Ofisi ya tawi ya Argentina ilipanga kampeni ya kuhubiri maeneo ya mbali ya Argentina na Uruguai kuanzia Januari hadi Aprili 2023. Zaidi ya wahubiri 9,500 walishiriki na walipangwa katika vikundi 700 hivi. Waliyasaidia makutaniko 146 ya Mashahidi wa Yehova yaliyo katika maeneo hayo ya mbali ya eneo la ofisi ya tawi.

Zaidi ya watu milioni moja wanaishi katika miji midogo, jamii za kienyeji, na katika maeneo ya kijijini ya Argentina na Uruguai. Katika miaka mitatu iliyopita, ilikuwa vigumu kwa wahubiri kufika katika maeneo hayo. Ndugu na dada zetu walifurahi sana kwamba wangeweza kuhubiri tena ujumbe wa Biblia katika maeneo hayo ya mbali.

Ndugu Adrián Donadío na mke wake, Karina, walisafiri kilomita 1,600 hivi ili kwenda kwenye mgawo wao huko Tartagal, Argentina. Adrián anasema hivi: “Tulipoona uhitaji wa kiroho wa watu hao, tulifurahi sana kuwapa burudisho linalopatikana katika habari njema.”

Katika mji wa Barrancas, Argentina, wahubiri wawili waliwatembelea wenzi wa ndoa ambao wana zaidi ya umri wa miaka 90 ambao walikuwa wameanza kujifunza Biblia kabla ya janga la COVID-19. Kwa kuwa nyumba yao iko mbali sana, na mtandao wa Intaneti si mzuri sana, hawakuweza kuwasiliana na kutaniko kwa miaka mitatu. Lakini waliendelea na ratiba yao ya kusoma Biblia kila siku na kumwomba Yehova kwamba mtu awatembelee tena. Walishangilia sana akina ndugu walipowasili wakati wa kampeni hiyo. Walimshukuru Yehova kwa kujibu sala zao, na mipango ilifanywa ili kuendeleza funzo lao.

Ndugu Eduar Ferreira na mke wake, Alejandra, mapainia wa kawaida kutoka Montevideo, Uruguai, walisafiri umbali wa kilomita 400 ili kushiriki kampeni hiyo katika eneo la mbali la nchi yao. Watoto wao wenye umri wa miaka 17, 15, na 11 waliandamana nao. Eduar alisema hivi: “Ilipendeza sana kuona watoto wetu wakihubiri kwa shangwe sana. Tukiwa familia, sote tunatazamia kwa hamu kampeni inayofuata!”

Tunafurahi kuona jinsi Yehova alivyobariki jitihada za ndugu na dada zetu walipojitoa wenyewe “kutoa ushahidi kamili” katika maeneo hayo ya mbali.​—Matendo 10:42.