim nu ngaruksak alam.

 Anjeun meureun mikir, ’Iraha Isa bakal ngagunakeun kawasana pikeun ngatur cuaca?’ Tingali jawabanana dina artikel ”Kapan Kerajaan Allah Akan Memerintah Bumi?”

 Kitab Suci méré naséhat nu bisa ngabantu urang saacan, salila, jeung sanggeus musibat alam.

•   Saacan: Siap-siap heula supaya apal engké kudu kumaha.

   Ceuk Kitab Suci: ”Jalma anu surti mah kana pibahlaeun teh awas, seug disingkahan. Ari nu teu boga pikiran mah noyod bae, temahna kaduhung.”​—Siloka 22:3.

   Maksudna: Anjeun kudu mikirkeun heula, di daérah anjeun, naon musibat alam nu bisa kajadian? Jadi, engké pas aya musibat alam, anjeun bisa gancang nyieun tindakan jeung ngalindungan kulawarga.

   Pangalaman: ”Waktu leuweung di deukeut imah urang kahuruan, tatangga-tatangga téh lalumpatan. Maranéhna sieun jeung bingung kudu kumaha. Tapi, untungna urang sakulawarga mah geus siap! Urang boga tas pikeun kaayaan darurat nu eusina téh obat-obatan jeung pakéan.”​—Tamara, California, Amerika Serikat.

•   Salila: Utamakeun hal nu pangpentingna.

   Ceuk Kitab Suci: ”Sanajan saurang jalma boga loba harta banda, hartana moal bisa méré kahirupan ka manéhna.”​—Lukas 12:15.

   Maksudna: Kahirupan téh leuwih penting tibatan harta banda.

   Pangalaman: ”Basa Topan Lawin b ngancurkeun imah abdi, abdi bingung kudu kumaha. Jadi abdi ngadoa ka Allah Yéhuwa. Sanggeus ngadoa, abdi jadi sadar sabenerna mah abdi masih untung kénéh. Mémang imah abdi ancur, tapi abdi masih bisa hirup.”​—Leslie, Filipina.

•   Sanggeus: Ulah hariwang poé isukan rék kumaha.

   Ceuk Kitab Suci: ”Ulah hariwang poé isukan rék kumaha. Pikiran mah poé ieu wéh, isukan mah isukan deui, da unggal poéna gé aya hariwangna.”​—Matius 6:34.

   Maksudna: Ulah hariwang teuing kana hal-hal nu can kajadian.

   Pangalaman: ”Imah abdi téh kabanjiran lantaran aya Badai Irma. Harita abdi kudu nyieun loba putusan. Abdi nepi ka strés pisan. Tapi, abdi hayang nuturkeun naséhat Kitab Suci jeung embung hariwang teuing ngeunaan poé isukan. Ku bantuan Yéhuwa, geuningan abdi bisa nyanghareupan kaayaan nu susah éta.”​—Sally, Florida, Amerika Serikat.

 Pikeun ningali saran-saran séjénna, mangga buka artikel ”Cara Agar Bisa Selamat Saat Terjadi Bencana”.