1. Naon sababna urang ngahormat ka batur, sarta naon nu bakal dibahas dina ieu artikel?

NAON hartina ngahormat ka batur? Éta hartina urang méré perhatian husus jeung ngajénan maranéhna. Biasana, urang ngahormat ka jalma-jalma nu geus ngalampahkeun hal nu hadé, boga tanggung jawab, atawa boga kadudukan penting. Dina artikel ieu, urang bakal ngabahas saha waé nu layak dihormat jeung naon alesanana.

2, 3. (a) Ku naon Yéhuwa layak dihormat? (Tingali gambar dina awal artikel.) (b) Saha ”Anak Domba” nu disebutkeun di Wahyu 5:13, jeung ku naon urang kudu ngahormat ka anjeunna?

² Dina Wahyu 5:13 disebutkeun lamun Pribadi ”anu linggih dina tahta” jeung ”Anak Domba” layak narima hormat. Pribadi ”anu linggih dina tahta” téh nyaéta Yéhuwa. Dina Wahyu pasal 4, mahluk-mahluk di sawarga nyebutkeun alesanana Yéhuwa, Pribadi ”anu jumeneng salalanggengna”, layak dihormat. Maranéhna  ngomong, ”Nun Pangeran, nun Allah! Mung Gusti anu layak diagungkeun, dihormat, nu layak nyangking kawasa. Reh Gusti teh nu nyiptakeun saniskara, nya ku karana pangersa Gusti eta sadaya kumelip hirup.”​—Wahyu 4:9-11.

³ ”Anak Domba” nu disebutkeun di Wahyu 5:13 téh Yésus Kristus. Ti mana urang nyaho? Basa di bumi, Yésus disebut ”Anak Domba Allah, anu bakal ngaleungitkeun dosa ti alam dunya”. (Yoh. 1:29) Moal aya raja nu réla maot pikeun nebus rahayatna. Éta sababna urang ngahormat ka anjeunna. Yésus layak dihormat lantaran anjeunna ”Rajaning sakabeh raja, Gustining sakabeh gusti”. (1 Tim. 6:14-16) Bisa jadi Sadérék gé satuju jeung mahluk-mahluk di sawarga nu ngawih, ”Anak Domba nu geus ditelasan, layak nampi kakawasaan, kamuktian, kaluhungan, jeung kakuatan, kamulyaan, kaagungan, jeung pujian!”​—Wahyu 5:12.

4. Ku naon urang kudu ngahormat ka Yéhuwa jeung Kristus?

⁴ Yohanes 5:22, 23 nyebutkeun lamun Yéhuwa tos ngajadikeun Kristus sabagé hakim sakabéh manusa. Éta téh alesan utama urang ngahormat ka Yésus. Lamun urang ngahormat ka Yésus, éta hartina urang ngahormat ka Yéhuwa. Ku kituna, urang bisa narima hirup langgeng.​—Baca Jabur 2:7, 11.

5. Naon sababna manusa ogé layak dihormat jeung diajénan?

⁵ Manusa diciptakeun ”nyeples” jeung Allah. (Kaj. 1:27) Ieu hartina, kalolobaan manusa bisa némbongkeun sipat-sipat nu sarua jeung Allah. Contona, manusa bisa némbongkeun kanyaah, kahadéan, jeung welas asih. Manusa ogé boga haté sanubari pikeun ngabédakeun nu bener jeung nu salah, nu jujur jeung nu bohong, sarta nu hadé jeung nu goréng. (Rum 2:14, 15) Kalolobaan jalma ogé resep kana kabersihan jeung kaéndahan, sarta hayang hirup rukun jeung batur. Bisa kitu téh lantaran Yéhuwa resep kana katartiban jeung katengtreman. Jadi jelas, manusa téh boga kamampuh pikeun nyonto Mantenna. Ku kituna, manusa ogé layak dihormat jeung diajénan.​—Jab. 8:6.

