1. Jiga Raja Daud, bisa jadi urang boga pananya naon?

URANG kabéh hayang hirup tenang. Euweuh nu hayang hariwang. Tapi sakapeung, urang bisa ngarasa hariwang. Bisa jadi, urang nanya jiga Raja Daud, ”Dugi ka iraha abdi kedah nandangan sungkawa, siang wengi gering pikir?”​—Jab. 13:3.

2. Urang bakal ngabahas naon dina artikel ieu?

² Sanajan osok hariwang, urang bisa tetep tenang. Dina artikel ieu, urang bakal ngabahas sababaraha hal nu bisa nyababkeun urang hariwang. Geus kitu, urang bakal ngabahas genep cara supaya urang bisa tetep tenang waktu nyanghareupan masalah.

3. Hal naon waé nu nyababkeun urang hariwang? Na urang bisa nyegah hal-hal éta?

³ Aya loba hal nu bisa nyababkeun urang hariwang, sababaraha di antarana teu bisa dicegah ku urang. Misalna unggal taun, harga dahareun, pakéan, jeung panyicingan téh naék. Urang teu bisa ngatur hal éta. Urang gé teu bisa ngatur kalakuan batur gawé atawa batur sakola nu sering ngagoda urang supaya teu jujur atawa ngalakukeun hal nu cabul. Terus, urang teu bisa nyegah batur ngalakukeun kajahatan di lingkungan urang. Urang nyanghareupan kabéh hal éta téh lantaran urang hirup di dunya nu kalolobaan jalmana  teu nuturkeun prinsip Alkitab. Dunya ieu téh dikawasaan ku Sétan. Manéhna apal, ”kasalempangan hirup” bisa ngahalangan jalma-jalma pikeun ngawula Yéhuwa. (Mat. 13:22; 1 Yoh. 5:19) Jadi, teu héran lamun di dunya ieu aya loba hal nu nyababkeun urang hariwang!

4. Mun hariwang teuing waktu aya masalah, urang bakal kumaha?

⁴ Waktu aya masalah, urang bisa ngarasa hariwang pisan, nepi ka nu dipikirkeun téh ngan masalah éta wungkul. Misalna, meureun urang sieun teu boga duit pikeun meuli pangabutuh sapopoé. Urang gé bisa jadi sieun kaleungitan pagawéan lantaran gering atawa dipecat. Terus, meureun urang sieun teu satia ka Yéhuwa waktu aya gogoda. Sakeudeung deui, Sétan bakal ngagerakkeun jalma-jalma pikeun nyerang umat Allah. Jadi meureun urang hariwang, engké urang bakal kumaha waktu éta kajadian? Bisa waé urang mikir, ’Salah kitu mun urang hariwang kana hal-hal éta?’

5. Naon maksud Yésus waktu anjeunna ngomong, ”Ulah salempang”?

⁵ Yésus méré nyaho murid-muridna, ”Ulah salempang.” (Mat. 6:25) Na ieu hartina urang teu meunang hariwang sama sakali? Lain kitu! Sababaraha hamba Yéhuwa nu satia dina jaman baheula gé pernah ngarasa hariwang, tapi maranéhna tetep dipikaresep ku Yéhuwa. * (1 Rja. 19:4; Jab. 6:4) Sabenerna, Yésus ngomong kitu téh lantaran hayang nenangkeun urang. Yésus embung urang hariwang teuing kana pangabutuh sapopoé, sabab éta bisa ngaganggu palayanan urang ka Yéhuwa. Jadi, kumaha carana supaya urang teu hariwang teuing?​—Tingali kotak ”Cara Ngalakukeunana”.

6. Sajalan jeung Pilipi 4:6, 7, naon nu bisa ngabantu urang tetep tenang?

⁶ (1) Sing sering ngadoa. Mun Sadérék ngarasa hariwang, Sadérék bisa ngadoa ménta bantuan Yéhuwa. (1 Pet. 5:7) Yéhuwa bisa ngajawab doa Sadérék ku cara méré ”katengtreman jeung karahayuan” nu bisa ngéléhkeun pamikiran naon waé. (Baca Pilipi 4:6, 7.) Liwat roh suci-Na, Yéhuwa bisa ngabantu urang tetep tenang.​—Gal. 5:22.

