Mwezi Julai 2019, maonyesho mapya ya Biblia yalifunguliwa katika ofisi ya tawi ya Mashahidi wa Yehova ya Skandinavia iliyo katika mji wa Holbæk, Denmark, umbali wa kilomita 65 kutoka Copenhagen. Maonyesho hayo yanaitwa “Biblia na Jina la Mungu Katika Skandinavia.”

Maonyesho hayo yana mkusanyiko wa Biblia adimu na za pekee katika Kidenishi, Kifaeroe, Kigreenland, Kiiceland, Kinorway, Kisaami, na Kiswedi. Zaidi ya Biblia 50 zinapatikana kwenye maonyesho hayo.

Moja ya vitu vya pekee sana ni nakala ya kwanza kabisa ya Gustav Vasa Bible ya mwaka 1541. Hiyo ndiyo Biblia ya kwanza kabisa iliyokamilika na kutolewa katika lugha moja kutoka Skandinavia. Nakala ya Gustav Vasa Bible ilitumika kama msingi wa kutokeza msamiati na sarufi iliyotumiwa katika Kiswedi. Pia, maandishi yake yalitumiwa kuwa msingi wa Biblia nyingine za Kiswedi kwa miaka 300.

Nakala ya Christian III Bible ya mwaka 1550 ni tafsiri nyingine ya awali kabisa na adimu inayopatikana kwenye maonyesho hayo. Hiyo ndiyo Biblia ya kwanza iliyokamilika katika Kidenishi. Nakala ya Christian III Bible ilitumika kama msingi wa Kidenishi, na ilikuwa msaada mkubwa sana katika eneo kubwa la Ulaya Kaskazini.

Erik Jørgensen kutoka ofisi ya tawi ya Skandinavia alisema hivi: “Maonyesho haya mapya ya Biblia yanathibitisha kwamba kwa karne nyingi nchi za Skandinavia zimekuwa zikiheshimu sana Neno la Mungu na jina lake kuu, Yehova.”