1. Tangtangan naon waé anu bisa jadi kaalaman ku umat Yéhuwa?

NA SADÉRÉK boga tangtangan anu beurat? Meureun aya dulur saiman anu nganyenyeri haté Sadérék. (Yak. 3:2) Atawa meureun, aya batur sakola atawa batur gawé anu moyokan lantaran Sadérék ngalayanan Yéhuwa. (1 Pet. 4:3, 4) Bisa ogé, aya anggota kulawarga anu ngahalang-halang Sadérék supaya teu masamoan jeung nyaritakeun bebeneran ka batur. (Mat. 10:35, 36) Mun tangtanganana beurat pisan, Sadérék meureun hayang nyerah. Tapi sing yakin, teu sual naon tangtanganana, Yéhuwa bakal méré hikmat jeung kakuatan supaya Sadérék sanggup nyanghareupanana.

2. Dumasar Rum 15:4, naon mangpaatna maca Firman Allah?

² Dina Firman-Na, Yéhuwa nyatet kisah ngeunaan jalma-jalma teu sampurna nu nyanghareupan tangtangan nu beurat. Jang naon ieu dicatet? Supaya urang bisa diajar ti maranéhna. Éta alesanana Yéhuwa ngagunakeun Rasul Paulus pikeun nyatet Rum 15:4. (Baca.) Urang bisa dikuatkeun jeung boga harepan lamun maca kisah maranéhna. Tapi mun hayang meunang mangpaat, teu cukup ngan maca wungkul. Pikiran jeung haté urang kudu daék dirobah supaya sajalan jeung Alkitab. Misalna, mun urang keur boga masalah jeung hayang néangan bingbingan, urang kudu kumaha? Urang bisa ngalakukeun opat hal ieu: (1) Ngadoa, (2) Ngabayangkeun, (3) Ngalenyepan, jeung (4) Ngalarapkeun. Hayu urang bahas hiji-hiji. * Terus, urang bakal ngagunakeun cara-cara éta pikeun diajar tina kisah Raja Daud jeung Rasul Paulus.

3. Saacan maca Alkitab, naon nu kudu dilakukeun, jeung ku naon?

 ³ (1) Ngadoa. Saacan maca Alkitab, pénta Yéhuwa ngabantu Sadérék ningali naon mangpaat ayat-ayat nu dibaca. Misalna, mun Sadérék keur néangan naséhat pikeun nyanghareupan masalah, pénta bantuan Yéhuwa supaya Sadérék bisa manggihan prinsip-prinsip Alkitab jeung paham naon nu kudu dilakukeun.​—Pil. 4:6, 7; Yak. 1:5.

4. Kumaha supaya kisah Alkitab karasa leuwih nyata?

⁴ (2) Ngabayangkeun. Yéhuwa méré kamampuh ka urang pikeun ngabayangkeun loba hal. Supaya kisah Alkitab karasa leuwih nyata, pék bayangkeun kaayaanana. Bayangkeun kumaha mun Sadérék jadi jalma nu keur dicaritakeun. Terus, bayangkeun ogé naon anu ditingali ku manéhna jeung kumaha parasaanana.

5. Naon ngalenyepan téh, jeung kumaha carana ngalenyepan?

⁵ (3) Ngalenyepan. Ngalenyepan téh maksudna mikirkeun bener-bener naon nu dibaca jeung mikirkeun naon mangpaatna keur urang. Lamun urang maca jeung ngalenyepan Alkitab, urang jadi leuwih ngarti naon hubunganana hiji katerangan jeung katerangan séjén. Urang gé jadi leuwih paham kana naon nu dibaca. Maca Alkitab bari jeung teu dilenyepan téh ibarat ngan ningalian potongan-potongan kaén wungkul. Ngalenyepan téh ibarat ngaput kaén-kaén éta jadi baju. Ngarah bisa ngalenyepan waktu maca Alkitab, Sadérék bisa mikirkeun pananya-pananya ieu: ’Waktu aya masalah, naon nu dilakukeun ku jalma nu aya dina kisah ieu? Kumaha Yéhuwa mantuan manéhna? Kumaha kisah ieu bisa mantuan abdi waktu aya masalah?’

