Aprili 4, 2021, Kimbunga Seroja kilisababisha uharibifu mkubwa nchini Indonesia. Misaada iliyotolewa ilitia ndani kusaidia kurekebisha nyumba za akina ndugu na pia kuimarisha vifungo vya upendo wa kindugu na watazamaji wakawachochewa kumtukuza Yehova.

Dada Ela Ludjipau, ni mzazi anayelea watoto wake bila mwenzi. Nyumba yake iliyopatwa na uharibifu ilirekebishwa na Halmashauri ya Kutoa Msaada. Dada Ela Ludjipau anasema hivi: “Hata ingawa tunaishi mimi na watoto wangu tu, sijawahi kujihisi nikiwa mpweke, kwa sababu ndugu na dada zangu wameendelea kunisaidia.” Dada mwingine, Yuliana Baunsele, alisema hivi: “Nilipowaona akina ndugu wakija kunisaidia mara tu baada ya janga hilo, nilisadiki kabisa kwamba Yehova ananijali kikweli.”

Ndugu Dicky Thome, ambaye ni mshiriki wa Halmashauri ya Kutoa Msaada anasema hivi: “Ni furaha iliyo kubwa kuona mkono wa Yehova ukinyooshwa ili kuwasaidia ndugu na dada zetu wenye uhitaji. Tuliguswa moyo sana tulipoona jinsi ndugu na dada zetu walivyothamini msaada waliopokea. Imani yetu iliimarishwa kuona jinsi walivyomtumaini Yehova ili kupata ulinzi na msaada.”

Si ndugu na dada zetu tu walioona upendo huo ulioonyeshwa kwa matendo. Ndugu Marsel Banunaek na familia yake wanaishi katika eneo ambalo lina mgawanyiko unaosababishwa na ubaguzi wa kikabila. Jirani zake hawakuwapenda Mashahidi wa Yehova. Hata hivyo, Ndugu Banunaek alisema kwamba jirani zake walipoona ni watu wa makabila mengine waliokuwa wakiiletea familia yake msaada, baadhi yao walisema: “Mashahidi wa Yehova ni tofauti sana na mambo tuliyoambiwa kuwahusu.” Ndugu Banunaek anasema: “Jirani zetu walishangazwa walipoona upendo na umoja wetu. Pia, watu wetu wa ukoo walijionea fadhili za undugu wetu wa ulimwenguni pote. Na sasa wanatuuliza maswali kuhusu imani yetu. Tunafurahi sana kuwa katika undugu wetu wenye upendo!”

Mhudumu mmoja wa serikali katika eneo hilo, Bi. Yosi Duli Ottu, alisema kwamba kazi ambazo zimefanywa na Halmashauri za Kutoa Msaada na jinsi wanavyozingatia miongozo ya kujilinda na ugonjwa wa COVID-19 ni “mfano mzuri” kwa wengine. Alipokuwa akiongea na Halmashauri ya Kutoa Msaada, alisema: “Ninafurahi sana kuona mambo ambayo mmewafanyia rafiki zenu. Mlikuwa chonjo na mkatenda haraka ili kuwapa msaada walipopatwa na janga. Mna mpango mzuri wa kutoa msaada na mmejitayarisha vizuri ili kufanya kazi hiyo.”

Majanga yanaweza kuharibu mali lakini hayawezi kuvunja upendo wa kweli na umoja wa Kikristo. Inatia moyo sana kuona jinsi ‘matendo mema’ yanayoimarisha upendo wetu na kuchochea watu wengine “kumtukuza” Yehova!—Mathayo 5:16.