Keur Allah mah cara pikir urang téh penting. (Yermia 17:10) Jadi urang kudu ngajaga sikep jeung omongan urang. Tapi, aya hal séjén nu kudu urang lakukeun. Sipat goréng sangka téh asalna tina haté jeung pikiran. Jadi lamun geus goréng sangka ka batur, urang kudu geura-geura miceun pikiran éta. Sing yakin, urang téh bisa ”barobah”.

Pikirkeun bener-bener kumaha pandangan jeung parasaan anjeun ka batur, utamana ka nu bangsa jeung kaomna béda jeung anjeun. Pék pikirkeun: ’Kumaha pandangan urang ka manéhna? Naha urang téh bener-bener kenal ka manéhna? Atawa pandangan urang téh geus dipangaruhan ku sikep goréng sangka?’ Singkahan film, hiburan, atawa média sosial lamun eusina téh ngunggulkeun sikep goréng sangka jeung kakerasan.

Mémang teu gampang pikeun mariksa haté jeung pikiran sorangan. Tapi, Firman Allah bisa ”nyingkabkeun eusi pikiran jeung niat haté” anjeun. (Ibrani 4:12) Jadi terus diajar Kitab Suci. Bandingkeun cara pikir anjeun jeung pangajaran Kitab Suci. Pék luyukeun cara pikir anjeun. Kitab Suci bisa mantuan anjeun nyingkirkeun parasaan goréng sangka nu geus nanceub kuat dina haté jeung pikiran.​—2 Korintus 10:4, 5.