Novemba 28, 2020, Biblia Takatifu—Tafsiri ya Ulimwengu Mpya iliyo nzima ilitolewa katika mfumo wa kielektroni na uliochapishwa katika lugha nne za asili za Indonesia: Batak Karo, Batak Toba, Kijava, na Kinias. Ndugu Geoffrey Jackson, mshiriki wa Baraza Linaloongoza, alitoa Biblia hizo katika programu ya pekee iliyorekodiwa mapema na kurushwa kwa makutaniko yote katika visiwa vya Indonesia. Watu 41,265 walitazama programu hiyo. Wakati wa programu hiyo, Ndugu Jackson pia alitangaza kwamba Tafsiri ya Ulimwengu Mpya ya Maandiko ya Kigiriki ya Kikristo katika lugha ya Sunda itatolewa hivi karibuni katika mfumo wa kielektroni.

Tafsiri hizo za Biblia zimetolewa baada ya kazi kubwa ya watafsiri walioshughulikia miradi hiyo kwa miaka mitatu na nusu. Zaidi ya watu milioni 100 huzungumza angalau lugha moja kati ya hizo nne zilizopokea tafsiri hiyo. Isitoshe, zaidi ya wahubiri 2,600 hutumia lugha hizo katika huduma na wakati wa mikutano ya kutaniko.

Mara nyingi, wasomaji leo hawafahamu lugha na maandishi yaliyotumiwa katika tafsiri za Biblia zilizopatikana awali. Mtafsiri mmoja anasema hivi: “Kuwa na Biblia Takatifu—Tafsiri ya Ulimwengu Mpya ambayo ni kamili na ya kisasa kunanisadikisha hata zaidi kwamba Yehova Mungu anataka kila mtu asikie Neno lake katika lugha ambayo ni rahisi kueleweka na inayogusa moyo.”

Daniel Purnomo, mshiriki wa Halmashauri ya Tawi ya Indonesia, anasema hivi: “Tunaishi katika nyakati ngumu, hasa kwa sababu ya ugonjwa wa virusi vya corona (COVID-19). Ndugu na dada zetu wapendwa katika maeneo yanayozungumza lugha hizi wanathamini sana zawadi hii ya kiroho iliyotolewa kwa wakati unaofaa.”

Tunashukuru kwamba Yehova amewasaidia watu wengi zaidi kupata Neno lake ambalo ni zawadi yenye thamani sana. Tunatumaini kwamba watu wengi zaidi wanaozungumza lugha hizo za asili watanufaika kutokana na mafundisho ya Biblia.—Yakobo. 1:17