Kufikia Januari 14, 2024, miaka kumi imetimia tangu utumishi wa badala wa kiraia ulipoanzishwa nchini Armenia. Mpango huo unawaruhusu wale wanaokataa utumishi wa kijeshi kwa sababu ya dhamiri wachangie katika jamii kwa kufanya kazi mbalimbali za umma badala ya kwenda jeshini. Baadhi ya kazi wanazopewa ni kama ujenzi, kutengeneza bustani, huduma za kijamii, au huduma nyingine zinazonufaisha umma. Tangu mpango huo ulipoanzishwa, zaidi ya vijana 450 Mashahidi wa Yehova, wamefanya uamuzi wa kibinafsi wa kushiriki katika utumishi huo.

Ndugu Samuel Petrosyan anafanya kazi ya kutengeneza bustani ikiwa sehemu ya utumishi wa badala wa kiraia. Alisema hivi: Ninafanya yote ninayoweza kujitengenezea jina zuri. Kwa mfano, ninajitahidi kutimiza mgawo wangu kwa njia bora na kuwa mnyoofu katika kila jambo ninalofanya. Na kwa sababu hiyo, wasimamizi wangu wamenitendea kwa fadhili na heshima siku zote.”

Ndugu Artur Martirosyan alifanya utumishi wa badala wa kijeshi kwa miaka mitatu hospitalini. Anasema: “Nilifurahi kupata fursa ya kuwasaidia watu waliohitaji msaada. Pia, hilo lilinisaidia kusitawisha sifa nzuri. Nilijifunza jinsi ya kunyumbulika, kukabiliana na mkazo kwa njia nzuri, na jinsi ya kuwasiliana na watu.”

Kabla ya mwaka wa 2014, vijana wetu nchini Armenia walipewa vifungo virefu vya gerezani kwa sababu walikataa kuchafua dhamiri zao za Kikristo kwa kutumikia jeshini. Mkuu mmoja wa serikali alisema maneno haya kuhusiana na matokeo mazuri ya utumishi wa badala wa kiraia: “Mwanzoni, nilipinga utumishi wa badala wa kiraia kwa sababu nilikuwa na wasiwasi kuhusu usalama wa taifa na pia kwamba watu wangetumia fursa hiyo vibaya. . . . Hata hivyo, nilikosea. Baada ya muda kupita, ni wazi kwamba . . . Mashahidi wa Yehova hawahatarishi usalama wa taifa letu kwa kufanya utumishi wa badala wa kiraia. Kinyume na nilivyotarajia, sasa tuna wafanyakazi wanaojitoa kwa moyo wote katika sehemu tofauti-tofauti kwa sababu ya [mpango] huu.”

Mshiriki wa Kamati ya Jamhuri ya Utumishi wa Badala alisema hivi: “Miaka kumi imepita tangu tulipoanzisha utumishi wa badala nchini Armenia . . . Tunahitaji kujivunia kwamba kati ya maamuzi yenye hekima zaidi yaliyofanywa na nchi yetu ni kuanzisha utumishi wa badala ya kiraia. Mara kwa mara, tunafanya ukaguzi katika taasisi mbalimbali ambapo utumishi huu wa badala unafanyiwa na tumegundua kwamba wanafanya kazi kwa bidii, kwa moyo wote, na wakiwa na tabasamu. Mwaka baada ya mwaka, tunapokea barua nyingi za shukrani kwa sababu ya mchango wa Mashahidi wa Yehova katika jamii wanazotumikia wakiwa watumishi wa badala wa kiraia. Viongozi wa taasisi mbalimbali wamewasifu na kusema kwamba wao ni wafanyakazi wazuri sana.”

Mashahidi wa Yehova nchini Armenia wanafurahi kuwa na fursa ya kuchangia katika jamii kupitia mpango huo wa utumishi wa badala wa kiraia na wakati huohuo kumletea Yehova sifa kupitia “matendo [yao] mazuri.”​—1 Petro 2:12.