Februari 20, 2024, miaka 50 itakuwa imetimia tangu Mashahidi wa Yehova walipotambuliwa kisheria nchini Botswana. Kabla ya kuandikishwa kisheria mwaka wa 1974, ndugu zetu nchini Botswana walivumilia pindi kadhaa za kuwekewa vizuizi na marufuku katika utendaji wao wa kitheokrasi.

Kweli za Ufalme zilifika nchini Botswana kwa mara ya kwanza katika mwaka wa 1929. Wakati huo nchi hiyo ilikuwa ikiitwa Bechuanaland. Hata hivyo, mwaka wa 1941, msisimko wa kisiasa uliohusianishwa na Vita vya Pili vya Ulimwengu uliifanya serikali itangaze vizuizi dhidi ya kazi yetu na dhidi ya usambazaji wa machapisho ya Biblia. Hatimaye, vizuizi hivyo vilipoondolewa katika mwaka wa 1959, Mashahidi wa Yehova waliendelea na utendaji wao wa kiroho kwa amani ya kadiri fulani.

Katika mwaka wa 1972, sheria mpya ilidai mashirika yote nchini Botswana yaandikishwe na serikali. Ndugu zetu walitii sheria hiyo. Hata hivyo, walipojaribu kuandikisha tengenezo letu, ombi lao lilikataliwa na wakapewa siku 20 za kusitisha utendaji wote wa kidini. Mashahidi wa Yehova nchini Botswana wakapigwa marufuku! Mtu yeyote ambaye angepatwa akishiriki katika huduma au katika mikutano ya kutaniko angeweza kufungwa gerezani kwa miaka saba. Licha ya hayo, ndugu zetu waliendelea kukutana kwa siri. Kwa mfano, nyakati fulani mikutano ilifanywa katika maeneo ya mbali vichakani. Ndugu Tommy Maruping alisema hivi akikumbuka mambo yaliyotokea wakati huo: “Licha ya marufuku, tuliazimia kuliko wakati mwingine wowote kuendelea kuhubiri na kukutana pamoja. Tulikuwa na uhakika kwamba Yehova angeendelea kuwa pamoja nasi, naye sikuzote alikuwa nasi.”

Februari 20, 1974, serikali ilibadili uamuzi wake na Mashahidi wa Yehova wakaruhusiwa kuandikishwa kisheria kuwa shirika la kidini. Leo, kuna wahubiri 2,400 hivi katika makutaniko 42 nchini Botswana. Kwa sasa mikutano inafanywa katika Lugha ya Ishara ya Botswana, Kiingereza, Kikalanga (cha Botswana), Kitswana, na Kishona. Ndugu Hugh Cormican, ambaye alianza kutumikia akiwa mmishonari nchini Botswana muda mfupi baada ya marufuku hiyo kuondolewa anasema hivi: “Ndugu na dada zetu wameendelea kuwa na imani yenye nguvu hadi leo. Uwezo wa kukutana pamoja katika mikutano na makusanyiko unatuwezesha kufurahia umoja wa kweli tukiwa watu wa Yehova.”

Uvumilivu wa ndugu na dada zetu nchini Botswana unatuthibitishia kwamba sikuzote Yehova atabariki jitihada za watumishi wake za kuendelea ‘kuzishika amri zake’ kwa ushikamanifu.​—1 Yohana 5:3.