1. Barudak lalaki téh jiga kumaha?

BUDAK lalaki, aya loba hal nu bisa anjeun lakukeun keur sidang. Kalolobaan ti aranjeun téh gedé tanaga jeung euweuh kacapé. (Sil. 20:29) Anjeun téh kurnia keur sidang. Anjeun meureun boga cita-cita pikeun jadi palayan sidang. Tapi bisa waé anjeun ngarasa, batur nganggap anjeun ngora teuing atawa kurang pangalaman pikeun ngajalankeun tugas penting. Tapi sanajan anjeun ngora kénéh, aya hal-hal nu bisa anjeun lakukeun ayeuna ngarah bisa dipercaya jeung dihargaan ku sadérék-sadérék di sidang.

2. Dina artikel ieu, urang bakal ngabahas naon?

² Dina artikel ieu, urang bakal ngabahas kahirupan Raja Daud. Urang gé bakal ningali kajadian-kajadian naon nu kaalaman ku dua raja Yuda, nyaéta Asa jeung Yosapat. Urang bakal ngabahas tangtangan naon waé nu kaalaman ku tilu jalma tadi, kumaha cara maranéhna nyanghareupan tangtangan-tangtangan éta, jeung naon nu bisa dipiconto ku barudak lalaki.

3. Naon salah sahiji hal nu bisa dilakukeun ku barudak ngora pikeun mantuan sadérék-sadérék anu geus sepuh?

³ Daud téh nyobat jeung Yéhuwa. Terus basa ngora kénéh, manéhna diajar katarampilan nu aya mangpaatna. Daud diajar maén musik sarta ngagunakeun katarampilanana pikeun  nyenangkeun Saul, raja anu dipilih ku Yéhuwa. (1 Sam. 16:16, Terjemahan Dunia Baru [NW]; 1 Sam. 16:23) Ari anjeun kumaha? Loba barudak ngora nu ngagunakeun pangabisana pikeun mantuan sadérék-sadérék di sidang. Misalna, mun anjeun ngarti kana alat-alat éléktronik, anjeun bisa mantuan sadérék-sadérék nu geus sepuh pikeun ngagunakeun tablét atawa alat éléktronikna keur palajaran pribadi jeung masamoan. Sadérék-sadérék nu geus sepuh ngahargaan pisan bantuan anjeun.

4. Naon anu bisa dipiconto ku barudak lalaki ti Daud? (Tingali gambar dina sampul hareup.)

⁴ Dina urusan sapopoé, Daud téh tanggung jawab jeung bisa diandelkeun. Misalna waktu ngora kénéh, Daud getol ngurus domba-domba bapana. Éta téh tugas anu bahaya. Ka dieunakeun, Daud nyaritakeun hal éta ka Raja Saul, ”Abdi teh purah ngajagi domba pun bapa. Upami pareng aya singa atanapi biruang anu ngagusur anak domba, ku abdi diudag, ditarajang dombana direbut deui.” (1 Sam. 17:34, 35) Daud ngarasa wajib pikeun ngurus domba-domba, nepi ka wani gelut demi ngalindungan domba-dombana. Barudak lalaki bisa nyonto Daud ku cara getol ngajalankeun tugas naon waé nu dibikeun ka maranéhna.

5. Dumasar Jabur 25:14, naon hal nu pangpentingna nu bisa dilakukeun ku barudak lalaki?

⁵ Daud hayang terus nyobat jeung Yéhuwa. Éta leuwih penting tibatan kawani jeung katarampilan maén musik. Keur Daud, Yéhuwa téh teu ngan saukur Allahna, tapi ogé Sobatna. (Baca Jabur 25:14.) Barudak lalaki, hal pangpentingna nu bisa anjeun lakukeun téh, nyaéta nguatkeun sosobatan anjeun jeung Bapa di sawarga. Mun anjeun ngalakukeunana, bisa waé anjeun dibéré leuwih loba tanggung jawab di sidang.

6. Kumaha pandangan batur ka Daud?

⁶ Salah sahiji tangtangan anu kaalaman ku Daud téh nyaéta disapirakeun ku batur. Misalna, Daud disebut henteu tanggung jawab ku lanceukna sorangan. (1 Sam. 17:26-30) Terus waktu Daud ngarélakeun diri pikeun ngalawan Goliat, Raja Saul nyebut manéhna ”budak keneh”. (1 Sam. 17:31-33) Tapi, Yéhuwa teu nganggap Daud henteu tanggung jawab atawa ngora teuing. Yéhuwa kenal pisan ka Daud. Jeung lantaran Daud ngandelkeun Sobatna, Yéhuwa, manéhna bisa maéhan Goliat.​—1 Sam. 17:45, 48-51.