7. Naon nu kudu diinget waktu urang ngadoa ka Allah?

⁷ Waktu ngadoa, budalkeun eusi haté Sadérék ka Yéhuwa. Caritakeun masalahna sarta kumaha parasaan Sadérék. Pénta hikmat jeung kakuatan ti Yéhuwa supaya Sadérék sanggup nyanghareupan masalah éta. Mun masalahna mémang teu bisa dileungitkeun, pénta bantuan ti Yéhuwa supaya Sadérék teu hariwang teuing. Mun Sadérék ngadoa sacara rinci, Sadérék bakal bisa ningali kumaha Yéhuwa ngajawab doa-doa Sadérék. Tapi saupama Yéhuwa teu langsung ngajawab doa Sadérék, ulah nyerah. Yéhuwa hayang urang ngadoa sacara rinci sarta teu bosen-bosen ngadoakeunana.​—Luk. 11:8-10.

8. Naon deui nu kudu diucapkeun dina doa?

⁸ Salian ti nyaritakeun masalah urang ka Yéhuwa, urang gé kudu ngucap sukur. Sanajan kaayaanna hésé, pék inget-inget deui berkah naon waé nu geus ditarima ku urang. Tapi, kumaha lamun urang bingung rék ngomong naon? Sing inget, Yéhuwa bakal ngajawab doa urang, najan urang  ngan ngomong, ”Yéhuwa, tulungan abdi!”​—2 Bab. 18:31; Rum 8:26.

9. Urang kudu kumaha lamun ngarasa sieun?

⁹ (2) Andelkeun hikmat ti Yéhuwa, lainna diri sorangan. Dina abad kadalapan SM, urang Yuda sieuneun basa rék diserang ku bangsa Asur. Jadi, maranéhna ménta tulung ka bangsa Mesir. (Yes. 30:1, 2) Yéhuwa méré paringetan ka maranéhna, mun ngandelkeun bangsa Mesir, maranéhna bakal cilaka. (Yes. 30:7, 12, 13) Liwat Nabi Yésaya, Yéhuwa méré nyaho urang Israil kumaha carana supaya salamet. Mantenna ngomong, ”Pihapekeun diri ka Kami, tan wande maraneh kuat jeung reugreug.”​—Yes. 30:15.

10. Dina kaayaan naon waé urang kudu ngandelkeun Yéhuwa?

¹⁰ Iraha urang kudu ngandelkeun Yéhuwa? Bayangkeun sababaraha kaayaan ieu. Misalna, kumaha mun Sadérék ditawaran pagawéan nu gajihna leuwih gedé, tapi Sadérék kudu sering lembur jeung teu boga loba waktu pikeun ngalayanan Yéhuwa jiga ayeuna? Atawa, kumaha mun aya batur gawé nu bogoh jeung ngadeukeutan Sadérék, tapi manéhna lain umat Yéhuwa? Terus, kumaha mun aya anggota kulawarga nu ngancam ka Sadérék, ’Sok pilih, urang atawa Allah manéh?’ Dina kaayaan-kaayaan saperti kitu, Sadérék kudu nyieun putusan nu sulit. Tapi sing yakin, Yéhuwa bakal ngabingbing Sadérék. (Mat. 6:33; 10:37; 1 Kor. 7:39) Na Sadérék bakal ngandelkeun Yéhuwa jeung nuturkeun bingbingan-Na?

