1. Naon nu ngayakinkeun Sadérék yén Firman Allah téh boga kawasa? (Tingali gambar dina awal artikel.)

UMAT Yéhuwa yakin yén Firman Allah keur manusa téh ”nya hirup, nya kuat”. (Ibr. 4:12) Urang geus ngarasakeun kawasa Alkitab dina kahirupan urang jeung batur. Saacanna jadi Saksi, aya nu baheulana osok maok, nyandu narkoba, atawa hirup rucah. Nu séjénna jadi jalma beunghar atawa kasohor, tapi ngarasa kahirupanana teu aya hartina. (Pan. 2:3-11) Untungna, ayeuna maranéhna boga harepan jeung tujuan hirup. Urang resep maca pangalaman sarupa kitu dina artikel ”Alkitab Mengubah Kehidupan” di majalah Menara Pengawal. Tapi sanggeus jadi Saksi gé, urang kudu terus nguatkeun sosobatan jeung Yéhuwa ku bantuan Alkitab.

2. Kumaha kawasa Firman Allah mangaruhan jalma-jalma di abad kahiji?

² Geus teu anéh lamun jalma-jalma nu diajar bebeneran ngarobah kahirupanana. Ieu ogé dialaman ku  sadérék-sadérék kaistrén di abad kahiji. (Baca 1 Korinta 6:9-11.) Sanggeus Paulus nyebutkeun saha waé nu moal asup ka Karajaan Allah, manéhna ngomong, ”Bareto sabagian aranjeun aya anu hirupna kitu.” Firman Allah jeung roh suci-Na ngabantu maranéhna barobah. Sanajan geus jadi urang Kristen, aya ogé nu ngalampahkeun dosa gedé nepi ka ngaruksak sosobatanana jeung Yéhuwa. Contona, Alkitab nyebutkeun hiji sadérék kaistrén nu dipecat. Ka dieunakeun, manéhna tobat jeung jadi anggota sidang Kristen deui. (1 Kor. 5:1-5; 2 Kor. 2:5-8) Tangtu urang dikuatkeun lantaran nyaho sadérék-sadérék urang bisa nyieun loba parobahan ku bantuan kawasa Firman Allah.

3. Naon nu bakal dibahas dina artikel ieu?

³ Firman Allah téh kuat pisan. Ieu téh kurnia ti Yéhuwa, jadi urang kudu ngagunakeunana ku cara nu bener. (2 Tim. 2:15) Dina artikel ieu, urang bakal ngabahas carana ngagunakeun kawasa Alkitab (1) dina kahirupan urang, (2) dina dines, jeung (3) waktu ngajar ti mimbar. Urang bakal kajurung pikeun nyaah jeung nganuhunkeun ka Bapa di sawarga lantaran geus ngajarkeun hal-hal nu mangpaat.​—Yes. 48:17.

4. (a) Kumaha carana sangkan Firman Allah aya mangpaatna keur urang? (b) Kumaha carana Sadérék nyadiakeun waktu keur maca Alkitab?

⁴ Sangkan Firman Allah aya mangpaatna keur urang, urang kudu ngupayakeun maca éta unggal poé. (Yos. 1:8) Mémang lolobana mah urang sibuk, tapi ulah nepi ka hal-hal séjén, saperti tanggung jawab urang, ngahalangan urang maca Alkitab. (Baca Epesus 5:15, 16.) Aya nu cocog maca Alkitabna isuk-isuk, beurang, atawa peuting. Urang tangtu satuju jeung nu nulis jabur, ”Kumaha cintana abdi kana hukum Gusti, sadinten jeput kaemut-emut.”​—Jab. 119:97.

5, 6. (a) Ku naon urang perlu ngalenyepan Firman Allah? (b) Kumaha cara ngalenyepan nu hadé téh? (c) Naon mangpaatna maca jeung ngalenyepan Alkitab keur Sadérék?