7. Anjeun meunang palajaran naon tina pangalaman Daud?

 ⁷ Naon palajaran tina pangalaman Daud? Urang kudu sabar. Meureun, aya dulur saiman anu geus kenal ka anjeun ti saprak anjeun leutik kénéh. Maranéhna butuh waktu pikeun sadar yén ayeuna anjeun geus lain budak leutik deui. Tapi sing yakin, Yéhuwa mah teu ngan saukur ningali luarna. Mantenna kenal pisan ka anjeun jeung nyaho naon anu bisa dilakukeun ku anjeun. (1 Sam. 16:7) Pék kuatkeun sosobatan anjeun jeung Yéhuwa. Kumaha carana? Baheula mah, Daud merhatikeun ciptaan Yéhuwa. Tina ciptaan, Daud jadi apal Yéhuwa téh Pribadi anu jiga kumaha. (Jab. 8:4, 5; 139:14; Rum 1:20) Salian ti éta, anjeun gé bisa ménta kakuatan ti Yéhuwa. Misalna, na aya batur sakola anu moyokan lantaran anjeun téh Saksi Yéhuwa? Mun aya, pék ngadoa ménta Yéhuwa nguatkeun anjeun. Terus, tuturkeun naséhat-naséhat anu aya dina Firman-Na, publikasi urang, jeung vidéo-vidéo. Unggal anjeun ngarasakeun Yéhuwa nulungan anjeun, iman anjeun bakal beuki kuat. Engké mun dulur saiman ningali yén anjeun ngandelkeun Yéhuwa, anjeun bakal dipercaya ku maranéhna.

8-9. Ku naon Daud bisa sabar ngadagoan nepi ka jadi raja? Jeung, barudak lalaki bisa diajar naon tina tuladan Daud?

⁸ Daud boga tangtangan séjén. Najan geus dilantik jadi raja, manéhna masih kudu nungguan mangtaun-taun saacan resmi maréntah sabagé raja Yuda. (1 Sam. 16:13; 2 Sam. 2:3, 4) Ku naon Daud bisa sabar nungguan sakitu lilana? Manéhna teu cicing waé pédah leutik haté. Tapi, justru éta dijadikeun kasempetan ku Daud pikeun ngalakukeun naon waé nu manéhna bisa. Misalna waktu kabur ti Saul, Daud cicing di wilayahna urang Pélisti. Di ditu, Daud merangan musuh-musuh Israil. Ku kituna, manéhna ngajaga wates-wates wilayah Yuda.​—1 Sam. 27:1-12.

⁹ Barudak lalaki bisa diajar naon tina tuladan Daud? Gunakeun unggal kasempetan pikeun ngalayanan Yéhuwa jeung mantuan dulur-dulur saiman. Perhatikeun pangalaman Ricardo * pas keur rumaja. Geus lila manéhna hayang jadi panaratas biasa. Tapi ceuk para kokolot, manéhna can siap. Ricardo henteu jadi leutik haté atawa nyerah. Justru manéhna jadi leuwih sering dines. Ceuk Ricardo, ”Mun diinget-inget deui, abdi téh mémang kudu nyieun kamajuan heula. Jadi unggal aya nu minat, ku abdi didatangan deui. Terus unggal rék ngadatangan deui, abdi bakal persiapan. Ahirna, abdi bisa mandu palajaran Alkitab. Beuki sering abdi ngawawar, abdi jadi beuki percaya diri.” Ayeuna, Ricardo geus jadi panaratas biasa nu getol jeung jadi palayan sidang.

