Mwaka wa 2023 ni mwaka wa 100 tangu kuanzishwa kwa ofisi ya tawi ya Brazili. Katika miaka hii 100, idadi ya Mashahidi wa Yehova nchini Brazili imekuwa ikiongezeka. Hilo linaonyesha kwamba Yehova ameibariki kazi.

Kazi ya kuhubiri nchini Brazili ilianza mwishoni mwa miaka ya 1890, gazeti la Zion’s Watch Tower and Herald of Christ’s Presence lilipoanza kusambazwa nchini humo. Idadi ya watu waliopendezwa na gazeti hilo ilianza kuongezeka. Hivyo, Machi 1923, Ndugu J. F. Rutherford alimtuma Ndugu George Young nchini Brazili ili kuanzisha ofisi ya tawi na kupanga kazi ya kuhubiri.

Ndugu Young alikodi ofisi ndogo katika jiji la Rio de Janeiro na ofisi hiyo ikawa ofisi ya tawi ya kwanza kabisa, si tu Brazili bali pia katika Amerika yote ya Kusini. Ndugu Young alifanya mipango ili machapisho ya Kiingereza yatafsiriwe kwa Kireno na kuchapishwa katika kiwanda fulani cha uchapishaji.

Mwaka wa 1925, Ndugu Young alipata mgawo wa kutumikia akiwa mmishonari nchini Argentina, kisha Ndugu John Rainbow aliwekwa rasmi kuwa mwangalizi wa ofisi ya tawi ili kusimamia kazi Brazili. Mwaka wa 1926, mashine ndogo ya uchapishaji ilitumwa Brazili kutoka Makao Makuu ya Mashahidi wa Yehova yaliyokuwa Brooklyn, New York, Marekani. Hilo liliwawezesha akina ndugu nchini Brazili kuchapisha magazeti na vijitabu.

Kuanzia mwaka wa 1945, wamishonari waliohitimu Shule ya Gileadi walitumwa Brazili ili kusaidia katika kazi ya kuhubiri. Yehova alibariki sana jitihada zao na kati ya mwaka wa 1948 na 1968, idadi ya wahubiri wa Ufalme ikaongezeka kutoka 1,000 hadi 50,000. Katika miaka mitatu iliyopita, kwa wastani, zaidi ya watu 21,000 wamekuwa wakibatizwa kila mwaka. Leo, kuna wahubiri wapatao 900,000 hivi wanaotangaza habari njema nchini humo. Kwa sababu ya ukuzi huo, majengo ya Betheli yamepanuliwa mara kadhaa. Katika mwaka wa 1980, ofisi ya tawi ilihamishiwa Cesário Lange, mji ulio kilomita 150 hivi kutoka São Paulo. Tangu wakati huo, majengo hayo yaliyo Cesário Lange yamepanuliwa mara tatu. Leo, ndugu na dada zaidi ya 1,200 wanafanya kazi huko.

Tunafurahia kuona jinsi Yehova ameibariki kazi ya kufanya wanafunzi nchini Brazili katika miaka hiyo 100.​—1 Wakorintho 3:7.