SEPTEMBA 26, 2022
BRAZILI
Biblia Nzima ya Tafsiri ya Ulimwengu Mpya Sasa Inapatikana Katika Lugha ya Ishara ya Brazili
Jumapili, Septemba 18, 2022, Ndugu Hamilton Vieira, mshiriki wa Halmashauri ya Tawi ya Brazili, alitangaza kutolewa kwa Biblia Takatifu—Tafsiri ya Ulimwengu Mpya katika Lugha ya Ishara ya Brazili kwenye jw.org na JW Library Sign Language. Zaidi ya watu 36,300 walitazama programu iliyopeperushwa moja kwa moja kutoka kwenye ofisi ya tawi ya Brazili.
Ndugu na dada wanapiga picha wakionyesha Biblia ya Lugha ya Ishara ya Brazili kwenye vifaa vyao
Hii ndiyo mara ya kwanza kwa Biblia nzima kutolewa katika Lugha ya Ishara ya Brazili na ya tatu kutolewa ikiwa mzima katika lugha ya ishara ulimwenguni pote. Mradi wa kutafsiri ulianza mwaka wa 2006. Kazi hiyo ilianza na injili ya Mathayo. Baada ya hapo vitabu vingine vya Biblia vilitolewa mara tu vilipotafsiriwa.
Angellyca, dada ambaye ni kiziwi anasema hivi: “Wakati uliopita, nilijaribu kusoma Biblia katika lugha ya Kireno, lakini ilikuwa vigumu kuielewa. Sasa, ninaposoma Biblia ya Lugha ya Ishara ya Brazili, ninaelewa vizuri kabisa, na ninajihisi nikiwa sehemu ya masimulizi ninayosoma!”
Watafsiri wa Lugha ya Ishara ya Brazili wakirekodi katika studio yao
Mwaka wa 1982, Mashahidi wa Yehova walianzisha kutaniko la kwanza la lugha ya ishara katika jiji la Rio de Janeiro. Leo, wahubiri 9,500 wanatumikia katika makutaniko 246 ya Lugha ya Ishara ya Brazili, vikundi 337, na vikundi vidogo 63.
Kutolewa kwa Biblia hii kunaonyesha kwamba Yehova anawapenda ndugu na dada zetu ambao ni viziwi. Tunasali kwamba zawadi hii yenye thamani itawasaidia watu wengi zaidi kujifunza kumhusu Yehova na Mwana wake na kuipata njia inayoongoza kwenye uzima wa milele.—Yohana 17:3.