Mwaka mmoja baada ya kuanzishwa kwake, programu ya utumishi wa badala wa kiraia nchini Armenia umeanza vizuri. Vijana wa kwanza kushiriki katika programu hii mpya ni Mashahidi wa Yehova ambao badala ya kutumikia vifungo gerezani kwa kukataa utumishi wa kijeshi kwa sababu ya dhamiri, wanafanya kazi nyingine katika utumishi wa uma.

Tangu mwaka wa 1985, wanaume Mashahidi nchini Armenia waliokataa kujiunga na jeshi kwa sababu ya dhamiri hawakuruhusiwa kufanya utumishi mwingine zaidi ya kutumikia vifungo gerezani. Kwa sababu hakukuwa na sheria iliyoruhusu kufanya utumishi wa badala wa kiraia, zaidi ya Mashahidi 450 walifungwa katika kipindi cha zaidi ya miaka 20, mara nyingi chini ya hali ngumu. Hali hii ilibadilika Juni 2013 Armenia ilipofanya mabadiliko katika Sheria ya Utumishi Badala.

Mwezi wa Oktoba 23, 2013, ndipo Kamati ya Jamhuri ya Armenia ilipokubali maombi ya utumishi wa badala wa kiraia ya Mashahidi wa Yehova 57 waliokataa utumishi wa jeshi kwa sababu ya dhamiri a. Baadaye, Kamati hiyo iliwasajili Mashahidi wengine kwenye programu hiyo. Wanaume Mashahidi 71 walianza kazi katika juma la Januari 13, 2014. Kufikia mwisho wa mwaka wa 2014, zaidi ya Mashahidi 126 walikuwa wakifanya utumishi wa badala wa kiraia.

Mafanikio ya programu ya utumishi wa badala wa kiraia yanaonekana wazi kupitia maelezo ya wakurugenzi, wasimamizi na wafanyakazi, ambao wamejionea jinsi vijana Mashahidi walivyo na mazoea mazuri ya kazi, utayari wa kusaidia wengine, na mwenendo mzuri. Washiriki kadhaa wa Kamati ya Jamhuri ya Armenia wamekubali kwamba Mashahidi wanatoa huduma muhimu kwa serikali ya Armenia na wanatimiza majukumu yao kwa bidii.

• “Ninyi mnafanya kazi nzuri sana kwa ajili ya nchi na kwa mshahara mdogo sana. Ni wazi kwamba ninyi ni wachapa kazi.”—Msimamizi wa ofisi ya Huduma za Jamii Yerevan/Shengavit.

• “Hongereni sana! Mnaishi kulingana na kanuni za Kikristo na wakati uleule mnasaidia jamii.”—Muuguzi katika makao ya watoto yatima ambapo Mashahidi wametumwa kufanya kazi.

• “Kuna watu wengine kama ninyi? Ningependa wanifanyie kazi!”—Mkurugenzi wa ofisi ya Huduma za Jamii Yerevan/Arabkir.

Pia, Mashahidi waliosajiliwa katika programu ya utumishi wa badala wa kiraia wameelezea mambo mazuri waliyojionea.

• “Ninafurahia upendo na heshima ninayopata kutoka kwa wafanyakazi wenzangu. Pindi moja nilikuwa mgonjwa na ilikabidi nikae nyumbani, wafanyakazi wenzangu walinipigia simu ili kujua ninaendeleaje. Ni baraka kubwa, kwa sababu inaniruhusu kumtumikia Mungu bila mkazo wowote.”—Gevorg Taziyan, amepangiwa kazi ya Dereva msaidizi katika ofisi yaTerritorial Division ya Wizara ya Huduma za Uokoaji Katika Hali za Dharura.

• “Kazini, tuna uhusiano mzuri pamoja na wasimamizi na wafanyakazi. Tumeona wanavyotujali, hivyo na sisi pia tumewatunza. Nyakati nyingine tulipangiwa kazi ambazo si zetu, lakini tulizifanya.”—Samvel Abrahamyan, amepangiwa kazi ya kutunza uwanja katika Hospitali ya Wagonjwa wa Akili ya Sevan.

• “Sote 13 tulianza kufanya kazi katika Wizara ya Huduma za Uokoaji Katika Hali za Dharura, Januari 14, 2014. Tangu tuanze mpaka sasa, tumefurahia mahusiano mazuri na kila mtu. Hakuna kutoelewana kati yetu na wasimamizi. Wanafurahishwa na jinsi tunavyofanya kazi zote pamoja.”—Artsrun Khachatryan, amepangiwa kazi ya kutunza uwanja katika Wizara ya Huduma za Dharura.

Jambo kuu lililochangia mafanikio ya haraka ya programu ya utumishi wa badala wa kiraia wa Armenia ni ushirikiano kati ya wenye mamlaka na wasimamizi pamoja na Mashahidi wenye mtazamo na mazoea mazuri ya kazi. Mashahidi wa Yehova nchini Armenia wanathamini kupata fursa hii ya kusaidia nchi yao bila kukiuka imani yao ya kidini au kufungwa kwa kukataa utumishi wa kijeshi kwa sababu ya dhamiri.