Mashahidi wa Yehova walitoa Biblia Takatifu—Tafsiri ya Ulimwengu Mpya katika Kiguarani kwenye kusanyiko la eneo ambapo programu hiyo ilirushwa kupitia video kutoka jumba la Betheli iliyoko Capiatá, Paraguai, Agosti 16, 2019. Ndugu Daniel González, mshiriki wa Halmashauri ya Tawi ya Paraguai alitoa Biblia hiyo katika siku ya kwanza ya kusanyiko hilo. Maeneo mengine 13 yaliunganishwa katika programu hiyo kwa njia ya video, na hivyo jumla ya wahudhuriaji walioshuhudia kutolewa kwa Biblia hiyo walikuwa 5,631.

Ingawa Kihispania kinazungumzwa na watu wengi nchini Paraguai, inakadiriwa kwamba asilimia 90 ya watu nchini humo wanazungumza pia Kiguarani, ambayo ni mojawapo ya lugha za asili. Kwa sababu hiyo, Paraguai ndiyo nchi pekee iliyo Amerika ya Latini iliyo na watu wengi zaidi wanaozungumza lugha ya asili.

Mmoja wa wale waliosaidia kazi ya kutafsiri anasema kwamba kabla ya tafsiri hiyo, ndugu na dada wengi walikuwa wakisali kwa Yehova kwa lugha yao ya asili, yaani, Kiguarani. Anaeleza: “Sasa Yehova atazungumza nasi katika Kiguarani. Tayari tunahisi Yehova anatupenda na kutuheshimu. Sasa ninahisi kabisa kwamba Yehova ni Baba yangu.”

Hakuna shaka kwamba Biblia ya Kiguarani itakuwa na matokeo mazuri kwa wahubiri 4,934 wanaozungumza Kiguarani nchini Paraguai, na hivyo kuwasaidia kumpenda zaidi Yehova na tengenezo lake. Tuna uhakika kwamba tafsiri hii itawasaidia wasomaji kunufaika na mawazo yenye thamani ya Mungu wetu.—Zaburi 139:17.