OKTOBA 4, 2022
JAPANI
Miaka 50 ya Uchapishaji Kwenye Ofisi ya Tawi ya Japani
Mwaka wa 2022, ndio mwaka wa 50 tangu kazi ya uchapishaji ilipoanza katika ofisi ya tawi ya Japani.
Kati ya mwaka wa 1950 na 1970, ndugu na dada nchini Japani, wakishirikiana na wamishonari 70 hivi, walihubiri kwa bidii, na idadi ya wahubiri iliongezeka sana. Kwa sababu ya uhitaji mkubwa wa machapisho yanayotegemea Biblia katika lugha ya Kijapani, iliamuliwa kwamba ofisi ya tawi ya Japani ianze kuchapisha magazeti ya Mnara wa Mlinzi na Amkeni!
Wakati wa Kusanyiko la Kimataifa la “Amani Duniani” lililofanyika jijini Tokyo mwezi Oktoba 1969, Ndugu Nathan H. Knorr alitangaza kwamba ofisi mpya iliyo na mashine za uchapishajji itajengwa huko Numazu, eneo lililo karibu na Mlima Fuji.
Ndugu wakitayarisha mabamba ya kuchapishia katika miaka ya mapema kwenye ofisi ya tawi ya Numazu, nchini Japani
Kazi ya ujenzi ilianza Januari 1972. Kufikia Agosti 15, 1972, wafanyakazi walikuwa wamefunga mashine yenye uzito wa tani 40, pamoja na mashine ya kutayarisha mabati ya uchapishaji, ya kuunganisha kurasa, na ya kukata kurasa. Gazeti la kwanza kuchapishwa kwenye ofisi hiyo mpya lilikuwa toleo la Amkeni! la Oktoba 8, 1972, katika lugha ya Kijapani. Ndugu aliyewahi kuendesha mashine hiyo ya uchapishaji anasema, “Nilitokwa na machozi ya furaha nilipoona maboksi mengi yaliyokuwa na magazeti ambayo yalikuwa yametoka tu kuchapishwa, yakiwa tayari kusafirishwa.”
Mwaka wa 1982, ofisi ya tawi ya Japani ilihamishwa na kupelekwa kwenye majengo mapya ya Betheli huko Ebina. Ofisi hiyo ilizidi ofisi ya Numazu ukubwa mara tatu na ilitumia mashine mpya na zilizokuwa na kasi zaidi. Mbali na kuchapisha Amkeni! na Mnara wa Mlinzi, ofisi hiyo ya tawi ilianza kuchapisha Biblia Takatifu—Tafsiri ya Ulimwengu Mpya. Pia, walianza kutokeza machapisho yanayotegemea Biblia katika zaidi ya lugha 200.
Picha iliyopigwa hivi karibuni inayoonyesha ndugu zetu wakitumia mashine ya kisasa ya uchapishaji ya MAN Roland Lithoman katika eneo la Ebina, nchini Japani.
Kiwanda cha uchapishaji kilichoko Japani sasa kinachapisha jumla ya nakala milioni 13.2 za Mnara wa Mlinzi na Amkeni! kila mwezi. Tangu mwaka wa 2013, ofisi hiyo ya tawi imechapisha zaidi ya nakala milioni 20 za Biblia katika lugha zaidi ya 100 na kuzisafirisha kwenda nchi zaidi ya 50 ulimwenguni pote.
Mwaka wa 1972, kulikuwa na wahubiri 13,000 nchini Japani. Miaka 50 baadaye, yaani, mwaka wa 2022, idadi hiyo imekua na kufikia wahubiri 213,000. Tunashangilia kuona jinsi ambavyo kiwanda hiki cha uchapishaji kinategemeza kazi ya Ufalme nchini Japani na ulimwenguni pote.—Mathayo 28:19, 20.