6. Ku naon urang kudu ngalarapkeun naon nu geus diajarkeun ka urang?

⁶ (4) Ngalarapkeun. Yésus ngomong, lamun urang teu ngalarapkeun naon nu geus diajarkeun ka urang, éta téh ibarat jalma anu ngawangun imah di luhureun keusik. Najan geus hésé capé ngawangun, éta téh percumah. Ku naon? Mun aya angin ribut atawa caah, brug imahna pasti runtuh! (Mat. 7:24-27) Kitu ogé lamun urang ngadoa, ngabayangkeun, jeung ngalenyepan, tapi teu ngalarapkeun naon nu geus diajarkeun, éta téh percumah. Engké lamun aya tangtangan atawa panganiayaan, iman urang moal kuat. Sabalikna lamun urang diajar jeung ngalarapkeunana, urang bakal bisa nyieun putusan-putusan nu leuwih hadé, urang bakal leuwih tenang nyanghareupanana, jeung iman urang bakal beuki kuat. (Yes. 48:17, 18) Ayeuna, hayu urang lakukeun opat hal éta bari ngabahas kisah Raja Daud.

7. Kisah Alkitab naon anu bakal urang bahas?

⁷ Na Sadérék pernah dinyeyeri ku kulawarga atawa babaturan? Mun pernah, Sadérék bisa meunang mangpaat tina kisahna Raja Daud. Manéhna dihianatan ku Absalom, putrana, nu hayang ngarebut tahtana. (2 Sam. 15:5-14, 31; 18:6-14) Ayeuna, hayu urang bahas kisah éta.

8. Supaya meunang bantuan ti Yéhuwa, Sadérék kudu kumaha?

⁸ (1) Ngadoa. Pék caritakeun heula ka Yéhuwa kumaha parasaan Sadérék. (Jab. 6:7-10) Budalkeun eusi haté Sadérék. Terus, pénta bantuan Yéhuwa supaya Sadérék bisa manggihan prinsip-prinsip Alkitab jeung nyaho naon anu kudu dilakukeun.

9. Caritakeun kisah ngeunaan Daud jeung Absalom.

⁹ (2) Ngabayangkeun. Pikirkeun kajadian-kajadian nu dicatet dina kisah ieu, jeung bayangkeun kumaha parasaan Raja Daud. Absalom téh geus upaya mangtaun-taun pikeun meuli haté rahayat. (2 Sam. 15:7) Pas ngarasa waktuna geus cocog, Absalom ngirim  mata-mata ka sakuliah Israil pikeun ngahasud rahayat sangkan narima manéhna sabagé raja. Malah, manéhna nepi ka ngahasud sobat jeung panaséhat Daud, nyaéta Ahitopél, pikeun milu ngahianat. Geus kitu, Absalom ngumumkeun dirina sabagé raja. Manéhna gé hayang néwak jeung maéhan Daud, nu katingalina harita keur gering jeung ripuh pisan. (Jab. 41:2-10) Sanggeus nyaho rencana Absalom, Daud kabur ti Yérusalém. Ahirna, pasukan Absalom perang jeung pasukan Daud. Pasukan Absalom éléh, terus Absalom gé dipaéhan.

10. Raja Daud bisa waé jadi kumaha?

¹⁰ Bayangkeun, kira-kira kumaha parasaan Daud harita? Daud téh nyaah ka Absalom jeung percaya ka Ahitopél. Tapi, maranéhna kalah ka ngahianat ka Daud. Malah, maranéhna hayang maéhan Daud. Daud jadi sedih pisan. Manéhna bisa waé jadi teu percaya ka babaturanana nu séjén, sabab nganggap maranéhna gé bakal ngahianat. Terus manéhna gé bisa waé kabur, da hayang nyalametkeun dirina sorangan. Atawa, manéhna bisa leutik haté jeung nyerah. Tapi, Daud mah teu kitu. Manéhna nyanghareupan kabéh masalahna. Ku naon bisa kitu?

11. Naon nu dilakukeun ku Daud waktu aya masalah?

¹¹ (3) Ngalenyepan. Sadérék bisa diajar naon tina kisah Daud? Pék pikirkeun, ”Naon nu dilakukeun ku Daud waktu aya masalah?” Daud tetep tenang jeung teu asal nyieun putusan. Manéhna gé teu cicing waé lantaran kasieunan. Sabalikna, Daud ngadoa ménta tulung ka Yéhuwa. Manéhna gé ménta tulung ka babaturanana. Terus sanggeus nyieun putusan, Daud langsung ngajalankeunana. Sanajan dinyenyeri pisan, Daud teu jadi curigaan jeung ngéwa ka batur. Manéhna tetep percaya ka Yéhuwa jeung babaturanana.