6, 7. Naon bédana Saksi Yéhuwa jeung kalolobaan jalma dina ngahormat batur?

⁶ Urang geus nyaho lamun manusa ogé layak dihormat, tapi hormat nu pantes téh nu siga kumaha? Mémang sok hésé nangtukeunana lantaran kalolobaan jalma dipangaruhan ku pandangan dunya Sétan. Maranéhna sok muja-muja jalma nu séjén, ngahormat batur leuwih ti nu sapantesna, jeung nganggap batur téh siga déwa. Maranéhna nurutan cara papakéan, kalakuan, jeung kabiasaan para pamingpin agama, pajabat pulitik, atlét, atawa artis.

⁷ Urang Kristen nyaho lamun ngahormat batur siga kitu téh salah. Di antara manusa, ngan Yésus nu jadi conto sampurna pikeun urang. (1 Pet. 2:21) Urang kudu inget lamun ”kabeh  geus dosa, jarauh ti Allah”. (Rum 3:23) Teu aya manusa nu pantes dipuja-puja ku urang. Lamun urang ngahormat batur leuwih ti nu sapantesna, urang ngaraheutan manah Yéhuwa.

8, 9. (a) Kumaha carana Saksi Yéhuwa ngajénan pamaréntah? (b) Dina kaayaan naon urang moal nurut ka pamaréntah?

⁸ Aya jalma-jalma nu lantaran kadudukanana, layak dihormat atawa diajénan ku urang. Contona, pajabat pamaréntah. Maranéhna boga tugas pikeun ngajaga kaamanan jeung ngurus kabutuhan wargana. Ieu téh mangpaat pisan keur urang. Rasul Paulus nyebutkeun lamun urang kudu ”nurut ka pamarentah”. Urang ogé kudu taat kana hukum. Ceuk Paulus, ”Bayar sakur anu kudu dibayar ka pamarentah, boh pajeg lamun kudu mayar pajeg, boh cuke lamun kudu mayar cuke. Hargaan pamarentah, ajenan.”​—Rum 13:1, 7.

⁹ Salaku Saksi Yéhuwa, urang ngupayakeun pikeun ngajénan pajabat pamaréntah. Sanajan nu dipiharep ku pajabat di unggal nagara téh béda-béda, urang kudu tetep nurut kana aturan nu ditetepkeun ku maranéhna. Tapi, lamun urang dititah ngalanggar hukum Yéhuwa, urang moal daék. Urang kudu leuwih taat ka Yéhuwa ti batan ka manusa.​—Baca 1 Petrus 2:13-17.

10. Kumaha hamba-hamba Allah di jaman baheula jadi conto nu alus keur urang?

¹⁰ Urang bisa diajar ti hamba-hamba Yéhuwa di jaman baheula nu ngajénan pamaréntah tur pajabatna. Contona, Yusup jeung Mariam. Waktu pamaréntah Rum ngayakeun sénsus, maranéhna indit ka Bétléhém pikeun ngadaptar sanajan Mariam geus téréh ngababarkeun. (Luk. 2:1-5) Conto séjénna nu ngajénan pangawasa manusa nyaéta Rasul Paulus. Basa manéhna dituduh ngalanggar hukum, manéhna ngabéla dirina ku cara nu sopan di hareupeun Raja Hérodes Agripa jeung Féstus, gupernur Yudéa.​—Ras. 25:1-12; 26:1-3.

11, 12. (a) Ku naon para pamingpin agama teu pantes leuwih dihormat ku urang? (b) Naon hasilna waktu saurang Saksi Austria ngajénan saurang pulitikus?