10. Naon nu Daud lakukeun saacan nyieun putusan penting?

¹⁰ Daud ngalaman kajadian séjén. Sakali waktu, basa keur kabur ti Saul sarta cicing di wilayahna urang Pélisti, Daud jeung pasukanana ninggalkeun kulawargana pikeun perang. Pas maranéhna indit, aya musuh anu nyerang imah-imah maranéhna sarta mawa kabur kulawargana. Daud bisa waé ngarasa, manéhna téh prajurit anu hébat jeung bisa nyusun rencana nu alus pikeun nyalametkeun kulawarga maranéhna. Tapi, Daud mah teu kitu. Manéhna ménta dipangnyokotkeun épod ku Imam Abiatar. Terus, Daud ménta bingbingan ti Yéhuwa. Manéhna ngadoa, ”Kumaha abdi teh? Kedah nyusul eta rampog?” Yéhuwa méré nyaho yén Daud kudu ngudag musuhna. Yéhuwa gé ngajamin, kulawarga maranéhna  bakal salamet. (1 Sam. 30:7-10) Anjeun diajar naon tina kajadian ieu?

11. Naon nu bisa anjeun lakukeun saacan nyieun putusan?

¹¹ Pék pénta naséhat batur saacan anjeun nyieun putusan. Anjeun bisa tatanya ka indung jeung bapa anjeun. Anjeun gé bisa ménta naséhat ka para kokolot nu geus pangalaman. Yéhuwa téh percaya ka para kokolot, jadi anjeun gé bisa percaya ka maranéhna. Para kokolot téh ”kurnia-kurnia” ti Yéhuwa keur sidang. (Epe. 4:8) Mun anjeun nyonto iman maranéhna jeung daék ngadéngékeun naséhat-naséhat ti maranéhna, anjeun bakal bisa nyieun putusan anu hadé. Ayeuna, hayu urang perhatikeun pangalaman Raja Asa.

12. Waktu kakara maréntah, kumaha sipat Raja Asa?

¹² Basa ngora kénéh, Raja Asa téh rendah haté jeung gedé kawani. Misalna, waktu Asa jadi raja ngagantikeun Abia, bapana, manéhna téh nyingkirkeun brahala-brahala ti Yuda. Manéhna gé nitah urang Yuda pikeun ”ngalampahkeun pangersa PANGERAN, Allah karuhun maranehna, kudu nurut kana papakon-papakon jeung timbalan-timbalan Mantenna”. (2 Bab. 14:1-7) Terus waktu Sérah jeung 1.000.000 prajuritna ti Étiopia nyerang Yuda, Asa ménta bingbingan ti Yéhuwa. Manéhna ngomong, ”Nun Yéhuwa, Gusti mah tangtos gampil baé mitulung ka balad alit balad ageung ogé. Tulungan abdi sadaya, nun Gusti Yéhuwa, sabab abdi sadaya percanten ka Gusti.” Jelas, Asa téh yakin pisan yén Yéhuwa bisa nyalametkeun manéhna jeung bangsana. Bener wé, ”Yéhuwa ngéléhkeun urang Étiopia”.​—2 Bab. 14:8-12, NW.

13. Asa nyieun kasalahan naon? Jeung, naon balukarna?

¹³ Anjeun gé pasti satuju, ngalawan 1.000.000 prajurit téh teu gampang. Tapi lantaran ngandelkeun Yéhuwa, Asa bisa ngéléhkeun musuhna. Hanjakalna, basa rék diserang ku musuh nu jumlahna leuwih saeutik, Asa henteu ménta bingbingan ti Yéhuwa. Waktu rék diserang ku Raja Baasa ti Israil, Asa kalah ka ménta tulung ka raja Siria. Balukarna téh parah pisan! Ti saprak harita, Asa jadi kudu teterusan perang. Yéhuwa méré nyaho alesanana liwat Nabi Hanani, nyaéta lantaran manéhna ”mundut dibantu ka raja Siria, sanes muntang ka PANGERAN Allah Jeng Raja”. (2 Bab. 16:7, 9; 1 Rja. 15:32) Naon palajaranana?

14. Kumaha carana nunjukkeun yén anjeun ngandelkeun Yéhuwa? Dumasar 1 Timoteus 4:12, naon hasilna mun anjeun ngandelkeun Yéhuwa?

 ¹⁴ Urang kudu terus rendah haté jeung ngandelkeun Yéhuwa. Basa dibaptis, anjeun téh nunjukkeun yén anjeun percaya ka Yéhuwa jeung boga iman anu kuat. Yéhuwa senang, sarta narima anjeun jadi kulawarga-Na. Tapi, anjeun kudu terus ngandelkeun Yéhuwa. Waktu rék nyieun putusan nu penting pisan mah, meureun anjeun bakal ménta bingbingan ti Yéhuwa. Tapi, kumaha jeung putusan-putusan séjénna, misalna waktu rék milih hiburan, pagawéan, sarta cita-cita? Anjeun kudu terus percaya ka Yéhuwa, ulah ngandelkeun diri sorangan. Pék téangan prinsip-prinsip Alkitab nu cocog jeung kaayaan anjeun. Geus kitu, jieun putusan nu sajalan jeung prinsip-prinsip éta. (Sil. 3:5, 6) Lamun anjeun ngalakukeun éta, Yéhuwa bakal senang. Anjeun gé bakal dihargaan ku sadérék-sadérék di sidang.​—Baca 1 Timoteus 4:12.

