Jumapili Novemba 21, 2021, Ndugu Eric Raffaeli, mshiriki wa Halmashauri ya Tawi ya Angola, alitoa Biblia ya Tafsiri ya Ulimwengu Mpya ya Maandiko ya Kigiriki ya Kikristo ya lugha ya Kimbundu katika mfumo wa kielektroni. Nakala zilizochapishwa zitapatikana 2022. Programu hiyo iliyorekodiwa awali ilisikilizwa na watu 11,000 hivi.

Mwaka wa 1920 hivi, serikali ya kikoloni ya Wareno ilipiga marufuku lugha ya Kimbundu na lugha nyingine za Kiafrika kutumiwa shuleni. Hata hivyo leo, Kimbundu kinazungumzwa na watu milioni 1.7 hivi nchini Angola kutia ndani wakaaji wa jiji kuu, Luanda. Ni mojawapo ya lugha kuu katika nchi hiyo.

Tangu mwaka wa 1990 hivi, machapisho ya Mashahidi wa Yehova yamekuwepo katika lugha ya Kimbundu. Hata hivyo kutaniko la kwanza la lugha ya Kimbundu lilianzishwa katika mwaka wa 2008. Sasa, kuna wahubiri 2,614 wanaotumikia katika makutaniko 55 ya lugha ya Kimbundu.

Wasomaji wengi wanaielewa zaidi tafsiri hii mpya kuliko tafsiri ya Biblia waliyokuwa nayo awali. Kwa mfano, tafsiri waliyokuwa nayo awali, Mathayo 5:3 imetafsiriwa hivi: “Waliobarikiwa ni maskini wa roho.” Tafsiri ya Ulimwengu Mpya inasema hivi: “Wenye furaha ni wale wanaojua kwamba wanamhitaji Mungu.”

Mtafsiri mmoja alisema hivi: “Nina uhakika kwamba Biblia hii itakuwa baraka kubwa kwa ndugu zetu wanaozungumza Kimbundu. Wataweza kuitumia kwenye funzo lao la kibinafsi, na pia katika utumishi na hivyo, itawasaidia kumkaribia Yehova zaidi. Naliona kuwa pendeleo kubwa sana kuwa sehemu ndogo ya mradi huu. Kwangu huo ni wonyesho wa upendo-mshikamanifu wa Yehova.”

Tunajua kwamba Biblia hii ya lugha ya Kimbundu itawawezesha ndugu na dada zetu wanaozungumza lugha hii waendelee kuwasaidia watu wanaopendezwa “kuelewa siri takatifu za Ufalme wa Mungu.”​—Luka 8:10.