¹¹ Tapi, naha urang ogé kudu ngahormat pamingpin agama, sakumaha urang ngahormat pajabat pamaréntah? Sanajan para pamingpin agama miharep hal éta, urang ngahormat maranéhna siga ka jalma nu séjén, moal leuwih ti kitu. Naon sababna? Sabab agama palsu teu ngajarkeun bebeneran ngeunaan Allah jeung Firman-Na, Alkitab. Yésus nyawad para pamingpin agama sabagé jalma nu munapék jeung pamingpin nu jahat. (Mat. 23:23, 24) Tapi, pajabat pamaréntah mah layak lamun leuwih dihormat jeung diajénan ku urang. Hasilna, maranéhna sakapeung osok nulungan urang.

¹² Contona Dr. Heinrich Gleissner, pulitikus Austria nu ditéwak ku Nazi basa Perang Dunya II. Manéhna rék dikirim ka kamp konséntrasi. Basa di karéta, manéhna panggih jeung Leopold Engleitner, saurang Saksi nu sumanget ti Austria. Sadérék Engleitner ngajelaskeun kapercayaanana  ku cara nu sopan ka Dr. Gleissner, nu ngaregepkeun manéhna. Sanggeus perang, Gleissner sababaraha kali ngagunakeun jabatanana pikeun mantuan Saksi di Austria. Bisa jadi Sadérék ogé inget kana pangalaman alus séjénna ngeunaan urang Kristen nu ngajénan pajabat pamaréntah.

13. Utamana, saha nu layak dihormat jeung diajénan ku urang? Naon sababna?

¹³ Dulur-dulur saiman layak dihormat jeung diajénan ku urang. Utamana nu jaradi pamingpin, saperti kokolot sidang, pangawas wilayah, anggota Panitia Cabang, jeung anggota Badan Pingpinan. (1 Tim. 5:17) Maranéhna téh ngurus kabutuhan rohani umat Allah, sarta mangrupakeun ’kurnia’ pikeun urang. (Epe. 4:8) Jadi, asup akal lamun urang ngahormat jeung ngajénan maranéhna teu sual nagara, pendidikan, status sosial, atawa ékonomi maranéhna. Urang Kristen di abad kahiji jadi conto alus keur urang. Siga maranéhna, urang ogé ngahormat ka priya-priya nu jadi pamingpin. Tapi lamun panggih jeung maranéhna, urang moal nganggap maranéhna téh siga malaikat atawa manusa nu hébat. Urang ngajénan jeung ngahormat lantaran maranéhna getol digawé jeung rendah haté.​—Baca 2 Korinta 1:24; Wahyu 19:10.

14, 15. Naon bédana kokolot sidang jeung pamingpin agama?

¹⁴ Kokolot-kokolot sidang téh pangangon nu rendah haté. Maranéhna embung dianggap siga artis. Jadi,  maranéhna béda pisan ti para pamingpin agama di jaman ayeuna jeung di jaman Yésus. Ceuk Yésus, ”Dina pesta-pesta, tempatna milih anu pangeunahna. Di imah-imah ibadah korsina pangaralusna. Karesepna lamun pada ngabageakeun jeung pada ngajenan di pasar-pasar.”​—Mat. 23:6, 7.

¹⁵ Kokolot sidang taat kana paréntah Yésus, ”Maraneh mah tong daek disebut ’Ama Guru’, da Guru maraneh ngan hiji sarta maraneh teh sadulur. Jeung ulah nga-Ama-keun ka sasama jalma di dunya, sabab Rama maraneh mah ngan hiji, di sawarga. Ulah daek disebut ’Pamingpin’, sabab nu jadi pamingpin teh ngan hiji nya eta Kristus, Jurusalamet. Anu pangpunjulna di maraneh, kudu purun kumawula ka sarerea. Anu ngaluhurkeun maneh tangtu dikahandapkeun, sabalikna anu ngahandapkeun maneh bakal dikaluhurkeun.” (Mat. 23:8-12) Lantaran para kokolot sidang di sakuliah dunya rendah haté jeung taat kana paréntah Yésus, dulur-dulur saimanna pada nyaraah, ngajénan, jeung ngahormat maranéhna.

