Katika mkoa wa San Luis, Argentina, ndugu zetu wanafanya mikutano kila juma na kuongoza mafunzo ya Biblia kupitia video iliyounganishwa kwenye mtandao na wafungwa katika gereza lenye ulinzi mkali. Hii ndiyo mara kwanza nchini Argentina kutumia mpango wa kuongoza mafunzo kupitia mtandao.

Kwa miaka mingi, akina ndugu huko San Luis wamekuwa wakitembelea gereza hilo ili kuongoza mikutano na kuongoza mafunzo ya Biblia. Hata hivyo, mpango huo ulisimamishwa mnamo Machi 2020 wenye mamlaka walipoweka amri ya kutotoka nje. Ndugu zetu walifaulu kuendelea kuhubiri gerezani kupitia video iliyounganishwa kwenye mtandao baada ya kupata idhini ya wasimamizi wa gereza.

Mkurugenzi wa gereza alipoona mabadiliko ambayo wafungwa wamefanya baada ya kutembelewa na ndugu hao, yeye na mke wake walianza kuhudhuria mikutano hiyo. Anasema hivi: “Mikutano hii ni muhimu sana katika kuboresha hali ya kiroho na ya kihisia ya wafungwa katika pindi hii ambayo hawawezi kutembelewa. Pia, inapendeza sana kuona jinsi mikutano inavyowafanya wafungwa wawe na amani miongoni mwao. Ni wazi kwamba elimu ya Biblia inatusaidia kutimiza lengo letu la kurekebisha tabia ya wafungwa wawe watu wazuri zaidi katika jamii.”

Mfungwa mmoja aliwaandikia ndugu wanaopanga mikutano hiyo gerezani. Alisema hivi: “Siku ambazo ninatoka katika jela ili kuhudhuria mikutano . . . ninahisi kwamba ikiwa mwanzoni nilikuwa na uchovu, matatizo, mahangaiko, huzuni, na upweke, yote yanaondoka, na ninakuwa na furaha ya kweli. Asanteni sana.”

Kadiri ugonjwa huu wa virusi vya corona unavyoendelea, tunatiwa moyo kujua kwamba akina ndugu wanawasaidia watu kunufaika na ujumbe wa Biblia.—Isaya 48:17, 18.