MANILA, Filipino—Novemba 8, 2013 Kimbunga Haiyan (kinachoitwa Yolanda nchini Filipino) kiliipiga nchi ya Filipino. Kimbunga hicho ni mojawapo ya dhoruba kali zaidi kutokea ulimwenguni.

Kufikia Novemba 13, 2013, ofisi ya tawi ya Mashahidi wa Yehova nchini Filipino iliyoko jijini Manila, iliripoti kwamba Mashahidi 27 walikufa. Zaidi ya nyumba 100 za Mashahidi na majengo matano ya ibada yaliharibiwa.

Baraza Linaloongoza la Mashahidi wa Yehova linaongoza kazi ya kimataifa ya kutoa msaada kutoka kwenye makao makuu ya Brooklyn, New York. Ofisi ya tawi ya Filipino imejitahidi kupeleka chakula, maji, dawa, na bidhaa nyingine kwenye maeneo yaliyoathiriwa. Kufikia Jumapili, Novemba 10, magari kumi hivi yaliyojazwa bidhaa za msaada yalikuwa yamefika, na magari mengine yakaenda siku iliyofuata.

Mnamo Oktoba 15, 2013, muda mfupi tu kabla ya kimbunga hicho, Filipino ilikuwa imekumbwa na tetemeko la nchi lenye kipimo cha 7.2 kwenye kipimo cha Richter lililosababisha vifo vya watu 218. Ripoti zinaonyesha kwamba tetemeko hilo kubwa lilisababisha vifo vya Mashahidi watatu wa Yehova. Mmoja alikufa katika poromoko la ardhi na wengine wawili walikufa nyumba zao zilipoporomoka. Kabla ya tetemeko hilo la nchi, Kimbunga Nari kilikuwa kimeikumba Filipino mnamo Oktoba 12, 2013, na watu 13 hivi walikufa.

Baraza Linaloongoza la Mashahidi wa Yehova hutumia michango iliyotolewa kwa ajili ya kazi ya ulimwenguni pote ili kugharamia misaada. Pia, Baraza Linaloongoza huchunguza ikiwa wajitoleaji wenye ustadi wanahitajiwa, halafu linawasiliana na ofisi za tawi ulimwenguni pote ili kupata wafanyakazi wanaostahili kusaidia katika kazi ya kutoa msaada wakishirikiana na serikali na mashirika mengine ya kutoa msaada.

Dean Jacek, msemaji wa Mashahidi wa Yehova nchini Filipino, alisema: “Tunahuzunika sana kwa sababu ya watu wengi sana waliokufa kutokana na misiba ya karibuni. Watu wanahitaji sana kufarijiwa kwa sababu ya uharibifu uliotokea pamoja na mshtuko ambao watu walioathiriwa walipata. Tutaendelea kufanya yote tuwezayo ili kuwapa rafiki zetu na majirani msaada wa kimwili na wa kiroho.”

Wanahabari Wanaweza Kuwasiliana na:

International: J. R. Brown, Ofisi ya Habari za Umma, simu. +1 718 560 5000

Filipino: Dean Jacek, simu. +63 2 411 6090