Mun diperhatikeun, loba budak ngora nu sok ngagunakeun gadget téh biasana sok . . .

• kacanduan gadget.

• di-bully atawa nga-bully batur di Internét.

• ningali pornografi, ngahaja atawa teu dihaja.

KACANDUAN GADGET

Kabéh hal nu aya di Internét, misalna game online, bisa nyieun kacanduan. Ceuk buku Reclaiming Conversation, ”Aplikasi dina HP urang téh dirancang supaya urang embung leupas tina HP.” Ku naon? Beuki lila urang maké hiji aplikasi, beuki gedé untung keur pausahaan nu nyadiakeun éta aplikasi.

PÉK PIKIRKEUN: Na budak Anjeun teu bisa leupas ti gadget-na? Kumaha Anjeun bisa ngabantu maranéhna bijaksana ngagunakeun waktu?—ÉFÉSUS 5:15, 16.

NGA-BULLY DI INTERNÉT

Di Internét, jalma-jalma biasana sok leuwih kasar, blak-blakan, jeung teu paduli kana parasaan batur. Sikep siga kieu nyababkeun loba jalma sok nga-bully.

Sababaraha jalma hayang populér di Internét. Jadi, maranéhna sok sangeunahna di Internét supaya diperhatikeun jeung ditingali ku batur. Aya jalma nu nyeri haté lamun teu diondang ka hiji acara. Manéhna nganggap, jalma nu teu ngondangna téh jahat.

PÉK PIKIRKEUN: Na budak Anjeun sok kasar ka batur di Internét? (Éfésus 4:31) Na budak Anjeun gampang nyeri haté lamun teu diajakan ku babaturanana?

PORNOGRAFI

Di Internét, gampang pisan keur ningali pornorgafi, éta aya di mana-mana. Sanajan aya program nu bisa ngablokir gambar jeung vidéo porno, tapi angger wé sok aya gambar atawa vidéo porno nu bisa muncul.

Aya ogé jalma nu sok ngirim gambar atawa vidéo porno dirina sorangan, atawa narima gambar atawa vidéo porno batur. Éta téh disebut sexting. Sexting bisa dianggap ngalanggar hukum. Di sababaraha nagri, ngirim jeung narima gambar atawa vidéo porno budak di bawah umur bisa kaasup kasus nyebarkeun pornografi anak.

PÉK PIKIRKEUN: Kumaha carana ngabantu budak Anjeun supaya teu kagoda pikeun ningali atawa ngirim gambar porno di Internét?—ÉFÉSUS 5:3, 4.

LATIH BUDAK ANJEUN

Sanajan budak Anjeun pinter make gadget, manéhna tetep butuh bingbingan. Ceuk buku Indistractable, kolot nu méré gadget ka budakna padahal budakna can bijaksana dina maké gadget, ”sarua teu tanggung jawabna siga ngantep budak asup ka kolam, padahal budakna can apal carana ngojay”.

Pilih saran nu rék Anjeun lakukeun, atawa tuliskeun naon nu rék Anjeun lakukeun.

• Bahas jeung budak carana supaya sopan jeung teu kasar di Internét

• Bantu budak waktu ngarasa dijauhan ku babaturanana

• Upaya sabisa-bisana pikeun ngajauhkeun budak tina hal-hal goréng di Internét

• Rutin mariksa HP budak

• Tangtukeun sabaraha lila budak meunang maké HP dina sapoé

• Jieun aturan pikeun teu maén HP waktu jamna saré

• Jieun aturan pikeun teu maén HP waktu dahar bareng jeung kulawarga