Kulikuwa na michuano ya Kombe la Dunia la FIFA U-20 katika majiji manne nchini Argentina kuanzia Mei 20 mpaka Juni 11, 2023. Inakadiriwa kwamba kulikuwa na zaidi ya watu 400,000 kutoka Argentina na nchi nyingine ambao walifika kwenye majiji hayo kwa ajili michuano hiyo iliyoendelea kwa majuma matatu. Vigari vya machapisho viliwekwa sehemu mbalimbali na kwa muda tofauti-tofauti. Ndugu na dada 500 hivi walishiriki katika mahubiri hayo na walitoa machapisho zaidi ya 500. Isitoshe, waliwaonyesha watu jinsi ya kupata majibu ya maswali yao ya Biblia kwenye tovuti ya jw.org.

Mwanamume mmoja kutoka Argentina alifika kwenye kigari na akawaeleza Mashahidi waliokuwepo kwamba anapenda kusikiliza habari mbalimbali kwenye mtandao anapofanya mazoezi. Ndugu mmoja alimwonyesha tovuti ya jw.org na jinsi ya kupakua rekodi za kusikiliza kwenye tovuti hiyo. Mwanamume huyo alisema ataweka machapisho yetu kwenye orodha ya habari anazosikiliza.

Kwa kuwa kulikuwa na wageni kutoka mataifa mbalimbali, vigari vilikuwa na machapisho katika lugha tisa. Wahubiri nao walijitahidi kujifunza salamu katika lugha mbalimbali ili waweze kuzungumza na wageni hao kwenye vigari. Ndugu mmoja aliyeshiriki katika mahubiri hayo alisema hivi: “Jitihada nyingi zilifanywa ili kuwafikia watu kutoka nchi mbalimbali na hilo lilikazia akilini mwangu jinsi Yehova alivyo mwenye fadhili na kwamba hambagui yeyote. Kwa kweli, nilipata shangwe nyingi.”

Jambo la kupendeza ni kwamba wasimamizi wa tukio hilo waliwaruhusu Mashahidi wa Yehova kuweka vigari vya machapisho katika sehemu ambazo kwa kawaida hawaruhusu watu kuwepo kwa sababu za kiusalama. Msimamizi mmoja alisema hivi kuhusu uamuzi huo, “Tunawafahamu Mashahidi wa Yehova, wao ni watu wenye amani na hawawezi kumdhuru yeyote.” Mpango huo uliwasaidia ndugu na dada zetu kuwatolea maofisa wa usalama ushahidi mzuri.

Watumishi wa Yehova wanafanya yote wawezayo ili kupanda mbegu za kweli ya Ufalme ulimwenguni pote na kuwafikia watu wa namna zote.​—Mhubiri 11:6.