Mei 7, 2023, kusanyiko la mzunguko la kwanza kufanyika katika lugha ya Wichi lilifanywa nchini Argentina. Wahudhuriaji walikutanika ili kufurahia programu ya “Marafiki wa Amani” katika Jumba la Ufalme jijini Tartagal, Salta. Maeneo mengine nchini Argentina yaliunganishwa kwenye programu hiyo kupitia video mtandaoni. Kulikuwa na wahudhuriaji 169. Watu wawili walibatizwa.

Watu wanaozungumza lugha ya Wichi wanaishi hasa katika maeneo ya kaskazini-magharibi mwa Argentina na kusini-mashariki mwa Bolivia. Katika muda wa miaka kumi hivi, makutaniko mawili, vikundi vitatu, na vikundi vidogo sita vimeanzishwa. Lugha ya Wichi ni lugha ya mama kwa wahubiri 45 na wengine wanaohudhuria mikutano wanajifunza lugha hiyo.

Wengi waliohudhuria kusanyiko hilo wanaishi katika maeneo ya mbali. Ndugu mmoja mwenye umri mkubwa anayeitwa Paulino anaishi umbali wa kilomita 455 kutoka Tartagal. Alisafiri kwa saa 12 kwa basi ili kuhudhuria programu hiyo. Baada ya kusanyiko alisema: “Ninakosa maneno ya kuelezea jinsi ninavyomshukuru Yehova kwa jitihada zote ambazo akina ndugu wamefanya ili tufurahie programu hii katika lugha yetu ya asili.”

Kwa wengine, hiyo ndiyo ilikuwa mara yao ya kwanza kuhudhuria kusanyiko la Mashahidi wa Yehova ana kwa ana. Mwanamke mmoja anayezungumza lugha ya Wichi anayeitwa Delia alianza kujifunza Biblia na Mashahidi wa Yehova katika kipindi cha COVID-19. Yeye pamoja na watoto wake wawili wadogo walitembea kwa saa moja ili kuhudhuria kusanyiko hilo. Delia alifurahi sana kwa sababu kwa mara ya kwanza, alikutana uso kwa uso na dada aliyemwalika kwenye funzo la Biblia!

Shangwe ambayo ndugu na dada zetu wamepata kwenye kusanyiko hili la kwanza katika lugha ya Wichi ni ushahidi wa kwamba Yehova anawatendea washikamanifu wake “kwa njia ya pekee.”​—Zaburi 4:3.