Geus saratus taun leuwih, Saksi-Saksi Yéhuwa ngarancang jeung ngawangun sorangan tempat ibadahna. Tempat éta téh disebut Balé Karajaan. Na aya ogé di daérah Sadérék? Mun aya, naon mangpaatna?

Balé Karajaan dirancang supaya tatangga-tatangga matak panasaran. ”Tujuan urang téh nyaéta nyieun unggal Balé Karajaan jadi tempat nu pangnyongcolangna jeung merenah di sakurilingna,” ceuk Jason nu ngabantu ngurus pangwangunan Balé Karajaan di Amerika Serikat. Saurang Saksi nu digawé sabagé arsiték di tim desain nambahkeun, ”Urang hayang Balé Karajaan téh jadi tempat nu pikaresepeun keur batur jeung mugia jadi picontoeun keur wangunan-wangunan séjénna.”

Waktu ngawangun Balé Karajaan, nu ngagawékeunana téh Saksi Yéhuwa sorangan. Maranéhna hayang pisan ngawangun wangunan nu alus jeung weweg. Biasana cara digawé maranéhna téh diperhatikeun ku batur. Contona, anyaran ieu aya pangwangunan di Richmond, Texas, Amerika Serikat. Pangawas wangunan di ditu tajub ningali hateup Balé Karajaan urang, cenah manéhna can pernah ningali hateup nu saalus kitu. Conto séjénna, di Pulo Jamaika, aya saurang pangawas wangunan nu ngajak sababaraha pangawas anyar pikeun ningali Balé Karajaan nu keur diwangun. Ceuk éta pangawas, ”Geus ulah hariwang ka Saksi Yéhuwa mah. Maranéhna téh ngawangunna bener-bener nuturkeun rancanganana, malahan mah standar maranéhna leuwih alus tibatan standar di dieu.” Aya deui conto séjénna. Saurang pangawas wangunan di Florida, Amerika Serikat ngomong kieu, ”Urang geus ningali pangwangunan rumah sakit jeung wangunan-wangunan pamaréntah, tapi jelema-jelemana euweuh nu tartib jiga kieu. Aranjeun téh alus pisan digarawéna.”

Acara di Balé Karajaan téh méré pangaruh alus ka nu daratang. Maranéhna dibantu pikeun jadi bapa, indung, jeung barudak anu leuwih hadé. Rod nu digawé di tim desain pikeun Balé Karajaan ngajelaskeun, ”Balé Karajaan téh jadi tempat pikeun jalma-jalma diajar ngabogaan ahlak nu leuwih alus. Pangajaran ieu tangtu méré mangpaat keur kabéh jalma.” Manéhna gé ngomong kieu, ”Di ditu Sadérék dibantu pikeun nyanghareupan masalah dina kahirupan. Jalma-jalmana balalageur jeung haneuteun. Maranéhna bakal nyambut Sadérék. Sadérék ogé bakal meunangkeun panglilipur jeung bakal leuwih kenal ka Allah.”

Para Saksi Yéhuwa nu ibadah di Balé Karajaan téh nyaah ka para tatanggana. Maranéhna siap nulungan lamun aya musibat. Misalna dina taun 2016, di Kapuloan Bahama, aya Topan Matthew. Harita, para Saksi ngoméan 254 imah-imah. Aya salah sahiji tatanggana nu ngaranna Violet, umur 80 taun, nyampeurkeun maranéhna. Imah manéhna téh kabanjiran. Jadi, manéhna ménta tulung ka para Saksi jeung daék mayar biaya nu diperlukeun. Tapi, para Saksi embungeun dibayar. Maranéhna ngoméan hateup imah Violet nu bocor jeung masang plafon nu anyar di rohang tamuna. Sanggeusna, Violet nangkeup kabéh para Saksi nu mantuan manéhna. Violet gé teterusan ngahaturkeun nuhun jeung ngomong, ”Aranjeun téh bener-bener umat Allah!”

Supaya Balé Karajaan tetep alus, Saksi-Saksi Yéhuwa ngalatih jalma-jalmana pikeun ngarawat Balé Karajaan. Aya hasil alus tina hal ieu. Misalna, di hiji daérah leutik di Arizona, aya saurang awéwé nu diondang ka acara ibadah di Balé Karajaan. Manéhna muji carana Balé Karajaan dirawat. Manéhna ogé tajub pas nyaho aya palatihan supaya jalma-jalma bisa ngajaga Balé Karajaan tetep alus. Geuningan, awéwé éta téh juru tulis koran di kota éta. Ka dieunakeun, manéhna nulis laporan ngeunaan carana Balé Karajaan dirawat. Di ahir laporan éta, manéhna nulis, ”Urang bungah pisan . . . aya Balé Karajaan di daérah urang.”

Aya loba Balé Karajaan di sakuliah dunya. Sadérék dipiharep pisan pikeun datang. Jalma-jalma di ditu pasti nyambut Sadérék.