Strés téh réaksi awak waktu aya kaayaan darurat. Uteuk bakal ngirimkeun loba hormon ka sakabéh sistim awak urang. Jantung jadi deg-degan, tekanan darah jadi naék, napas jadi leuwih gancang, otot gé jadi rengkeng. Sacara teu sadar, awak geus siap nyieun tindakan. Waktu kaayaan darurat éta geus liwat, awak urang bakal tenang jeung balik deui kana kaayaan normal.

Urang bisa nyanghareupan tangtangan atawa kaayaan nu bahaya lantaran ayana réaksi nu alami ieu. Réaksi strés dimimitian dina uteuk. Strés nu alus bisa ngalantarankeun urang gancang nyieun tindakan. Strés dina kadar nu sacukupna bisa ngabantu urang ngahontal tujuan atawa ningkatkeun kasanggupan, misalna waktu keur ujian sakola, wawancara gawé, atawa keur olahraga.

Tapi strés nu parah jeung katutuluyan bisa bahaya. Lamun awak sering atawa teterusan dina kaayaan ”waspada”, éta bisa ngaruksak fisik, émosi, jeung méntal. Kalakuan urang, kaasup sikep urang ka batur, bisa barobah. Strés anu katutuluyan ogé bisa nyababkeun saurang jalma nyalahgunakeun obat-obatan jeung ngalakukeun hal-hal séjénna nu teu séhat pikeun nenangkeun diri. Malah aya ogé nu jadi déprési, kacapéan teuing, atawa hayang bunuh diri.

Pangaruh strés ka unggal jalma mémang béda-béda, tapi éta bisa nyababkeun rupa-rupa panyakit jeung bisa mangaruhan ampir kabéh bagian awak urang.