Kuanzia Aprili 11 hadi Juni 11, 2024, Jumba la Makumbusho ya Kitaifa la Ghana lililoko jijini Accra, Ghana, lilikuwa na maonyesho yenye kichwa “Kutolewa kwa Machapisho na Elimu ya Biblia Katika Lugha za Asili Nchini Ghana.” Zaidi ya watu 1,300 walitembelea maonyesho hayo.

Mwaka wa 1937, Mashahidi wa Yehova walianza kutafsiri machapisho ya Biblia nchini Ghana, ambayo hapo awali ilijulikana kama Gold Coast. Leo, ofisi ya tawi ya Ghana inatafsiri machapisho katika lugha 12 zinazozungumzwa nchini Ghana. Maonyesho hayo yalitia ndani video, machapisho, na mambo mengine yanayoonyesha historia hiyo ndefu. Pia, maonyesho hayo watu walionyeshwa jinsi ilivyo rahisi kupata na kutumia machapisho yaliyotafsiriwa kwenye jw.org.

Jumba la Makumbusho ya Kitaifa nchini Ghana pamoja na timu ya maprofesa wanne kutoka chuo kikuu cha Ghana, walishirikiana na ofisi ya tawi kutayarisha maonyesho hayo. Wakiwa na lengo la kuboresha kazi ya uchapishaji na utafsiri inayofanywa na serikali nchini Ghana, maprofesa hao walijifunza kuhusu mbinu ambazo Mashahidi wa Yehova wanatumia katika kazi ya utafsiri. Utafiti huo ulitia ndani ziara ya profesa Dakt. Araba Osei-Tutu, ambaye alitembelea Makao Makuu ya Mashahidi wa Yehova yaliyoko Warwick, New York, Marekani. Isitoshe, timu hiyo ya maprofesa ilitembelea ofisi ya tawi ya Ghana.

Katika hotuba yake wakati wa kuanzishwa kwa maonyesho hayo, Dakt. Osei-Tutu alisema hivi: “Mashahidi wa Yehova wamefanya kazi kubwa sana ya kuwasaidia watu kujifunza kusoma na kuandika, hasa katika lugha zetu za asili. . . . Tunatumia fursa hii . . . kumshukuru kila mmoja ambaye ameshiriki katika kazi hiyo.”

Baada ya kutembelea maonyesho hayo, Profesa Yaw Sekyi-Baidoo wa Chuo Kikuu cha Elimu cha Winneba alisema hivi: “Sikuzote nimewaona Mashahidi wa Yehova kuwa wafundishaji, lakini nimestaajabishwa sana kuona upana wa kazi yao ya utafsiri.”

Msemaji wa Mashahidi wa Yehova nchini Ghana alisema hivi: “Inatia moyo sana kuona watu wa Yehova wakithaminiwa kwa sababu ya kazi ya kuwaelimisha watu katika jamii zao. Ni wazi kwamba Yehova anabariki jitihada za kuwasaidia watu wa namna zote wamjue.”​—Yohana 17:3.