16. Ku naon urang kudu upaya pikeun ngajénan batur ku cara nu bener?

¹⁶ Butuh waktu jeung upaya pikeun bisa ngajénan batur ku cara nu bener. Éta ogé nu dialaman ku urang Kristen di abad kahiji. (Ras. 10:22-26; 3 Yoh. 9, 10) Tapi, upaya urang tangtu hasil. Lamun urang ngahormat batur ku cara nu dipiharep Yéhuwa, urang bakal narima loba mangpaat.

17. Naon waé mangpaatna lamun urang ngahormat ka jalma nu boga wewenang?

¹⁷ Lamun urang ngahormat jeung ngajénan jalma nu boga wewenang, maranéhna bakal condong ngabéla hak ngawawar urang. Maranéhna ogé bisa boga pandangan nu bener ngeunaan kagiatan urang. Ieu pernah kajadian di Jérman sababaraha taun katukang basa saurang panaratas nu ngaranna Birgit, nganteur budak awéwéna ka wisuda sakola. Guru-guruna ngomong lamun maranéhna resep aya budak Saksi di sakolana, kaayaan sakola jadi leuwih alus. Terus, Birgit méré nyaho maranéhna, ”Barudak Saksi diajar ngalampahkeun papakon ahlak ti Allah, ieu kaasup ngajénan jeung ngahormat ka guru.” Salah saurang guru ngomong yén ngajar jadi leuwih gampang lamun kabéh muridna kawas barudak Saksi. Maranéhna jadi boga pandangan nu bener ngeunaan Saksi. Sababaraha minggu sanggeusna, saurang guru datang ka kongrés.

18, 19. Naon nu kudu diinget lamun urang ngahormat ka kokolot?

¹⁸ Prinsip-prinsip dina Firman Allah  ngabantu urang ngajénan kokolot sidang ku cara nu bener. (Baca Ibrani 13:7, 17.) Urang bisa jeung kudu muji maranéhna lantaran geus getol digawé. Lamun urang taat kana pituduh ti kokolot, maranéhna bakal suka bungah ngawula. Alkitab ngajurung urang pikeun nyonto iman maranéhna. Tapi, ieu lain hartina urang kudu nurutan cara papakéan, cara ngomong, jeung cara ngajar kokolot nu dianggap ”hébat”. Lamun kitu, éta hartina urang jadi murid maranéhna lain murid Kristus. Sing inget lamun para kokolot téh teu sampurna siga urang.

¹⁹ Lamun urang ngahormat jeung ngajénan kokolot ku cara nu bener sarta teu nganggap maranéhna siga artis, éta téh sarua jeung mantuan maranéhna. Maranéhna jadi leuwih gampang pikeun tetep rendah haté sarta moal ngarasa leuwih punjul atawa ngarasa bener sorangan.

20. Naon mangpaatna lamun urang ngahormat ka batur?

²⁰ Hormat ka batur ngabantu urang henteu égois jeung tetep rendah haté lamun batur ngahormat ka urang. Éta ogé bakal ngajaga urang sangkan teu undur lamun jalma nu diajénan nguciwakeun urang. Mangpaat séjénna nyaéta urang bisa ngahiji jeung organisasi Yéhuwa. Organisasi tara muja-muja manusa, boh nu saiman boh nu henteu.

21. Naon mangpaat pangutamana lamun urang ngahormat ka batur?

²¹ Mangpaat pangutamana nyaéta urang bisa nyukakeun Yéhuwa. Éta hartina urang bakal ngalampahkeun naon nu dipikahoyong Mantenna sarta tetep satia. Ku kituna, Yéhuwa bisa ngajawab Sétan nu nuduh yén moal aya saurang ogé nu tetep satia. (Sil. 27:11) Kalolobaan jalma teu nyaho cara nu bener pikeun ngahormat ka batur. Sukur ka Yéhuwa, urang bisa nyaho cara nu dipiharep Mantenna!