Subuh-subuh dina tanggal 24 Pébruari 2022, Rusia nyerang Ukraina, padahal para pamingpin dunya geus ngupayakeun sangkan serangan ieu teu kajadian. Naon pangaruh serangan ieu pikeun nagri-nagri séjén di sakuliah dunya? António Guterres, sékertaris jéndral PBB, ngomong, ”Teu kabayang bakal sakumaha parahna kasangsaraan jeung karuksakan nu disababkeun ku serangan ieu. Serangan ieu gé pasti ngaganggu kaamanan nagri-nagri di Eropa jeung di sakuliah dunya.”

•   Isa Al-Masih geus méré nyaho yén dina ahir jaman téh ”bangsa-bangsa bakal silih perangan, karajaan-karajaan ogé silih perangan”. (Matius 24:7) Alkitab nunjukkeun yén perang-perang dina jaman ayeuna téh ngawujudkeun kekecapan Isa. Naon buktina? Mangga baca artikel ”Naon Tanda ’Ahir Jaman’ téh?”

•   Dina kitab Wahyu, perang téh digambarkeun ku hiji pribadi ’nu numpak kuda warna beureum’ nu ”ngayakeun perang di bumi”. (Wahyu 6:4) Hal éta téh jadi kanyataan dina jaman ayeuna. Pikeun ningali buktina, mangga baca artikel ”Keempat Penunggang Kuda—Siapa Mereka?”

•   Kitab Daniel geus nyebutkeun yén ”raja kalér” jeung ”raja kidul” téh bakal mumusuhan. (Daniel 11:25-45, Terjemahan Dunia Baru) Ayeuna, nu jadi raja kalér téh nyaéta Rusia jeung balad-baladna. a Naon buktina? Mangga tongton vidéo Nubuat nu Jadi Kanyataan—Daniel Pasal 11.

•   Kitab Wahyu gé nyebutkeun ngeunaan ”perang dina poé agung Allah Nu Mahakawasa”. (Wahyu 16:14, 16) Ieu téh lain perang antara bangsa-bangsa nu ditingali ku urang ayeuna. Jadi jiga kumaha perang ieu téh? Mangga tingali artikel ”Naon Perang Armagédon téh?”

•   Ceuk Alkitab, Allah bakal ”ngeureunkeun peperangan di sakuliah jagat”. (Jabur 46:10) Pikeun ningali naon waé jangji-jangji Allah keur manusa, mangga baca artikel ”Harapan Cerah yang Pasti Terwujud”.

•   Isa ngajar murid-muridna pikeun ngadoakeun sangkan Pamaréntahan Allah geura ngawasa. (Matius 6:9, 10) Pamaréntahan Allah téh nyaéta pamaréntahan nu aya di sorga nu bakal ngawujudkeun tujuan Allah pikeun bumi ieu. Salah sahiji tujuan Allah téh nyaéta nyieun bumi jadi tengtrem. Naon waé berkah-berkahna mun Pamaréntahan Allah geus ngawasa? Mangga tongton vidéo Naon Pamaréntahan Gusti téh?

 Di Ukraina téh aya leuwih ti 129.000 Saksi-Saksi Yéhuwa. Sarua jiga Saksi-Saksi Yéhuwa di sakuliah dunya, Saksi-Saksi Yéhuwa di Ukraina gé nyonto tuladan Isa. Maranéhna tetep nétral sacara pulitik jeung embung pipilueun perang. (Yahya 18:36) Di sakuliah dunya, Saksi-Saksi Yéhuwa terus nguarkeun ”warta hadé ngeunaan Pamaréntahan Allah”. (Matius 24:14) Pamaréntahan ieu bakal nyingkirkeun kabéh masalah umat manusa, kaasup perang. Lamun anjeun hoyong terang ngeunaan harepan tina Alkitab, mangga kontak Saksi-Saksi Yéhuwa.