Julai 28, 2023, Ndugu Salvador Domingos, mshiriki wa Halmashauri ya Tawi ya Angola alitoa Biblia Takatifu—Tafsiri ya Ulimwengu Mpya katika Kinyaneka. Biblia hiyo ilitolewa katika kusanyiko la Eneo la “Iweni na Subira”! lililofanywa Lubango katika mkoa wa Huíla, ulio kusini mwa Angola. Jumla ya watu 2,621 walihudhuria. Wale waliohudhuria walipokea nakala zilizochapishwa za Biblia hiyo. Pia, wangeweza kupakua Biblia hiyo katika mfumo wa kielektroni.

Watu wengi wanaozungumza Kinyaneka wanaishi katika mikoa ya Benguela, Cunene, Huíla, na Namibe nchini Angola. Ofisi ya Utafsiri iliyo katika mji wa Lubango ndio inayotumiwa kwa ajili ya kazi ya kutafsiri machapisho yetu katika Kinyaneka.

Hapo awali, mashirika ya Biblia yalichapisha vitabu fulani vya Biblia katika Kinyaneka. Hata hivyo, Biblia Takatifu—Tafsiri ya Ulimwengu Mpya ndiyo Biblia ya kwanza kamili kutolewa katika lugha hiyo. Kwa kuwa kuna lahaja kadhaa za Kinyaneka, kikundi cha utafsiri kilijitahidi kutumia maneno yanayoeleweka na watu wengi zaidi wanaotumia lugha hiyo.

Tunashangilia pamoja na ndugu na dada zetu wanaozungumza Kinyaneka kwa kuwa sasa wanaweza kutumia tafsiri hii mpya wanapoendelea kuwasaidia wengi kujifunza kumhusu Yehova na kumtolea ibada.​—Isaya 2:3.