15. Jiga nu dicatet dina 2 Babad 18:1-3; 19:2, kasalahan naon nu dijieun ku Raja Yosapat?

¹⁵ Urang kabéh téh teu sampurna jeung kadang nyieun kasalahan. Tapi, éta sakuduna henteu ngahalangan anjeun pikeun ngalakukeun nu panghadéna dina palayanan. Pikirkeun pangalaman Raja Yosapat. Manéhna boga loba sipat alus. Pas kakara jadi raja, manéhna ”sumujud ka Allah panutan ramana, tunduk kana timbalan-timbalana-Na”. Manéhna gé ngutus para pangéran ka sakuliah Yuda pikeun ngajar jalma-jalma ngeunaan Yéhuwa. (2 Bab. 17:4, 7) Tapi, kadang Yosapat gé nyieun putusan anu salah, matakna sakali waktu manéhna nepi ka ditegor ku utusan Yéhuwa. (Baca 2 Babad 18:1-3; 19:2.) Anjeun bisa diajar naon tina pangalamanana?

16. Anjeun diajar naon tina pangalaman Rajeev?

¹⁶ Pék déngékeun jeung tuturkeun naséhat. Jiga kalolobaan barudak ngora séjénna, meureun anjeun gé hésé pikeun ngutamakeun palayanan dina kahirupan. Tapi, tong leutik haté. Perhatikeun pangalaman Rajeev. Pas keur rumaja, manéhna teu nyaho naon cita-citana. Ceuk Rajeev, ”Jiga budak ngora séjénna, abdi leuwih resep olahraga jeung ulin, tibatan masamoan atawa dines.” Ku naon Rajeev bisa barobah? Aya saurang kokolot  bageur nu méré naséhat ka manéhna. Rajeev nyarita, ”Éta kokolot téh ngabantu abdi mikirkeun prinsip dina 1 Timoteus 4:8.” Rajeev rendah haté, daék narima naséhatna. Manéhna mikirkeun deui naon nu pangpentingna dina kahirupan. Rajeev ngomong, ”Ahirna, abdi mutuskeun pikeun ngudag cita-cita rohani.” Naon hasilna? ”Sababaraha taun sanggeus dibéré éta naséhat, abdi dilantik jadi palayan sidang.”

17. Kumaha pandangan sadérék-sadérék nu leuwih kolot ka barudak ngora nu ngawula Yéhuwa?

¹⁷ Sadérék-sadérék téh ngahargaan anjeun, sabab anjeun daék ngawula Yéhuwa bareng jeung maranéhna. (Sep. 3:9) Maranéhna gé resep ningali anjeun nu sumanget jeung getol ngagawékeun tugas naon waé nu dibikeun ka anjeun. Anjeun téh dipikanyaah ku maranéhna.​—1 Yoh. 2:14.

18. Jiga nu ditunjukkeun dina Siloka 27:11, kumaha parasaan Yéhuwa ka barudak ngora nu ngalayanan Mantenna?

¹⁸ Barudak lalaki, sing inget Yéhuwa téh nyaah jeung percaya ka aranjeun. Mantenna geus ngaramalkeun yén dina ahir jaman, bakal aya pasukan budak ngora nu ngarélakeun diri. (Jab. 110:1-3) Yéhuwa apal, anjeun téh nyaah ka Mantenna sarta hayang ngalakukeun nu panghadéna dina palayanan. Jadi, anjeun kudu sabar ka batur. Terus, ulah gampang nyerah. Waktu nyieun kasalahan, pék tarima naséhat jeung disiplin, sabab éta téh asalna ti Yéhuwa. (Ibr. 12:6) Sing getol ngajalankeun tugas naon waé nu dibikeun ka anjeun. Pangpangna, dina sagala hal pék senangkeun Bapa urang di sawarga.​—Baca Siloka 27:11.