Italia ni mojawapo ya nchi zilizoathiriwa vibaya zaidi na ugonjwa wa corona. Chini ya mwongozo wa Baraza Linaloongoza, ofisi ya tawi ya Italia inatoa msaada wa kimwili na kiroho kwa ajili ya ndugu na dada zetu.

Halmashauri tatu za Kutoa Msaada zinahangaikia mahitaji ya akina ndugu waliopo Italia ya Kaskazini, Italia ya Kati na Italia ya Kusini. Halmashauri hizi zinahakikisha zinajua mahitaji ya karibuni zaidi ya wahubiri walioathiriwa na ugonjwa huu kwa kudumisha mawasiliano ya karibu pamoja na waangalizi wa mzunguko, ambao hupokea taarifa mara kwa mara kutoka kwa wazee wa makutaniko.

Vilevile wazee wa makutaniko huwasaidia wahubiri kudumisha ratiba nzuri mambo ya kiroho. Ndugu Villiam Boselli, mwangalizi wa mzunguko anayetumikia katika eneo lililo karibu na mji wa Milan, ambao ni mmoja kati ya miji iliyoathiriwa kwanza na ugonjwa huu, anasema hivi: Ijapokuwa ndugu na dada zetu wanakaa nyumbani tu, wote wanaendelea kuwasiliana. Pia, kuhudhuria mikutano kwa njia ya video, kunawawezesha kutiana moyo na kutoa maelezo. Hata ndugu na dada waliozeeka, wanafaidika sana na mikutano inayofanywa kwa njia ya video. Ninafikiri sasa makutaniko yamekuwa na umoja kuliko wakati mwingine wowote!

Vilevile, watu wa ukoo ambao si Mashahidi, wanatazama mikutano pamoja na washiriki wa familia ambao ni Mashahidi. Dada mmoja anasema hivi: “Mume wangu hakuwahi kamwe kutaka kuhudhuria mikutano, lakini sasa mikutano imemfuata nyumbani . . . na jambo la kushangaza ni kwamba anaifurahia!”

Ndugu na dada wanatumia kila fursa kutoa ushahidi. Kwa mfano, dada fulani alipokuwa anaendesha gari lake ili kumpelekea dada mwenye umri mkubwa kiti chake cha magurudumu, alisimamishwa na maofisa wa polisi. Dada huyo aliwaeleza kuwa alikuwa anamsaidia mwanamke huyo mwenye umri mkubwa na kuwaonyesha kibali chake kinachomruhusu kusafiri. Kisha, akawapatia kila mmoja wao trakti ya Una Maoni Gani Kuhusu Wakati Ujao? na Je, Kweli Kuteseka Kutaisha? Maofisa hao walikubali trakti hizo. Dada huyo alipokuwa anarudi, maofisa hao walimsimamisha tena. Lakini wakati huu, walimshukuru na walitaka kujua zaidi kuhusu tumaini linalopatikana katika Biblia. Hata waliwaalika maofisa wengine wawili ili kusikiliza mazungumzo hayo. Dada yetu aliwaonyesha tovuti ya jw.org. Mmoja wa maofisa hao akamwambia hivi: “Asante sana, umefanya siku yetu iwe nzuri.”

Ndugu Broselli anasema hivi: Ijapokuwa mojawapo ya majukumu yangu ni kuwatia moyo na kuwafariji ndugu na dada, mimi ndiye ninayetiwa moyo kwa kuona jinsi ndugu zangu wanavyodumisha hali nzuri ya kiroho na kuazimia kuvumilia. Upendo wao kwa Yehova ni wa kweli na mkubwa hivi kwamba mimi hutokwa na machozi ninapowafikiria. Kwa kweli, wao ni zawadi kubwa tunayohitaji kutoka kwa Yehova!

Ni wazi kwamba, licha ya changamoto wanazopitia, ndugu zetu wanaendelea kuwa imara kiroho na kwamba ‘hawatikiswi na dhiki hizi.’—1 Wathesalonike 3:2, 3.