Kufikia Machi 2022, Mashahidi wa Yehova watakuwa wameandikishwa kisheria kwa miaka 50 nchini El Salvador. Machi 27, 1972, serikali ya El Salvador iliwatambua kisheria ndugu zetu. Punde tu baada ya hapo, idadi ya wahubiri iliongezeka haraka kutoka kilele cha wahubiri 2,524 mwaka wa 1972 hadi wahubiri 5,632 mwaka wa 1976. Leo, kuna zaidi ya wahubiri 38,000 wanaotumikia katika makutaniko 662.

Mnamo 1945, wamishonari walifika nchini humo kwa mara ya kwanza na wakafanya kazi ya kuhubiri kwa bidii. Wakati huo, haikuwa vigumu kupata vibali vya kuishi nchini. Makutaniko yakaanzishwa, na ofisi ya tawi ikafunguliwa mnamo Mei 1946.

Mwaka wa 1968, sheria mpya ya uhamiaji iliwazuia wamishonari kuishi nchini humo kwa zaidi ya miaka mitano. Akina ndugu waliokuwa wakiongoza waliona jinsi ambavyo hilo lingeathiri kazi ya kuhubiri, kwa hiyo wakaanza kufanya mipango ya kuomba kuandikishwa kisheria.

Mwishoni mwa mwaka wa 1971, wazee 30 hivi nchini El Salvador walialikwa kufanya mkutano kwenye ofisi ya tawi ili kujadili jambo hilo. Wakati wa mkutano huo, Ndugu Baltasar Perla, Sr., ambaye baadaye alitumikia akiwa mshiriki wa Halmashauri ya Tawi, aliwaomba wazee wote wampe vitambulisho vyao vya uraia. Aliwajulisha wazee hao kwamba majina na anwani zao zingetiwa ndani katika barua waliyoiandikia serikali ili kuomba kuandikishwa kisheria.

Ndugu Juan Antonio Flores, mmoja kati ya wazee waliokuwepo mkutanoni, anasema: “Ndugu Perla, Sr., alitueleza kwamba kwa kuwa majina na anwani zetu zingetiwa ndani ya barua hiyo, basi ikiwa wenye mamlaka wangepiga marufuku kazi yetu, tungekuwa wa kwanza kukamatwa na kufungwa gerezani.” Ndugu Perla, Sr., aliuliza ikiwa kuna yeyote anaogopa na angependa kurudishiwa kitambulisho chake. Hakuna yeyote aliyeomba kurudishiwa kitambulisho chake. Tunafurahi kwamba serikali haikupinga kazi yetu, na hakuna yeyote ambaye alifungwa gerezani.

Mpango huo ulifaulu, na shirika la Association of Jehovah’s Witnesses likaandikishwa kisheria mwaka uliofuata. Kuanzia wakati huo na kuendelea, wamishonari waliruhusiwa kupata vibali vya kudumu. Kwa kuongezea, ilikuwa rahisi kwa ofisi ya tawi kuingiza machapisho nchini na akina ndugu wangeweza kutetea msimamo wao wa kutounga mkono upande wowote mbele ya wasimamizi wa shule, au maofisa wa serikali.

Aprili 26, 1972, gazeti la serikali la El Salvador lilichapisha lengo kuu la shirika letu la kidini: “Kuhubiri kuhusu mafundisho ya Biblia na habari njema ya Ufalme wa Mungu ili kutoa ushahidi kuhusu jina, ujumbe, na ukuu wa Mungu Mweza-Yote, Yehova.”

Miaka mingi imepita tangu maneno hayo yalipoandikwa, lakini Mashahidi wa Yehova nchini El Salvador wameendelea kuhubiri kumhusu Yehova.​—Isaya 25:9.