12. Kumaha Yéhuwa nulungan Daud?

¹² Kumaha Yéhuwa nulungan Daud? Mun urang ngarisét, urang bakal ningali yén Yéhuwa téh méré kakuatan nu diperlukeun sangkan Daud tetep teger. (Jab. 3:1-9) Yéhuwa gé ngaberkahan putusan nu geus dijieun ku Daud. Salian ti éta, Mantenna gé ngadukung babaturan Daud nu satia pikeun perang jeung ngalindungan raja maranéhna.

13. Waktu dinyenyeri pisan ku batur, kumaha urang bisa nyonto Daud? (Mateus 18:15-17)

¹³ (4) Ngalarapkeun. Pék pikirkeun, ’Kumaha abdi bisa nyonto Daud?’ Sadérék kudu geura nyieun tindakan pikeun ngaréngsékeun masalah. Mun kaayaanana cocog, Sadérék bisa nuturkeun naséhat Yésus nu aya dina Mateus pasal 18. Sadérék bisa nyoba ngalarapkeunana langsung atawa ngagunakeun prinsip-prinsipna. (Baca Mateus 18:15-17.) Tapi mun keuheul kénéh, ulah buru-buru nyieun putusan. Sadérék kudu ngadoa heula ka Yéhuwa ngarah dibéré haté anu tenang jeung hikmat. Terus, ulah curigaan ka dulur saiman. Mun aya nu méré bantuan, pék tarima. (Sil. 17:17) Terus nu pangpentingna, tuturkeun naséhat Yéhuwa anu aya dina Firman-Na.​—Sil. 3:5, 6.

14. Dina kaayaan naon Sadérék bisa dikuatkeun ku cara maca 2 Timoteus 1:12-16; 4:6-11, 17-22?

¹⁴ Na Sadérék nyanghareupan tangtangan ti anggota kulawarga lantaran Sadérék ngawula Yéhuwa? Na pamaréntah di tempat Sadérék ngalarang atawa ngawatesan kagiatan Saksi-Saksi Yéhuwa? Mun enya, Sadérék bisa dikuatkeun ku maca 2 Timoteus 1:12-16 jeung 4:6-11, 17-22. * Paulus nulis ayat-ayat éta basa manéhna keur dipanjara.

15. Sadérék bisa ménta naon ka Yéhuwa?

 ¹⁵ (1) Ngadoa. Saacan maca kisah Paulus, caritakeun ka Yéhuwa ngeunaan masalah Sadérék jeung kumaha parasaan Sadérék. Caritakeun sing rinci. Terus, pénta Yéhuwa ngabantu Sadérék manggihan prinsip-prinsip Alkitab supaya Sadérék nyaho naon nu kudu dilakukeun.

16. Kumaha kaayaan Paulus?

¹⁶ (2) Ngabayangkeun. Bayangkeun mun Sadérék jadi Paulus. Manéhna keur diranté di jero panjara di Rum. Paulus pernah dipanjara saacanna, tapi ayeuna mah manéhna apal bakal dihukum pati. Sababaraha babaturanana gé ninggalkeun Paulus, jaba harita awak Paulus geus lemah pisan.​—2 Tim. 1:15.

17. Paulus bisa waé jadi kumaha?

¹⁷ Paulus bisa waé mikir, ’Coba mun urang teu sumanget teuing, meureun ayeuna moal ditahan.’ Paulus gé bisa waé jadi nyeri haté ka dulur-dulur saiman di wilayah Asia nu geus ninggalkeun manéhna. Terus, manéhna gé bisa waé jadi teu percaya deui ka dulur-dulur séjénna. Tapi, Paulus mah henteu kitu. Ku naon Paulus masih percaya ka dulur-dulur saimanna sarta yakin Yéhuwa bakal ngaberkahan manéhna?

18. Naon nu Paulus lakukeun waktu aya tangtangan?

¹⁸ (3) Ngalenyepan. Pikirkeun: ”Naon nu Paulus lakukeun waktu nyanghareupan tangtangan?” Najan geus téréh dihukum pati, Paulus tetep inget yén manéhna téh kudu terus ngamulyakeun Yéhuwa. Manéhna gé masih hayang nguatkeun dulur-dulur saiman. Paulus terus ngandelkeun Yéhuwa ku cara rutin ngadoa. (2 Tim. 1:3) Paulus gé henteu teterusan nyeri haté ka dulur-dulur saiman nu geus ninggalkeun manéhna, tapi Paulus nganuhunkeun ka dulur-dulur saiman nu terus satia jeung ngadukung manéhna. Salian ti éta, Paulus terus diajar Firman Allah. (2 Tim. 3:16, 17; 4:13) Sarta nu pangpentingna, Paulus yakin pisan yén Yéhuwa jeung Yésus téh nyaah ka manéhna. Aranjeunna moal ninggalkeun manéhna, sarta bakal ngaberkahan manéhna nu geus satia.

