MANILA, Filipino—Watu zaidi ya 1,000 walikufa na zaidi ya 970,000 wakabaki bila makao baada ya kimbunga chenye nguvu kusababisha uharibifu mkubwa katika nchi ya Filipino mnamo Jumanne, Desemba 4, 2012. Baada ya mwezi mmoja, Mashahidi wa Yehova wanaendelea kuwapa misaada watu walioathiriwa na Kimbunga Bopha (kinachoitwa Pablo nchini humo).

Kufikia Januari 7, ofisi ya tawi ya Mashahidi wa Yehova huko Manila ilithibitisha kwa kuhuzunisha kwamba kimbunga hicho kilisababisha vifo vya Mashahidi watano. Shahidi mwingine alilazwa hospitalini baada ya kupata jeraha baya la uti wa mgongo. Isitoshe, familia 520 hivi za Mashahidi zilikosa makao kwa kuwa nyumba 140 zilibomoka kabisa na nyingine 400 kuharibiwa.

Wawakilishi wa ofisi ya tawi walitembelea maeneo yaliyoathiriwa na kimbunga hicho ili kutathmini uharibifu, kufanya mipango ya kutoa misaada, kuwafariji, na kuwasaidia kiroho waokokaji. Mashahidi waliunda halmashauri ya kuandaa misaada wakati wa msiba ili ipange vituo saba vya kutoa misaada na kuwasaidia wajitoleaji kugawa misaada.

Katika sehemu fulani za nchi, kimbunga hicho kiliharibu kabisa vyakula na vyanzo vya riziki, kama vile mashamba ya mpunga, ndizi, na minazi. Kwa hiyo, halmashauri ya Mashahidi ya kutoa misaada ilipeleka tani 13 hivi za chakula kwa malori. Hata hivyo, walishindwa kupeleka misaada katika eneo moja lililoathiriwa na kimbunga kwa sababu daraja liliharibiwa.

Kimbunga Bopha kiliharibu pia nyumba 15 za ibada, zinazoitwa Majumba ya Ufalme, na kuharibu nyingine 2. Hata hivyo, baadhi ya watu ambao nyumba zao ziliharibiwa na kimbunga hicho walikaa kwa muda katika Majumba ya Ufalme ambayo hayakuharibiwa. Halmashauri ya kutoa misaada inajitahidi kuwatafutia waathiriwa hao nyumba zaidi zinazofaa.

Jitihada zote za kutoa misaada zinagharimiwa na michango ya Mashahidi wa Yehova wa eneo hilo na Mashahidi wengine ulimwenguni pote. Baraza Linaloongoza la Mashahidi wa Yehova hulipia gharama hizo kwa kutumia michango inayotolewa kwa ajili ya kazi ya Mashahidi ya ulimwenguni pote.

Dean Jacek, msemaji wa Mashahidi wa Yehova nchini Filipino, alisema hivi: “Sote tunaomboleza kwa sababu ya vifo vya rafiki zetu na waabudu wenzetu na tumehuzunika kwa sababu ya uharibifu uliosababishwa na kimbunga hicho. Lakini tutaendelea kufanya yote tuwezayo ili kutoa misaada, kuwasaidia kiroho, na kuwafariji jirani zetu.”

Wanahabari Wanaweza Kuwasiliana na:

J. R. Brown, Ofisi ya Habari ya Habari za Umma, simu +1 718 560 5000

Filipino: Dean Jacek, simu +63 2 411 6090