⁵ Tapi, teu cukup ngan saukur maca Alkitab. Urang ogé kudu ngalenyepan naon nu dibaca ku urang. (Jab. 1:1-3) Ngan ku cara éta urang bisa ngalarapkeun naséhat Alkitab dina kahirupan. Jadi, teu sual urang macana dina buku atawa dina alat éléktronik, urang hayang Firman Allah napel pageuh dina haté.

⁶ Kumaha cara ngalenyepan nu hadé téh? Waktu maca, urang bisa eureun sakeudeung jeung mikirkeun, ’Abdi diajar naon ngeunaan Yéhuwa? Naha abdi geus ngalampahkeunana dina kahirupan? Naha  masih aya nu kudu ditingkatkeun?’ Lamun urang ngalenyepan Firman Allah jeung ngadoakeunana, urang bakal kajurung pikeun ngalarapkeunana. Hasilna, urang bisa ngarasakeun kawasa Alkitab dina kahirupan.​—2 Kor. 10:4, 5.

7. Kumaha sakuduna urang ngagunakeun Firman Allah dina dines?

⁷ Waktu ngawawar jeung ngajar, urang kudu sabisa-bisa ngagunakeun Firman Allah. Hiji sadérék ngomong, ”Saupama Sadérék ngawawar bareng jeung Yéhuwa, naha Sadérék bakal nyorocos waé atawa leuwih resep Mantenna nu nyarios?” Waktu urang macakeun Alkitab ka batur, éta hartina urang ménta Yéhuwa nu nyarios. Ayat nu cocog leuwih gedé pangaruhna ti batan omongan urang. (1 Tes. 2:13) Waktu keur dines, naha Sadérék sabisa-bisa macakeun Alkitab?

8. Ku naon urang teu cukup ngan saukur macakeun Alkitab basa ngawawar?

⁸ Tapi, teu cukup ngan saukur macakeun Alkitab ka nu boga imah. Kalolobaan jalma teu ngarti eusi Alkitab. Ieu kaalaman di abad kahiji, ogé di jaman ayeuna. (Rum 10:2) Urang teu bisa nganggap nu boga imah langsung ngarti kana ayat nu dibacakeun. Urang bisa malikan deui maca kecap konci atawa nandeskeun poko penting tina ayat nu dibacakeun sarta ngajelaskeun maksudna. Ku cara ieu, Firman Allah bisa nanceb dina haté jeung pikiran manéhna.​—Baca Lukas 24:32.

9. Kumaha sangkan panganteur urang bisa ngabantu jalma leuwih ngajénan Alkitab? Béré contona.

⁹ Kecap panganteur saacan macakeun ayat bisa ngabantu nu boga imah ngajénan Alkitab. Contona, urang bisa ngomong, ”Kumaha saur Gusti ngeunaan hal ieu?” Atawa, lamun urang ngobrol jeung jalma nu lain Kristen, urang bisa ngomong, ”Hayu urang tingali naon nu dicarioskeun Kitab Suci.” Lamun panggih jeung jalma nu teu paduli kana agama, urang bisa nanya, ”Naha Anjeun pernah ngadangu papatah kuno ieu?” Intina, lantaran unggal jalma boga kapercayaan masing-masing, urang bakal nyaluyukeun panganteur urang sangkan manéhna kataji.​—1 Kor. 9:22, 23.

10. (a) Naon nu kaalaman ku hiji sadérék? (b) Naha Sadérék bisa ningali kawasa Firman Allah basa keur dines?

¹⁰ Geus kabukti lamun Firman Allah gedé pangaruhna ka jalma nu diwawaran ku urang. Contona, saurang sadérék nganjangan saurang bapa nu geus maca majalah urang mangtaun-taun. Hiji poé, sadérék éta teu ngan saukur nganteurkeun majalah Warta Hadé, tapi macakeun hiji ayat.  Ayatna téh 2 Korinta 1:3, 4 nu unina, ”Rama anu maha welas, sarta anu maparin kategeran hate . . . dina kasusahan anu kumaha bae.” Ieu ayat pas pisan keur éta bapa nepi ka manéhna ménta ayatna dibacakeun deui. Éta bapa nyarita yén manéhna jeung pamajikanana keur butuh panglilipur. Ayat ieu ngalantarankeun manéhna hayang nyaho leuwih jero ngeunaan Alkitab. Ngagunakeun Firman Allah waktu dines téh gedé pangaruhna!​—Ras. 19:20.