19. Kumaha Yéhuwa nulungan Paulus?

¹⁹ Yéhuwa geus ngingetan ka Paulus yén manéhna bakal dikaniaya mun jadi urang Kristen. (Ras. 21:11-13) Kumaha Yéhuwa nulungan Paulus? Mantenna ngajawab doa-doa Paulus sarta terus nguatkeun manéhna. (2 Tim. 4:17) Paulus diyakinkeun, manéhna bakal narima berkah anu geus diarep-arep ku manéhna. Yéhuwa gé ngagunakeun sobat-sobatna Paulus anu satia pikeun méré bantuan.

20. Dumasar Rum 8:38, 39, ku naon Paulus bisa teger waktu aya cocoba? Kumaha urang bisa nyonto Paulus?

²⁰ (4) Ngalarapkeun. Mangga pikirkeun, ’Kumaha abdi bisa nyonto Paulus?’ Jiga Paulus, urang kudu siap mun dikaniaya lantaran ngawula Yéhuwa. (Mar. 10:29, 30) Supaya bisa tetep satia, urang kudu ngandelkeun Yéhuwa dina doa jeung boga jadwal palajaran pribadi anu rutin. Sarta urang kudu inget, hal pangpentingna nu bisa urang lakukeun téh nyaéta ngamulyakeun Yéhuwa. Urang bisa yakin yén Yéhuwa moal pernah ninggalkeun urang, sarta moal aya anu bisa megatkeun kanyaah-Na ka urang.​—Baca Rum 8:38, 39; Ibr. 13:5, 6.

21. Naon nu ngabantu Ayuko jeung Hector pikeun nyanghareupan tangtangan?

²¹ Teu sual kumaha kaayaanana, urang bisa dikuatkeun mun maca kisah hamba-hamba Allah dina Alkitab. Perhatikeun pangalaman Ayuko *, saurang panaratas di Jepang.  Manéhna nyarita yén sanggeus maca kisah Yunus, manéhna jadi wani waktu méré kasaksian di tempat umum. Terus aya deui Hector, saurang budak ngora di Indonesia nu kolotna lain Saksi. Manéhna hayang nyonto tuladan Rut pikeun diajar ngeunaan Yéhuwa jeung ngawula Mantenna.

22. Supaya meunang mangpaat tina drama Alkitab atawa kumpulan artikel ”Pék Conto Iman Maranéhna”, naon anu kudu Sadérék lakukeun?

²² Di mana Sadérék bisa manggihan kisah-kisah Alkitab nu nguatkeun Sadérék? Sadérék bisa manggihanana dina vidéo, drama audio, jeung kumpulan artikel ”Pék Conto Iman Maranéhna”. * Saacan ngadéngékeun, nongton, atawa maca kisah-kisah éta, pék ngadoa heula. Pénta Yéhuwa ngabantu Sadérék pikeun manggihan hal-hal alus anu bisa dilarapkeun ku Sadérék. Bayangkeun mun Sadérék jadi jalma anu keur dicaritakeun dina kisah éta. Lenyepan naon anu dilakukeun ku maranéhna sarta kumaha Yéhuwa mantuan maranéhna. Geus kitu, larapkeun palajaranana. Terus, ucapkeun sukur ka Yéhuwa kana bantuan nu geus dibikeun ku Mantenna keur Sadérék. Sadérék gé kudu nunjukkeun yén Sadérék ngahargaan bantuan éta. Carana, kuatkeun jeung dukung dulur saiman.

23. Naon nu dijangjikeun ku Yéhuwa dina Yesaya 41:10, 13?

²³ Hirup di dunya nu dikawasaan ku Sétan téh teu gampang, malah kadang urang teu nyaho kudu kumaha waktu aya masalah. (2 Tim. 3:1) Tapi urang teu perlu hariwang atawa jadi sieun, sabab Yéhuwa apal naon nu kaalaman ku urang. Lamun urang butuh bantuan, Yéhuwa jangji bakal méré kakuatan ka urang. (Baca Yesaya 41:10, 13.) Urang bisa yakin kana hal éta. Urang gé bisa meunang kakuatan pikeun nyanghareupan sagala tangtangan ku cara maca Alkitab.