11. Kisah Alkitab mana waé nu bisa ngabantu urang tetep tenang najan nyanghareupan tangtangan?

¹¹ (3) Pék diajar tina conto-conto nu alus jeung nu goréng. Loba kisah Alkitab nu nunjukkeun pentingna tetep tenang jeung ngandelkeun Yéhuwa. Waktu maca kisah-kisah ieu, pék pikirkeun ku naon umat Yéhuwa bisa tetep tenang najan nyanghareupan tangtangan nu beurat. Misalna, waktu para rasul dititah eureun ngawawar ku Mahkamah Yahudi, maranéhna teu sieun. Maranéhna wani ngomong kieu, ”Sim kuring sadaya ngaraos wajib tunduk ka Allah ti batan ka manusa.” (Ras. 5:29) Malah sanggeus dipecutan gé, para rasul tetep wani. Ku naon bisa kitu? Maranéhna apal, Yéhuwa ngadukung jeung resep ka maranéhna. Ku kituna, para rasul terus ngawawarkeun warta hadé. (Ras. 5:40-42) Kitu ogé jeung Stépanus. Waktu rék dipaéhan, manéhna tetep tenang. Éta katingali tina rarayna nu ”kawas raray malaikat”. (Ras. 6:12-15) Naha bisa kitu? Lantaran Stépanus yakin, manéhna dipikaresep ku Yéhuwa.

12. Dumasar 1 Petrus 3:14; 4:14, ku naon urang bisa tetep bungah najan dikaniaya?

¹² Para rasul bisa ningali jelas yén Yéhuwa ngadukung maranéhna. Mantenna méré kawasa ka maranéhna pikeun nyieun mujijat-mujijat. (Ras. 5:12-16; 6:8) Ayeuna, urang mémang teu dibéré kawasa jiga kitu. Tapi liwat Firman-Na, Yéhuwa ngayakinkeun urang, mun urang dikaniaya lantaran ngabéla bebeneran, Mantenna bakal reueus ka urang. Mantenna gé bakal méré roh suci-Na pikeun ngadukung urang. (Baca 1 Petrus 3:14; 4:14.) Jadi, ulah mikirkeun teuing engké kudu kumaha mun dikaniaya. Ayeuna mah, mending urang nguatkeun kayakinan urang, ngarah leuwih percaya yén Yéhuwa bisa ngadukung jeung nyalametkeun urang. Jiga murid-murid dina abad kahiji, urang kudu percaya kana jangji Yésus, ”Ku Kami bakal dibere piomongeun supaya maraneh perceka jeung bijaksana, nepi ka  omongan maraneh moal aya anu bisa ngalawan atawa ngabantah.” Yésus gé jangji, ”Lamun maraneh tabah, tangtu baris rahayu.” (Luk. 21:12-19) Jeung ulah poho, Yéhuwa inget kana kabéh hal rinci ngeunaan umat-Na nu satia nepi ka maot. Jadi, Mantenna bakal ngahirupkeun deui maranéhna.

13. Naon mangpaatna diajar tina pangalaman jalma-jalma nu hariwang teuing jeung teu ngandelkeun Yéhuwa?

¹³ Urang gé bisa diajar tina pangalaman jalma-jalma nu hariwang teuing jeung teu ngandelkeun Yéhuwa. Pangalaman maranéhna bisa mantuan urang supaya teu ngalakukeun kasalahan nu sarua jiga maranéhna. Misalna, perhatikeun kisah Raja Asa ti Yuda. Basa diserang ku pasukan Étiopia nu gedé, manéhna téh ngandelkeun Yéhuwa. Jadi, Yéhuwa mantuan manéhna ngéléhkeun musuh. (2 Bab. 14:9-12) Tapi ka dieunakeun, waktu diserang ku pasukan Raja Baasa ti Israil nu jumlahna leuwih saeutik, Asa kalah ka méré duit ka raja Siria supaya dibantuan. Manéhna teu ngandelkeun Yéhuwa jiga baheula. (2 Bab. 16:1-3) Terus dina ahir hirupna, waktu gering parah, manéhna gé teu ngandelkeun bantuan Yéhuwa.​—2 Bab. 16:12.

