Baada ya miaka minne ya kazi ya kutafsiri, hatimaye tafsiri nzima ya Biblia Takatifu—Tafsiri ya Ulimwengu Mpya ilitolewa katika Kinzema Novemba 22, 2019, katika kusanyiko la eneo lililofanyika Bawia, Magharibi mwa Ghana. Ndugu Samuel M. Kwesie, mshiriki wa Halmashauri ya Tawi ya Ghana, alitoa Biblia hiyo mbele ya wasikilizaji 3,051 waliohudhuria.

Kikundi cha watafsiri saba kilifanya kazi ya kutafsiri Biblia hiyo. Mmoja wa watafsiri hao anasema hivi: “Tafsiri ya Ulimwengu Mpya inatumia lugha rahisi inayofanya ieleweke kwa wasomaji wote kutia ndani vijana. Kwa kweli tafsiri hii itawavuta wasomaji wake karibu na Baba yao wa mbinguni, Yehova.”

Kabla ya kutolewa kwa tafsiri hii, wahubiri wanaozungumza Kinzema walikuwa wakitumia Biblia iliyochapishwa na Shirika la Biblia la Ghana. Hata hivyo, tafsiri hiyo haina jina la Mungu na ni ngumu kuielewa. Pia, kwa kuwa Biblia ni bei ghali sana nchini Ghana, ilikuwa vigumu kwa baadhi ya wahubiri kuzinunua.

Tofauti na hilo, Tafsiri ya Ulimwengu Mpya ya lugha ya Nzema ina jina la Mungu, Yehova, inatumia lugha inayoeleweka, na watu wanaweza kupita bila malipo. Biblia hiyo itawanufaisha wahubiri 1,532 wanaozungumza Kinzema katika eneo la ofisi ya tawi ya Ghana wanapoendelea kuwahubiria watu zaidi ya 330,000 wanaozungumza lugha hiyo.

Tunasali kwamba ndugu zetu waendelee kupendezwa na “sheria ya Yehova” kupitia tafsiri hii mpya ya Biblia.—Zaburi 1:1, 2.