Jumapili Juni 21, 2020, Biblia Takatifu—Tafsiri ya Ulimwengu Mpya iliyorekebishwa ilitolewa kwa Kigeorgia kwenye mkutano wa kipekee uliofanywa kupitia video mtandaoni. Ndugu Geoffrey Jackson, mshiriki wa Baraza Linaloongoza, alitoa hotuba iliyorekodiwa mapema ambapo alitangaza kutolewa kwa Biblia hiyo. Jumla ya watu 19,521 waliunganishwa ili kusikiliza programu hiyo. Baada tu ya hapo, nakala ya mtandaoni ya tafsiri hiyo ilikuwa tayari kwa ajili ya kupakuliwa kwenye jw.org.

Watafsiri walitumia miaka minne kutafsiri Biblia hiyo iliyorekebishwa katika Kigeorgia. Mmoja wa watafsiri hao alisema hivi: “Lugha rahisi huwafanya watu wa umri wote waelewe maandishi, hivyo ninatumaini familia zitafurahia kujifunza Biblia hii pamoja.”

Mtafsiri mwingine alisema hivi: “Lengo letu lilikuwa kuwasaidia wasomaji wote waelewe yaliyomo kwa urahisi, bila kujali kiwango cha elimu yao.”

Tuna uhakika kwamba watu wote watakaotumia tafsiri hii ya Biblia ambayo ni sahihi na inayoeleweka, watamshukuru Yehova kwa zawadi yake aliyoitoa kwa upendo.—Yakobo 1:17.