14. Urang bisa meunang palajaran naon tina kasalahan Raja Asa?

¹⁴ Tadina mah, Raja Asa ngandelkeun Yéhuwa waktu aya masalah. Tapi ka dieunakeun, manéhna hayang ngurus masalah maké carana sorangan. Katingalina, waktu Asa ménta bantuan ka Siria pikeun ngéléhkeun Israil, rencanana bakal suksés. Tapi, nyatana mah teu kitu. Yéhuwa ngomong liwat saurang nabi, ”Lantaran anjeun ngandelkeun raja Siria, lainna Yéhuwa Allah anjeun, pasukan raja Siria jadi luput ti anjeun.” (2 Bab. 16:7, Terjemahan Dunia Baru) Naon palajaranna keur urang? Urang kudu ati-ati. Ulah percaya diri teuing. Ulah mikir, urang mah sanggup ngurus masalah tanpa bingbingan Yéhuwa nu aya dina Firman-Na. Waktu kudu gancang nyieun putusan dina kaayaan darurat, urang kudu tetep tenang jeung ngandelkeun Yéhuwa. Mantenna bakal mantuan urang nyieun putusan nu bener.

15. Naon nu bisa urang lakukeun waktu maca Alkitab?

¹⁵ (4) Apalkeun ayat-ayat Alkitab. Waktu Sadérék manggihan ayat-ayat Alkitab nu bisa mantuan Sadérék tetep tenang jeung percaya ka Yéhuwa, pék apalkeun ayat-ayat éta. Supaya gancang apal, macana bisa bari diucapkeun, atawa tulis ayat-ayatna ngarah engké bisa dibaca deui. Baheula, Yéhuwa nitah Yosua pikeun maca buku Hukum unggal poé. Macana gé kudu bari diucapkeun. Hal ieu téh ngabantu Yosua pikeun nyieun putusan nu bijaksana jeung boga kawani pikeun mingpin umat Allah. (Yos. 1:8, 9) Loba ayat dina Alkitab nu bisa ngabantu Sadérék tetep tenang waktu ngarasa hariwang atawa sieun.​—Jab. 27:1-3; Sil. 3:25, 26.

16. Kumaha Yéhuwa ngagunakeun sidang pikeun mantuan urang supaya tetep tenang jeung percaya ka Mantenna?

¹⁶ (5) Pék gaul jeung umat Allah. Yéhuwa ngagunakeun dulur-dulur saiman pikeun mantuan urang supaya tetep tenang jeung percaya ka Mantenna. Dina pasamoan, aya loba hal nu bisa nguatkeun urang, misalna hutbah atawa koméntar ti sadérék-sadérék. Urang gé bisa dikuatkeun waktu ngobrol jeung dulur saiman. (Ibr. 10:24, 25) Terus, urang bisa nyaritakeun kahariwangan urang ka sobat-sobat di sidang. Kekecapan nu hadé ti sobat téh bisa mantuan urang supaya teu hariwang teuing.​—Sil. 12:25.

17. Dumasar Ibrani 6:19 kumaha harepan kana jangji-jangji Allah bisa mantuan urang tetep tenang dina kaayaan nu susah?

 ¹⁷ (6) Terus pikirkeun harepan. Harepan kana jangji-jangji Allah téh jiga ”jangkar anu nanceb jero”. Éta bisa mantuan urang tetep tenang dina kaayaan nu susah atawa waktu ngarasa hariwang. (Baca Ibrani 6:19.) Pék pikirkeun, engké mah moal aya deui hal-hal nu nyababkeun urang hariwang. (Yes. 65:17) Bayangkeun Sadérék aya di dunya anyar nu tengtrem. (Mika 4:4) Lamun Sadérék nyaritakeun jangji-jangji Allah ieu ka batur, harepan Sadérék gé bakal beuki kuat. Pék sabisa-bisa ngawawar jeung ngabantu batur jadi murid. Ku kituna, ”hal anu keur diarep-arep ku aranjeun teh laksana katarima”.​—Ibr. 6:11.

18. Bakal kumaha kaayaan dunya engké? Jeung, kumaha cara nyanghareupan kaayaan éta?

¹⁸ Dunya ieu geus téréh diancurkeun. Engké mah kaayaanana bakal leuwih susah. Urang bisa beuki hariwang. Ayat taunan 2021 bisa mantuan urang supaya terus ngandelkeun Yéhuwa, lainna diri sorangan. Ku kituna, engké urang bisa tetep tenang. Jadi, dina taun ieu, hayu urang tunjukkeun yén urang percaya kana jangji Yéhuwa, ”Pihapekeun diri ka Kami, tan wande maraneh kuat jeung reugreug.”​—Yes. 30:15.