Machi 19, 2023, Ndugu Youssouf Ouedraogo, mshiriki wa Halmashauri ya Tawi ya Benin, alitangaza kutolewa kwa Biblia Takatifu—Tafsiri ya Ulimwengu Mpya katika Kimoore. Tangazo hilo lilitolewa katika programu iliyofanywa Ouagadougou, mji mkuu wa Burkina Faso. a Ndugu na dada kutoka miji mingine walisikiliza programu hiyo kupitia video iliyounganishwa mtandaoni. Kwa ujumla, kulikuwa na wahudhuriaji zaidi ya 1,730. Baada ya Biblia hiyo kutolewa, ndugu na dada waliohudhuria uso kwa uso walipata nakala zilizochapishwa, isitoshe, nakala za kielektroni zingeweza kupakuliwa pia.

Kimoore ndiyo lugha inayozungumzwa na watu wengi zaidi nchini Burkina Faso. Kwa sasa, inazungumzwa na zaidi ya watu milioni nane nchini humo. Vilevile, inazungumzwa katika nchi jirani, yaani, Côte d’Ivoire, Ghana, Mali, Senegal, na Togo.

Hii ndiyo mara ya kwanza kwa Mashahidi wa Yehova kutafsiri Biblia nzima katika mojawapo ya lugha zinazozungumzwa na wenyeji wa Burkina Faso. Ingawa kuna tafsiri nyingine za Biblia katika lugha ya Kimoore, hazitumii jina la Mungu, Yehova.

Mtafsiri mmoja alisema hivi: “Ilikuwa vigumu kutafsiri baadhi ya vitabu vya kishairi kama vile Methali na Wimbo wa Sulemani, kwa sababu Kimoore hakina mashairi kama hayo. Hata hivyo, baada ya kutafsiri vitabu hivyo, tulisisimka sana tulipoona jinsi ujumbe ulio katika vitabu hivyo unavyoeleweka kwa urahisi!”

Tunashangilia pamoja na ndugu zetu wanaozungumza Kimoore kwa sababu ya zawadi nzuri ambayo wamepata kutoka kwa Yehova.​—Yakobo 1:17.