OKTOBA 20, 2015
GHANA
Mashahidi Nchini Ghana Watoa Msaada Mara Moja Baada ya Mafuriko
ACCRA, Ghana—Mwishoni mwa mwezi Agosti 2015, Mashahidi wa Yehova walimalizia kutoa msaada katika mji mkuu wa Ghana, Accra, uliokumbwa na mafuriko makubwa yaliyoharibu nyumba na kuua watu zaidi ya 200.
Shahidi akionyesha alama ya maji yalipofika katika nyumba ya mwabudu mwenzake iliyoharibika wakati wa mafuriko.
Ingawa hakuna Mashahidi waliokufa, nyumba za Mashahidi 250 hivi ziliharibiwa na mafuriko. Juni 4, 2015, siku moja baada ya mafuriko kutokea, ofisi ya tawi ya Mashahidi wa Yehova nchini Ghana ilianzisha halmashauri ya kutoa msaada ili kuhakikisha kwamba waathiriwa wa mafuriko wanapata blanketi, nguo, na maji. Halmashauri hiyo ilifanya mipango ili kusafisha na kurekebisha nyumba zilizoharibiwa na mafuriko. Mashahidi katika jiji la Accra ambao nyumba zao hazikuharibiwa na mafuriko waliwakaribisha na kuishi na waabudu wenzao ambao nyumba zao ziliharibiwa.
Mwenyekiti wa halmashauri ya kutoa msaada, Dossou Amevor (mbali kushoto) akisimamia ugawaji wa magodoro katika Jumba la Ufalme Atiman katika eneo la Madina, Accra.
Mafuriko yalisababisha mlipuko katika kituo cha mafuta ya petroli ambao uliharibu mabomba ya maji katika eneo la Adabraka na kusababisha eneo lote kukosa maji. Ofisi ya tawi ilinunua tangi la maji na kuliweka katika Jumba la Ufalme (nyumba ya ibada) la Adabraka kwa ajili ya Mashahidi na majirani zao.
Jumamosi, Juni 6, ofisi ya tawi ilituma vikundi viwili vya wataalamu wa afya, vilivyokuwa na jumla ya madaktari watano na wauguzi wawili, ambao wote ni Mashahidi, ili kuwahudumia waabudu wenzao na waathiriwa wengine wa mafuriko katika maeneo ya Alajo na Adabraka. Walitibu magonjwa mbalimbali kama vile malaria, magonjwa ya kifua, na kuhara. Wawakilishi wa ofisi ya tawi na Mashahidi walio karibu na eneo hilo waliwatembelea pia waabudu wenzao ili kuwafariji kiroho na kihisia.
Madaktari watano na wauguzi wawili, ambao wote ni Mashahidi, wakiwa ndani ya Jumba la Ufalme la Adabraka, lililotumiwa kama kituo cha afya.
Msemaji wa Mashahidi wa Yehova nchini Ghana, Nathaniel Gbedemah, anasema hivi: “Tunasikitika sana kutokana na uharibifu na vifo vilivyosababishwa na mafuriko yaliyoikumba Accra. Kama ambavyo Mashahidi wa Yehova katika nchi nyingine wanavyofanya, sisi pia tunafanya yote tuwezayo ili kutoa msaada wa kihisia, kimwili, na kiroho kwa ajili ya watu wote walioathiriwa na janga hili.”
Wanahabari Wanaweza Kuwasiliana na:
J. R. Brown, Ofisi ya Habari za Umma, simu +1 718 560 5000
Ghana: Nathaniel Gbedemah, simu +233 30 701 0110
Huenda Ukapenda Pia
TAARIFA ZA HABARI
Mashahidi Watoa Msaada Baada ya Mafuriko Nchini Chile
Mara moja baada ya mafuriko na maporomoko makubwa ya ardhi nchini Chile, Mashahidi wa Yehova jijini Copiapó walifanyiza kamati ya kutoa msaada.
TAARIFA ZA HABARI
Mashahidi Watoa Msaada Baada ya Mafuriko Nchini Angola
Siku moja tu baada ya mfuriko makubwa katika jimbo la Benguela nchini Angola, halmashauri ya kutoa misaada ilifanyizwa ili kusaidia walioathirika.
TAARIFA ZA HABARI
Mashahidi Watoa Msaada Baada ya Mafuriko Nchini Msumbiji
Mashahidi wa Yehova wanaendelea kutoa msaada wa kimwili na wa kiroho kwa watu walioathiriwa na mafuriko katika eneo la kaskazini na la kati la Msumbiji.