Hivi karibuni, ofisi ya tawi ya Hispania ilimaliza kufanya ukarabati katika mojawapo ya majengo ya ofisi. Jengo hilo litatumiwa hasa na Idara ya Tafsiri. Ukarabati huo ni sehemu ya ukarabati mkubwa zaidi unaofanywa katika ofisi hiyo ya tawi unaotarajiwa kukamilika mwaka 2025.

Jengo hilo lililofanyiwa ukarabati sasa lina maktaba kubwa yenye uwezo wa kuhifadhi vitabu 4,000 hivi vya marejeo kwa ajili ya kazi ya utafsiri. Katika maktaba hiyo, kuna vitabu ambavyo havipatikani kwenye mfumo wa kielektroni.

Ndugu John Bursnall, mshiriki wa Halmashauri ya Tawi anasema hivi: “Katika miaka 25 ambayo imepita, kazi zinazofanywa katika ofisi ya tawi ya Hispania zimebadilika sana. Mwanzoni, tulishughulika hasa na kiwanda cha uchapishaji na depo, lakini sasa tunasimamia utafsiri wa lugha ya Hispania, Lugha ya Ishara ya Hispania, na pia unakili wa maandishi ya vipofu kwa ajili ya lugha mbalimbali barani Ulaya. Kwa sababu hiyo, kuna uhitaji wa kutengeneza ofisi zaidi. Bila shaka, jengo hili lililofanyiwa ukarabati litatuwezesha kuwategemeza hata zaidi ndugu na dada zetu ulimwenguni pote.”

Ukarabati wa majengo manne ya makazi umeshaanza. Kutakuwa na wajitoleaji 200 watakaoshiriki ujenzi huo. Ili wafanyakazi wapate mahali pa kuishi, nyumba 70 zinazoweza kuhamishwa zinawekwa sasa kwenye eneo la ofisi ya tawi, nazo zitakuwepo kwa muda ambao ujenzi utaendelea.

Nchi ya Hispania inaendelea kuwa na ukuzi. Kwa sasa, kuna wahubiri 120,530 nchini humo na wahubiri 23,565 wanatumikia wakiwa mapainia wa kawaida. Katika mwaka uliopita, Hispania imekuwa na vilele nane mfululizo vya idadi ya mapainia wa wakati wote.

Tunajua kwamba Yehova ataunga mkono mradi huu unaoendelea ili majengo haya yatimize kusudi la kutukuza jina lake takatifu.​—Zaburi 61:8.