Kuanzia Septemba 20 hadi 24, 2023, Maonyesho ya Kimataifa ya Vitabu yalifanywa Guayaquil, nchini Ekuado. Zaidi ya wageni 30,000 walihudhuria tukio hilo kwenye uwanja wa Guayaquil Expoplaza. Ndugu zetu waliweka banda la machapisho katika maonyesho hayo lenye kichwa “Kitabu cha Zamani Kinachotunufaisha leo.” Maonyesho hayo yalikazia jinsi ujumbe wa Biblia unayoweza kuwanufaisha watu wa kila rika. Machapisho yalipatikana katika Kichina cha Mandarini, Kiingereza, Kireno, Kikwichua (Chimborazo), Kikwichua (Imbabura), na Kihispania. Ndugu na dada 150 hivi walishiriki katika maonyesho hayo. Watu wanaopendezwa walipokea zaidi ya machapisho 700, na wageni wengi pia walionyeshwa jinsi ya kufanya utafiti na kupata habari mbalimbali kwenye jw.org.

Baba mmoja mwenye matineja alikaribia banda letu na kuwaeleza akina ndugu kwamba alikuwa na wasiwasi kuhusu changamoto ambazo watoto wake wanakabili. Ndugu zetu walimwambia kwamba kanuni za Biblia hazipitwi na wakati na zinaweza kuwasaidia vijana kushinda changamoto wanazokabili. Mwanamume huyo alikubali kupokea vitabu Maswali Ambayo Vijana Huuliza—Majibu Yafanyayo Kazi, Buku la 1 na la 2, kisha akasema: “Sikutazamia kwamba ningepata vitabu vilivyo na habari nzuri namna hii katika maonyesho haya.”

Mwanamke mmoja alikaribia banda letu la machapisho na akauliza ikiwa anaweza kupata Biblia. Alisema kwamba anaishi katika mtaa ambao una ulinzi mkali na hajapata nafasi ya kuwa na mazungumzo na Mashahidi wa Yehova. Dada yetu alimpa nakala ya Biblia na kumweleza kwamba anaweza kujifunza Biblia bila malipo. Kisha mwanamke huyo akiwa na furaha tele, alijaza ombi ili atembelewe kupitia fomu inayopatikana kwenye tovuti ya jw.org.

Diego, ndugu ambaye alishiriki katika maonyesho hayo, alisema hivi: “Ingawa watu wengi wamewahi kuona nembo ya jw.org bado wengi hawajawahi kusikia ujumbe wetu. Ninaamini kwamba banda letu liliwasaidia kuona jinsi Biblia inavyoweza kuwanufaisha leo.”

Tunashangilia kwamba ndugu na dada zetu nchini Ekuado waliweza kuwasaidia wengine kujua kwamba kuna hekima inayotumika katika Biblia, kitabu cha zamani sana kinachotunufaisha leo.​—Methali 3:21.