11. Naon tanggung jawab sadérék-sadérék nu ngajar ti mimbar?

¹¹ Urang resep hadir di pasamoan jeung kongrés-kongrés. Alesan utama urang hadir nyaéta pikeun ibadah ka Yéhuwa. Urang ogé meunang loba mangpaat tina pangajaran nu ditepikeun. Ku kituna, ngajar ti mimbar téh mangrupakeun hak istiméwa jeung tanggung jawab nu penting. (Yak. 3:1) Tangtuna, pangajaranana kudu dumasar kana Firman Allah. Lamun Sadérék meunang hak istiméwa ieu, kumaha carana ngagunakeun kawasa Alkitab pikeun ngageuing hadirin?

12. Kumaha nu hutbah bisa mastikeun pangajaranana dumasar kana Alkitab?

¹² Ayat Alkitab kudu jadi bagian nu pangpentingna tina hutbah. (Yoh. 7:16) Jadi, pangalaman atawa  ibarat nu ditepikeun ulah nepi ka leuwih ditonjolkeun ti batan ayat Alkitabna. Inget ogé yén macakeun Alkitab béda jeung ngajarkeun Alkitab. Hadirin moal inget lamun ayat nu dibacakeun loba teuing. Jadi, Sadérék kudu milih ayat nu bener-bener cocog. Sadiakeun waktu keur maca, ngajelaskeun, ngaibaratkeun, sarta nerangkeun carana éta dilarapkeun. (Neh. 8:8) Lamun aya rangka hutbahna, Sadérék kudu mariksa rangka jeung ayat-ayatna. Lenyepan ogé patalina rangka jeung ayat-ayatna. Terus, gunakeun sababaraha ayat éta keur nerangkeun bagian-bagian dina rangka. (Sadérék bisa manggihan saran-saran alus di palajaran 21 nepi ka 23 tina buku Memperoleh Manfaat dari Pendidikan Sekolah Pelayanan Teokratis.) Nu pangpentingna, suhunkeun pitulung Yéhuwa sangkan bisa nepikeun pangajaran-Na nu hadé tina Alkitab.​—Baca Esra 7:10; Siloka 3:13, 14.

13. (a) Kumaha saurang sadérék istri meunang mangpaat tina hiji ayat nu dibacakeun di pasamoan? (b) Naon mangpaat nu Sadérék tarima tina ayat nu dibahas di pasamoan?

¹³ Basa keur leutik kénéh, saurang sadérék istri ti Australia ngalaman hal nu kacida nyedihkeunana. Sanajan ayeuna geus wanoh ka Yéhuwa, manéhna teu bener-bener yakin  lamun Yéhuwa mikanyaah manéhna. Di pasamoan, manéhna ngadéngé ayat Alkitab nu keuna pisan kana haténa. Basa ngalenyepan jeung nalungtik ayat éta, manéhna manggihan ayat-ayat séjénna. Manéhna jadi beuki yakin yén Yéhuwa nyaah ka manéhna. * (Tingali catetan handap.) Naha Sadérék pernah ngadéngé ayat di pasamoan atawa kongrés nu mawa pangaruh siga kitu?​—Neh. 8:12.

14. Kumaha carana ngabuktikeun yén urang nyaah tur ngajénan Firman Yéhuwa?

¹⁴ Tangtu urang nganuhunkeun pisan ka Yéhuwa nu nyadiakeun Firman-Na, Alkitab. Mantenna nedunan jangji-Na yén Alkitab bakal tetep langgeng. (1 Pet. 1:24, 25) Jadi, urang hayang rutin maca Alkitab, ngalarapkeunana, sarta ngagunakeunana pikeun mantuan batur. Ieu bukti yén urang nyaah tur ngajénan harta rohani ieu sarta Pangarangna, Allah Yéhuwa.